Psalms 8

1¡TOTECO, ta Tlen Tijpiya Nochi Tlanahuatili! Mohueyitilis quitemit'ia nochi tlaltepactli. Huan motlatlanex quipano elhuicactli. Nochi quimatij ta tlahuel tihueyi. 2Tiquinnextilijtoc coneme huan pilconetzitzi tlen noja chichij ma mitzpaquilismacaca. Mocualancaitacahua quiitase huan momacase cuenta para tlahuel pano hueyi mochicahualis huan yeca ayoc molinise. 3Quema niquita elhuicactli tlen tijsencajqui, huan nopa metztli huan sitlalime tlen tiquinchijchijqui, 4nimoyolilhu'ia: ¿Ajqueya tojuanti titlacame para ta timocuatoton'ia huan timoilhu'ia tlen tojuanti? Nelquentzi topati titlacame para ta titechmocuitlahuis. 5Titechchijtoc titlacame m'as tihuejhueyi moixpa que nochi sequinoc. Titechmacatoc tohueyitilis moixpa huan tijsencajtoc para nochi tlen tijchijtoc ma techtlepanitaca. San ta, TOTECO, tieltoc m'as tihueyi huan titechtlani ica mohueyitilis. 6Titechmacatoc titlacame tlanahuatili ica nochi tlapiyalime tlen tiquinchijtoc. Quena, titechmacatoc titlacame para ma tijpiyaca tequihuejcayotl ica nochi tlamantli. 7Tiquinnahuat'iaj nochi borregojme, huacaxme huan nochi tecuanime tlen mosisin'iaj. 8Tijpiyaj tequihuejcayotl ica nochi tlamantli totome huan michime, huan ica nochi tlen itztoque ipan hueyi atl. 9¡TOTECO, ta Tlen Tijpiya Nochi Tlanahuatili! Nochi tlacame campa hueli ipan nochi tlaltepactli quimatij ta tlahuel tihueyi.

will be added

X\