Psalms 55

1NoTeco Dios, xinechtlacaquili quema nimomaijtohua ica ta. Amo ximotlati quema nimitztzajtzil'ia. 2Xinechtlacaquili huan xinechnanquili, pampa tlahuel nimocuesohua huan nichoca pampa nitlaijiyohu'ia. 3Nocualancaitacahua nechtzajtzil'iaj chicahuac huan quinequij nechmictise. Tlahuel nechcocol'iaj huan ica nochi inincualancayo nechtoquilijtihualahui para nechtzontlamiltise. 4Nel'ia nechcocohua noyolo pampa nechitzqu'ia se hueyi majmajtli. 5Quena, tlahuel nimajmahui huan nihuihuipica. 6¬°Cuali elisqu'ia intla nijpiyasqu'ia noeltlapal queja quipiya se paloma para huelisqu'ia nipatlantehuasqu'ia huan nimosiyajcahuati! 7Quena, nicholosqu'ia hasta nepa campa huactoc tlaltini tlen mopant'iaj huejca huan nepa nimocahuasqu'ia. 8Nimoisihuiltisqu'ia para nicholos huan nimotlatis tlen nochi ni tlaijiyohuilistli tlen hualajtoc nopani. Eltoc queja se hueyi ajacatl hualajtoc tlen tlamitlaxolehua. 9Toteco, xiquintzontlamilti nocualancaitacahua. Xijchihua ma mocuapoloca inijuanti ininseltitzi quema camatij. Na niquitztoc para nochi tlatehu'iaj campa hueli ipan ni moaltepe. 10Tlayohua huan tonaya yonque itztoque tosoldados tlen quiyahualojtinemij ni altepetl ipan nopa tepamitl para quimocuitlahuise tlen tocualancaitacahua, inijuanti tlen nica ehuani ininseltitzi motehu'iaj se ica seyoc ipan ni altepetl. 11Tlatlajco nopa altepetl quichihuaj miyac tlamantli tlen ax cuali, huan ax onca tlatlepanitacayotl. Ipan tianquis huan campa hueli momict'iaj, tlaxtequij huan tlacajcayahuaj. 12Ax elqui se nocualancaitaca tlen nechcajcayajqui, pampa intla queja nopa eltosqu'ia, huajca niquijiyohuijtosqu'ia. O hueltosqu'ia nimotlatis huan nicholos. 13Pero elqui se tlen nemiyaya nohuaya, se tlen nechyacanayaya huan tlen nonelhuampo. 14Quena, elqui yajaya tlen sentic timopohuiliyayaj nopa tlamantli tlen tijpixtoyaj ipan toyolo, huan yejyectzi timocamahuiyayaj quema san sejco tiyohuiyayaj ipan mochaj, Toteco Dios. 15Ma tlalochmiquica nochi nocualancaitacahua huan ma yaca hasta mictla quema noja yoltoque, pampa ipan ininchaj huan ipan ininyolo san onca tlajtlacoli. 16Pero na san nijtzajtzilis Toteco Dios para ma nechmaquixti. Huan quena, temachtli yajaya nechmaquixtis. 17Na nimomaijtos ica ijnaloc, ica tlajco tona huan ica tiotlac. Huan yajaya nechtlacaquilis huan nechnanquilis. 18Ipan tlatehuijcayotl yajaya nechmanahuis, yonque tlahuel miyac nocualancaitacahua nechtehuise chicahuac. 19Toteco Dios tlen ipa itztoc huan tlanahuatijtoc hasta tlen huejcajquiya, yajaya nechtlacaquilis huan quintzontlamiltis. Pampa nocualancaitacahua ax quipatlaj ininyolis tlen fiero, niyon ax quitlepanitaj itlanahuatil. 20Nopa tlacame tlen ax cuajcualme momatlalanaj huan quintehu'iaj hasta ininhuampoyohua. Quiixpanoj nopa tlajtoli tlen quichihuaj ininhuaya sequinoc. 21Quitequihu'iaj tlajtoli tlen nelyejyectzi huan yamanic queja mantequiya, pero ipan ininyolo san moilhu'iaj quejatza tlatehuise. Nochi tlen quiijtohuaj eltoc alaxtic queja aceite, pero ixtacatzi teyolcocohuaj ica tlajtoli queja quema timotzontequis ica machete. 22Nochi mocuesol xijcahua imaco TOTECO huan yajaya mitzmacas temachili. TOTECO ax quicahuas ma huetzi se tlen quitlepanita. 23Pero ta tinoTeco Dios, tiquintitlanis nocualancaitacahua ipan nopa tlacoyoctli tlen tlahuel huejcatla. Nopa temictiani huan istlacatini ax itztose niyon tlajco tlen ininyolis, pampa ax huejcahuase itztose ipan ni tlaltepactli. Pero na nochipa nimotemachis ipan ta para tinechmaquixtis.

will be added

X\