Psalms 59

1¡NoTeco Dios, xinechmanahui ininmaco nocualancaitacahua! ¡Xinechmocuitlahui tlen inijuanti tlen hualajtoque para nechtzontlamiltise! 2¡Xinechmanahui ininmaco tlajtlacolchijca tlacame, inijuanti tlen temict'iaj! 3Nechpijpiyaj para quiitase quejatza nechmictise. Tlacame tlen quipiyaj chicahualistli nechchixtoque yahualtic. Pero ax pampa niquinchihuilijtoc se tlamantli tlen ax cuali o pampa niquinixpanotoc. 4¡Axtle! Ax tleno tlen fiero niquinchihuilijtoc, pero inijuanti mocualtlal'iaj para nechmictise. ¡TOTECO, xiisa! ¡Xihuala xinechpalehuiqui! 5TOTECO, Ta Tlen Tiquinyacana Moelhuicac Ejcahua Ma Tlatlanitij, ta tlen titoDios tiisraelitame, ximotlalana huan xiquintlatzacuilti nopa tlaltini tlen ax mitztlepanitaj. Amo xiquintlapojpolhui nopa tlacame tlen mosisin'iaj huan nimantzi tlaixpanoj. 6Mojmostla ica tlapoyahui hualahuij para quitlachilise quejatza huelis techtlanise. Tzajtzitinemij queja chichime tlen quiyahualojtinemij ni altepetl. 7Nijcaqui camatij fiero hasta camaposonij, huan mitztelchihuaj Toteco, pampa inijuanti quiijtohuaj: "Axaca techcaqui." 8Pero ta TOTECO, san xiquinhuetzquili, huan xiquinpinahualti ni tlacame tlen sequinoc tlaltini. 9NoTeco Dios, pampa nocualancaitacahua quipiyaj chicahualistli, ipan ta nimotemachis, pampa ta tlen tinechmanahu'ia. 10NoTeco Dios, ta nochipa tinechicnelijtoc miyac, yeca nijmati para temachtli tinechyacantiyas. Tijchihuas ma niquitas tlen tlahuel nijnectoc ma ininpanti nocualancaitacahua. 11NoTeco, ta tlen tinechmanahu'ia, amo xiquinmicti nimantzi ni nocualancaitacahua, pampa huelis ni notlacajhua nimantzi quiilcahuase tlen ininpantis nopa mosisinijca tlacame. M'as cuali san xiquinsemana ica mohueyi chicahualis huan xiquinechcapantlali. 12Quena, xiquintlatzacuilti pampa nochi inijuanti tlahuel istlacatij, mohueyimatij huan tlatelchihuaj. 13Xiquintzontlamilti ica mohueyi cualancayo, huan xiquintlamiixpolihuilti. Huan queja nopa nochi tlacame quimatise para ta, Toteco Dios, titlanahuat'ia ipan tlali Israel, huan ipan nochi tlaltepactli. 14Nocualancaitacahua mocuepaj ica tiotlac huan tzajtzij queja chichime, huan quiyahualojtinemij ni altepetl. 15Nentinemij campa hueli para quitemojtinemise inintlacualis. Huan quema ax ixhuise, tzajtzij seyohual queja chichime. 16Pero na sesen ijnaloc nihuicas ica nopa chicahualistli tlen tinechmaca. Huan nimitzhueyimatis pampa tinechtlasojtla miyac. San ta tinechmanahu'ia huan san ipan ta nimotemach'ia, quema huala tlaohuijcayotl. 17Toteco Dios, momaco ta niitztoc temachtli, yeca nimitzhueyimatis huan nihuicas para ta, pampa san ta tinechmocuitlahu'ia huan tinechicnel'ia.

will be added

X\