Psalms 42

1Queja se masatl tlen tlahuel amiqui quitemojtinemi se atlajtli para atlis, queja nopa na nimitzyoltemohua, noTeco Dios. 2Quena, queja se tlen tlahuel amiqui, na ipan noyolo nimitznequi Toteco, ta tlen nelnel'ia tiitztoc. ¿Hasta quema huelis niyas huan nimonextis moixpa? 3Yohuali huan tonali nichoca huan ax nitlacua. Nocualancaitacahua ajachica nechtlatzintoquil'iaj: "¿Canque itztoc moDios? ¿Para tlen ax mitzpalehu'ia?" Queja nopa nechilhu'ia. 4Quema niquilnamiqui queja eliyaya achtohuiya nepa ipan notlal, eltoc queja atiya noyolo. Niyohuiyaya ininhuaya miyac tlacame hasta ichaj Toteco Dios. Na niquinyacanayaya nochi tlacame hasta ichaj ipan nopa hueyi ilhuitl. Titzajtzitiyohuiyayaj ica paquilistli, huan tijtlascamatiyayaj Toteco Dios pampa para ya tiilhuichihuayayaj. 5Huajca nimoilhu'ia: Ax monequi nimocuesos. Na nimotemachijtoc ipan noTeco Dios, huan sampa nijpaquilismacas, pampa yajaya noDios huan notemaquixtijca. 6Pero noTeco, nel'ia nimocuesohua nica campa niitztoc ipan ni tlali tlen huejca. Yeca nimitzilnamiquis, huan niquilnamiquis queja tijpixqui hueyi moyolo tohuaya tlen tiehuaj ipan motlal. Niquilnamiqui nopa tlali yejyectzi tlen pehua campa motlalohua nopa atlajtli Jord'an, huan ontlami hasta campa motlalantoc nopa tepetini Herm'on huan Mizar. 7Ama ta tinechtitlanilijtoc cuesoli tlen nechijiyomict'ia. Quena, miyac cuesoli nechajsitoc queja imiyaca atl tlen huetzi tlen tepexico hasta ipan na. Caquisti queja miyac atl tlen ajcahuacatoc, huan nochi nopa atl nopan panotoc. 8Pero ica ijnaloc TOTECO nechtitlanilis iteicnelilis. Huan ica tlayohua yajaya nechmacas se huicatl para nijhueyichihuas, huan nimomaijtohua ica ya. Quena, nijnojnotza NoTeco tlen mojmostla nechmaca yolistli. 9Niquilhuis Toteco Dios: "Ipan ta nimotlat'ia huan axaca hueli nechajsis. ¿Para tlen tinechilcajtoc? Na san nimocuesojtinemi, pampa nocualancaitacahua nechtlaijiyohuilt'iaj. 10Tlen nocualancaitacahua nechchihuil'iaj nechcocohua hasta ajsi ipan noomiyohua, pampa nechtlaijilhu'iaj huan nechtlatzintoquil'iaj ajachica: '¿Canque itztoc moDios? ¿Para tlen ax mitzpalehu'ia?' " 11Pero ax monequi nimocuesolmacas, niyon nimocuesos. Na nimotemachijtoc ipan noTeco Dios, huan teipa sampa nijpaquilismacas pampa yajaya noDios huan noTemaquixtijca.

will be added

X\