1 TOTECO, ta tlen tinoDios, ipan ta nimotemach'ia para tinechmanahuis. Xinechmaquixti ininmaco nochi tlen nechtoquilijtinemij. 2 Nocualancaitacahua itztoque queja tecuanime huan intla ta ax tinechmanahuis, nechcocototzase huan axaca nechmaquixtis. 3 TOTECO, intla nel'ia nijhuicasqu'ia tlajtlacoli, quinamiqui ma nechcocolica. 4 Intla nijcuepilijtosqu'ia ica tlen ax cuali se nohuampo tlen cuali itztoya nohuaya, huajca quena. 5 Intla queja nopa nijchijtosqu'ia, huajca ma nechtepotztoca nocualancaitaca. Ma nechajsiti huan ma nechhuahuatatza, huan ma nechpinahualti, pero axaca queja nopa nijchihuilijtoc. 6 Ximotlalana, TOTECO, ica cualantli. Xicualani miyac ica nocualancaitacahua queja inijuanti nechcocol'iaj. Ximoquetza tlatlajco campa tojuanti, huan xiquintetzopa ma nechchihuilica tlen xitlahuac. 7 Se tonal tlacame tlen nochi tlaltini mitzyahualojtose, huan ta tiquintlajtolsencahuas campa timosehuijtoc ipan mosiyaj yejyectzi nepa elhuicac. 8 Quena, TOTECO tiquintlajtolsencahuas nochi tlacame ipan nochi tlaltini. Huajca nojquiya tinechtlajtolsencahua na, TOTECO, ica tlen cuali nijchijtinentoc. Ta tlen m'as tihueyi, tinechnextijtoc iniixtla nochi tlacame para ax nijpiya tlajtlacoli. 9 Ta, tiToteco Dios, tlen titetlajtolsencahua xitlahuac. Xijtlachili inintlalnamiquilis tlacame huan xijyejyeco tlen quipiyaj ipan ininyolo. Xijtlamilti tlen quichihuaj nopa ax cuajcualme, pero xitechchihua tielise titemachme tojuanti tlen timonejnemilt'iaj cuali moixpa. 10 Toteco Dios nechyahualohua para nechmanahuis. Quinmaquixt'ia tlen quipiyaj ininyolo xitlahuac iixpa. 11 Toteco Dios yajaya se juez tlen tetlajtolsencahua xitlahuac. Mojmostla cualani ininca ax cuajcualme. 12 Intla se tlacatl ax moyolcuepas, Toteco Dios quitentis imachete para quitzontlamiltis. Huan quicualtlalis icuahuitol tlen ica quimictis. 13 Ya quicualtlalijtoc itlatehuijca teposhua huan quinhualica imaco para temictis. Quipixtoc miyac cuatlamintli tlen lementoque para tetzontlamiltis intla ax moyolcuepaj. 14 Se tlacatl tlen ax cuali san quinequi tecocos, huan san moilhu'ia tlen fiero hueli quichihuas huan teipa icamaco quisa san istlacayotl. 15 Se tlen quichihua se tlacoyoctli para quimasiltis seyoc, teipa ya huetzis campa tlaxajqui. 16 Queja nopa nojquiya ica tlen fiero se tlacatl quinchihuil'ia sequinoc, teipa mocuepas ipan ya. 17 Pero na nijtlascamatis TOTECO pampa yajaya xitlahuac. Nihuicas tiohuicatl para nijhueyichihuas TOTECO, Yajaya Tlen M'as Hueyi.
