Psalms 73

1Toteco Dios nel'ia cuali iyolo ica israelitame. Quena, quinicnel'ia nochi tlen quipiyaj tlapajpactic ininyolo. 2San quentzi polihuiyaya para nihuetztosqu'ia. Noicxihua xitlaniyaya huan nechcatitoya para nimomimilos tlatepexico. 3Queja nopa nielqui pampa ax niquijiyohui para ax niquixtocas quema niquitac quejatza tlapijpiyayayaj nopa tlacame tlen mohueyimatij huan tlen tlaixpanoj. 4Itztoque cuali ipan nochi ininyolis, huan ax mococohuaj. 5Ax quinajsi tlaohuijcayotl niyon cuesoli, queja sequinoc quipiyaj. 6Yeca quema mohueyimatij, quiitaj para yejyectzi queja se costli tlen tlachijchihuali ica piltetzitzi tlen pajpatiyo. Huan quema quichihuaj tlen ax cuali, quiitaj queja ininyoyo tlen yejyectzi. 7Nopa tlaixpanoca tlacame ya quijquisaj iniixtiyol pampa tlahuel motomajtoque, huan ya quipixtoque nochi tlen ininyolo quinequij. 8Inijuanti san quihuetzquil'iaj Toteco huan quintemajmajt'iaj itlacajhua. Mohueyimatij quema camatij. 9Fiero quitlaijilhu'iaj Toteco Dios tlen itztoc ipan elhuicactli. Huan quintelchihuaj tlen itztoque ipan ni tlaltepactli. 10Yeca Toteco Dios quinhualicas sampa nochi itlacajhua ipan ni inialtepe, huan quipiyase miyac atl nochi inijuanti. 11Huan quiijtose: "¿Toteco nel'ia quimatis tlachque pano? ¿Yajaya Tlen M'as Hueyi nel'ia quichihuil'ia cuenta tlen pano nica?" 12Xiquitaca, ni tlacame tlen ax tleno quineltocaj ax tleno ininpati. Quipiyaj se yejyectzi yolistli huan ajachica quimiyaquil'iaj m'as inintomi. 13¡Ax tleno nechpalehu'ia para nijpiya noyolo tlapajpactic, huan san tlapic nimocuatoton'ia para ax nijchihuas tlajtlacoli! 14Pampa nochi se tonal nechtlatzacuilt'iaj huan nechtlaijiyohuilt'iaj sesen ijnaloc. 15Intla nicamatitosqu'ia queja inijuanti, huajca niquincajcayajtosqu'ia nochi motlacajhua. 16Quema nijnejqui nijmachili para tlen itztoque cuali nopa tlacame tlen quicocol'iaj Toteco, elqui tlahuel ohui para nijmachilis. 17Pero se tonal nicalajqui ipan motiopa, Toteco Dios, para nimoyolilhuis tlen nopa tlamantli, huan huajca nijmachili tlachque quinchiya. 18Tiquintlalijtoc ipan se ojtli tlen tlahuel alaxtic. Quema tiquincuatopehuas, huajca nimantzi huetzise ipan se hueyi tlacoyoctli huan nopano nenpolihuise. 19Quena, ica se tlalochtli tlamis nochi ininpaquilis. Huan itztose ipan majmajtli para nochipa. 20¡Nochi ininyolis eltoc queja se temictli! Quena, queja quema se cochtoc huan isatiquisas, Toteco, queja nopa quema timotlalanas huan tiquinhuejcamajcahuas. 21Quema niquitac ya ni, nel'ia tlahuel nicualanqui huan hasta nechcocohuayaya noyolo. 22Pampa niquitac para tlahuel nihuihuitic nieltoya. ¡Hasta ninesiyaya moixpa queja se nitlapiyali tlen ax quipiya itlalnamiquilis! 23Pero yonque ya ni nopantic, nochipa niitztoc mohuaya ta, Toteco, huan tinechitzquitoc ipan noma nejmatl. 24Huan nijmati para motlamachtil quisenhuiquilis nechyacanas ipan nochi noyolis. Huan teipa, quema nimiquis, tinechselis nepa mochaj campa tlayejyectzi. 25Axaca seyoc nijpiya nepa elhuicac. ¡San ta, tinoTeco Dios! ¡Huan san ta nimitznequi ipan ni tlaltepactli huan axaca m'as! 26Quemantzi nimococohua huan nimocuesohua. ¡Pero Toteco Dios yajaya mocahua para nochipa! Yajaya quifuerzajmaca noyolo huan san yajaya noaxca para nochipa. 27Pero Toteco quintzontlamiltis nochi tlen ax quinequij quihueyichihuase. Quena, yajaya quintzontlamilt'ia nochi tlen quitlahuelcahuaj. 28Pero na achi m'as nimonechcahuis campa Toteco Dios, pampa ya nopa tlen m'as cuali para na. San ipan TOTECO nimotemachijtoc pampa yajaya noTeco. Huan niquinpohuilis nochi tlacame nochi nopa yejyectzi tlamantli tlen yajaya nechchihuil'ia.

will be added

X\