Psalms 5

1TOTECO, xijtlacaquili notlajtol. Xinechchihuili cuenta quema niayijt'ia. 2Ta tinoTeco Dios tlen tiitztoc tinotlanahuatijca, xinechtlacaquili quema nimitztlajtlan'ia xinechpalehui, pampa axaca seyoc nijtlajtlan'ia. San nimomaijtohua moca ta. 3Sese ijnaloc nelcualca nimitzpohuil'ia tlen nopanti, TOTECO. Mojmostla nimitztlajtlan'ia tlen monequi, huan san nimochiya para tinechnanquilis. 4Ta tiToteco Dios tlen ax mitzpact'ia tlen ax cuali. Yeca ax tiquincahuil'ia ax cuajcualme ma itztoca mohuaya. 5Tlen mohueyimatij ax hueli moquetzase moixpa. Ax tijnequi tiquinitas nochi nopa tlacame tlen quichihuaj tlen ax cuali. 6Tiquintzontlamilt'ia tlacame tlen istlacatij. Quena, TOTECO, ax tijnequi tiquinitas tlen tlacajcayahuaj huan temict'iaj. 7Pero na, pampa hueyi moteicnelijcayo, huelis nicalaquis mochaj. Quena, huelis nimitzhueyichihuas ipan motlatzejtzeloltijca tiopa, pampa nimitztlepanita huan nimajmahui para nimitzixpanos. 8TOTECO, xinechyacana queja nohuaya timocajtoc tijchihuas, pampa itztoque nocualancaitacahua. Xinechnextili moojhui tlen xitlahuac. 9Nocualancaitacahua ax quema quiijtohuaj tlen melahuac. Axaca hueli motemach'ia ipan inintlajtol. Ipan ininyolo san quinequij tetzontlamiltise. Inincamac eltoc fiero queja quema quitlapohuaj se mijca tlacoyoctli. Tecamahu'iaj ica tlajtoli tlen yejyectzi san para tlacajcayahuase. 10Xiquintlatzacuilti, noTeco Dios. Xiquinmasilti ica tlen ax cuali moilhuijtoque quinchihuilise sequinoc. Xiquinhuejcamajcahua pampa miyac inintlajtlacolhua. Quena, xiquinhuejcamajcahua pampa mohuejcachijtoque tlen ta. 11Pero ma paquica nochi tlen motemach'iaj ipan ta para xiquinpalehui. Nochipa ma huicaca ica paquilistli pampa ta tiquinmanahu'ia. Tlen mitzicnel'iaj paquij ipan ta. 12Pampa ta, TOTECO, tiquintiochihua tlen quichihuaj tlen xitlahuac moixpa. Moteicnelijcayo quinyahualohua queja se tepos pantzajcayotl tlen quinmocuitlahu'ia.

will be added

X\