Psalms 44

1Toteco Dios, tijcactoque tlachque techpohuilijtoque tohuejcapan tatahua tlen ta, huan nochi nopa tlamantli tlen tiquinchihuili huejcajquiya. 2Quena, Toteco Dios, ica mohueyi chicahualis ta tiquintojtocac nopa fiero tlacame tlen quinhueyichihuayayaj teteyome ipan nopa tlali, huan nopa tlali tiquinmacac totatahua. Quena, tiquintlatzacuilti ne sequinoc huan tiquinpalehui tohuejcapan tatahua para ma momiyaquilica, huan ma moaxcatica. 3Tohuejcapan tatahua ax quitlanque nopa tlali ica ininmachete, niyon ica ininchicahualis. Tlatlanque ica nopa hueyi chicahualistli tlen ta tijpiya ipan monejmatl, huan pampa hueyi moyolo ininhuaya, huan achi m'as tiquinicnel'ia. 4Ta tinotlanahuatijca huan tinoTeco Dios. Ta tiquinmanahu'ia huan tijchihua ma tlatlanica motlacajhua. 5Quena, ica motlapalehuil tiquintlanise tocualancaitacahua. Huan ica mochicahualis ininpan timoquejquetzase tlen techtehu'iaj. 6Pampa ax timotemach'iaj ipan tocuahuitol huan tomachete para ma timomanahuica huan titlatlanise. 7Eltoc ta, Toteco, tlen tijchihua ma tiquintlanica tocualancaitacahua. Ta tiquinpinahualtijtoc nochi tlen techcocol'iaj. 8Mojmostla timitzpaquilismacase Toteco Dios. Huan timitzhueyichihuase ica huicatl para nochipa. 9Pero amantzi eltoc queja titechtlahuelcajtoc huan titechpinahualtijtoc. Niyon ayoc tinemi ininhuaya tosoldados quema tiontlatehu'iaj. 10Tijchijqui ma ticholoca iniixpa tocualancaitacahua. Quena, inijuanti tlen techcocol'iaj techtlaxtequil'iaj huan quihuicaj nochi tlen quinequij. 11Titechtemactilijtoc queja tipilborregojtzitzi tlen san quichiyaj para quinhuicase campa quinmictise. Huan titechsemantoc campa hueli ipan sequinoc tlaltini campa quinhueyichihuaj teteyome. 12Titechnamacatoc timotlacajhua ica nelquentzi queja ax tleno topati elisqu'ia. 13Nochi tlacame ipan nopa tlaltini tlen itztoque tonechca quiitaque tlen titechchihuilijtoc. Yeca techtlaijilhu'iaj huan toca paquij. 14Tijchijtoc para inijuanti tlen quinhueyichihuaj tlaixcopincayome ma toca huetzcaca. Nochi quema techitaj, motzonhuihuixohuaj. 15Mojmostla toixpa eltoc nopa pinahualistli hasta tijnequisqu'iaj timoixtzacuase, 16pampa techtlaijilhu'iaj huan techhuetzquil'iaj nopa motlacuepilijca tlacame. Quena, techpinahualt'iaj tocualancaitacahua. 17Nochi ni tlamantli topantitoc, yonque ax timitzilcajtoque, niyon ax timoiyocacajtoque tlen nopa tlajtol sencahuali tlen tijchijqui ininhuaya tohuejcapan tatahua. 18Ax timoiyocatlalijtoque tlen ta, niyon ax tijcajtejtoque moojhui. 19Pero titechtlahuelcajtoc campa axaca itztoc, campa san itztoque tlapiyalime tlen mosisin'iaj. Titechcajtoc ipan se tzintlayohuilotl tlen eltoc queja miquistli. 20Toteco Dios, intla timitzilcajtosqu'iaj, o tijhueyichijtosqu'iaj se totlaixcopincayo, 21ta tijmajtosqu'ia, pampa ta tijmati nochi tlen ixtacatzi eltoc ipan toyolo. Pero ax tijchijtoque, Toteco. 22Pero yonque ax tleno tijchijtoque, mopampa ta tiitztoque nechca miquistli. Titechchihuil'iaj queja tipilborregojtzitzi tlen san quichiyaj ajqueya quinmictis pampa timoaxcahua. 23¡Toteco ximotlalana! ¡Amo xicochi! Amo ximoiyocatlali tlen tojuanti para nochipa. 24¿Para tlen timoixtlat'ia? Eltoc queja tiquilcajtoc para tojuanti titlaijiyohu'iaj huan miyac techcocol'iaj. 25Techmajcajtoque tlalchi. Toxayac mocahua ipan tlaltejpoctli huan ax hueli timotlalanase. 26¡Ximotlalana, Toteco! Xitechpalehuiqui. Xitechmaquixti pampa tlahuel titechicnel'ia.

will be added

X\