Psalms 63

1¡Toteco Dios, ta tinoDios! ¡Nel'ia tlahuel nimitztemohua! ¡Queja se tlacatl tlen tlahuel amiqui ipan huactoc tlali campa ax onca atl, na ica nochi noyolo huan ica nochi noalma nijnequi nimitzpantis! 2Nijnequi niquitas mochicahualis huan mohueyitilis queja niquitac ipan motiopa. 3Pampa moteicnelijcayo m'as hueyi ipati huan ax noyolis. ¡Tlahuel nimitzhueyimati! 4Huan nochi tonali quema noja niitztos, nimitztiochihuas. Huan moixpa nimomatlalanas huan nimomaijtos ica ta. 5Huan huajca, quena, nijmatis queja elisqu'ia ya niixhuic ica se tlacualistli tlen ajhuiyac. Huan nimitzhueyimatis ica miyac paquilistli. 6Nochi yohuali quema nimoteca ipan notlapech huan ax hueli nicochi, nimoilhu'ia tlen ta. Quena, nimoyolilhu'ia tlen ta sesen hora. 7Nimoilhu'ia quejatza tinechpalehuijtoc huan yeca sesen yohuali tlahuel nipaqui. Queja se piyo quintlat'ia iconehua ieltlapaltzala, queja nopa ta tinechtlat'ia na para ax tleno nechajsis. 8Nimotlatzquilijtoc ipan ta pampa san ta tinechmocuitlahu'ia ica mohueyi chicahualis. 9Nochi tlen quinequij nechmictise yase mictla. 10Pampa ya eltoc tlasencahuali para miquise, huan para sequinoc quintzontlamiltise ica machete. Huan inintlacayohua elis tlacualistli para nopa tepechichime. 11Pero na, nitlanahuatijquetl, nimopaquilismacas ipan ta, Toteco Dios. Huan nojquiya paquise nochi sequinoc tlen senquistoc motemach'iaj ipan ta. Pero nochi tlen istlacatij, ta, Toteco, tiquincamatzacuas.

will be added

X\