Psalms 57

1Xinechtlasojtla, noTeco Dios, xijnexti moteicnelilis noca na, pampa san ipan ta nimotemach'ia para tinechmanahuis. Queja se pilpiyotzi motlat'ia ieltlapaltzala inana, na nojquiya nimotlat'ia ipan ta hasta panos ni hueyi tlaohuijcayotl tlen eltoc queja se hueyi ajacatl. 2Nijtzajtzilis Toteco Dios Tlen M'as Hueyi. Quena, nijnojnotzas Toteco Dios tlen nochipa nechpalehu'ia ipan nochi tlamantli. 3Tlen elhuicac nechtitlanil'ia itlapalehuil para nechmaquixtis. Yajaya nechchololtis ininmaco nocualancaitacahua tlen ica miyac cualantli nechtepotztocatinemij, huan quinequij nechtzontlamiltise. Pampa yajaya Toteco Dios temachtli huan tlahuel nechicnel'ia. 4Nechyahualojtoque tlacame tlen mosisin'iaj queja tecuanime. Inintlajtol eltoc queja tlitl tlen quisa inincamaco. Inintlancoch tlajtlatequi queja cuatlamintli huan ininnenepil tlatequi queja machete. 5NoTeco Dios, nochi ma mitzhueyichihuaca ipan nochi elhuicactli. Mohueyitilis ma quitemiti ni tlaltepactli. 6Nocualancaitacahua quitlalijtoque se tlaquetztli para ma nimasi, yeca tlahuel nimajmahui. Nojquiya quichijque se tlacoyoctli ipan ojtli para ma nihuetzi ipani, pero xiquita inijuantijya huetzque nopano. 7NoTeco Dios, ipan noyolo nipaqui huan nijpiya tlasehuilistli. Huan yeca nimocualtlalijtoc para nihuicas huan nijsencahuas tiohuicatl para ta. 8Na nimocualtlal'ia para nijtzotzonas noarpa huan noguitarra. Cualca niisa para nimitztlatzotzonilis. 9Na nimitztlascamatis iniixpa tlacame pampa ta, Toteco, tinechchihuilijtoc miyac tlamantli tlen yejyectzi. Huan nihuicas para nimitzhueyimatis iniixpa tlacame tlen nochi tlaltini. 10Moteicnelijcayo nelhueyi queja ipatlajca elhuicactli huan huejcapantic hasta quionpano mixtli. Ta tlahuel titemachtli. 11Toteco Dios, nochi ma mitzhueyichihuaca ipan nochi elhuicactli. Mohueyitilis ma quitemiti ni tlaltepactli.

will be added

X\