Psalms 48

1¡Tlahuel hueyi TOTECO! Quena, quinamiqui para tijpaquilismacase Toteco Dios tlen itztoc ipan ialtepe huan ipan itepe tlen tlatzejtzeloltic. 2Nel'ia yejyectzi nopa tepetl Sion huan ijcatoc tlahuejcapa ipan nopa altepetl. Nopano mosehu'ia Jerusal'en, ialtepe Toteco Dios, nopa hueyi tlanahuatijquetl. 3Toteco Dios iselti itztoc ipan nopa huejcapantic cali campa monequi moquetzas tlen tlachixtoc para quimanahuis altepetl Jerusal'en. Tenextilijtoc para yajaya tlen quimanahu'ia huan quimocuitlahu'ia. 4Tlanahuatiani tlen campa hueli itztoque ipan ni tlaltepactli mosentilijque para san sejco quitehuise nopa altepetl. 5Pero quema quiitaj ajqueya quimocuitlahu'ia nopa altepetl huan para nel'ia hueyi ichicahualis, momajmat'iaj. Huan nimantzi cholojtehuaj huan mocuepaj campa hualajtoque. 6Quena, quinitzqu'ia se majmajtli huan nel'ia tlaijiyohu'iaj, queja se sihuatl quema conepiya, 7o queja se ajacatl chicahuac tlen quinxolehua nopa huejhueyi barcos tlen hualahuij tlali Tarsis. 8Ipa tijcactoque quejatza TOTECO quimocuitlahu'ia ialtepe, huan ama tiquitztoque. Quena, TOTECO Tlen Quinyacana Ielhuicac Ejcahua Ma Tlatehuitij, quitlalijtoc para ialtepe Jerusal'en ma huejcahuas para nochipa. 9Toteco Dios, quema tiitztoque ipan motiopa, tiquilnamiquij huan timoyolilhu'iaj quejatza titechicnel'ia. 10Toteco, campa hueli tlacame mitzpaquilismacaj, pampa quicactoque quejatza mohueyitilis. Quicactoque hasta campa ontlami tlaltepactli. Huan quimatij para ica mohueyi chicahualis titetlajtolsencahua xitlahuac. 11Huajca ma paquica nopa tlacame ipan tepetl Sion. Ma huitonica ica paquilistli nochi tlen ehuaj ipan altepetini tlen tlali Jud'a pampa cuali huan xitlahuac titetlajtolsencahua. 12Nochi imojuanti tlen initlacajhua Toteco Dios, xiyaca xijyahualotij nopa altepetl Jerusal'en, huan xijpohuaca quesqui tepancali huejhueyi quipiya campa soldados tlamocuitlahu'iaj. 13Xijtlachilitij nopa hueyi ichaj nopa tlanahuatijquetl, huan ximomacaca cuenta quejatza tlatzajtzactoque huan quiyejyectlalijtoque, para queja nopa huelis inquinpohuilijtiyase imoteipa ixhuihua. 14Pampa ni Toteco Dios, yajaya elis toDios para nochipa, huan ax quema tlamis ichicahualis. Yajaya techyacanas mojmostla ama huan teipa quema ya timictose noja techyacanas.

will be added

X\