Psalms 58

1¡Imojuanti intlacame tlen inquipiyaj tequihuejcayotl para intetlajtolsencahuaj! ¿Nel'ia xitlahuac inquintlajtolsencahuaj tlacame? 2¡Axtle! San inmoilhu'iaj tlen fiero huelis inquichihuase. Inquichijtoque para noja m'as ma onca tlatehuijcayotl ipan imotlal. 3Nopa tlacame tlen ax quitlepanitaj Toteco pejque moiyocacahuaj hasta quema tlacatque. Huan ipa istlacatij hasta quema pejque huelij camatij. 4Inijuanti tencocoque queja cohuame tlen temict'iaj ica inintencococa. Huan itztoque queja nopa cohuame tlen momatij quincaquij inintos inintecohua, pero ayoc quinequij quinneltocase. 5Monacastzacuaj huan ayoc quichihuil'iaj cuenta, yonque ininteco quintlatzotzonil'iaj yejyectzi para ma quinneltoquilica. Huan nimantzi tetzacan'iaj. Queja nopa itztoque ni fiero tlacame. 6NoTeco Dios, xiquintlamiltili ininchicahualis. Quena, xiquinquixtili ininchicahualis nopa tlacame tlen mosisin'iaj, queja tiquinquixtilisqu'ia inintlancoch huan inincamachal omiyo nopa tecuanime. 7Ma ixpolihuica queja ixpolihui nopa atl tlen toyahui ipan huactoc tlali. Huan nopa tepostli tlen quipixtoque ininmaco para ica tlatehu'iaj, ma eli queja ax tleno ipati. 8Ma elica queja nopa cuachololojtli tlen achotiya quema noja nentinemi. O ma elica queja se pilconetzi tlen tlacatqui mictoc huan tlen ax quema quiitac tlatlanextli. 9Toteco Dios quinixpolihuiltis tlen huehuentzitzi huan tlen telpocame. Quintzontlamiltis nelnimantzi queja se chachapali tlen nimantzi totoniya ica nopa tlitl tlen lementoc ica huitzcuahuitl. 10Pero tlen itztoque xitlahuaque iixpa Toteco, paquise quema quiitase para Toteco ya momacueptoc ica nopa tlacame tlen ax tleno quitlepanitaj, huan moixipajpacase ica inieso nopa tlacame. 11Huan huajca nochi tlacame quiijtose: "Nel'ia quisel'iaj se cuali tlaxtlahuili nopa tlacame tlen itztoque xitlahuaque, pampa melahuac itztoc se Dios tlen tetlajtolsencahua xitlahuac ipan ni tlaltepactli."

will be added

X\