Psalms 39

1Nimoilhuijtoya para nimomocuitlahuisqu'ia miyac para ax nijchihuasqu'ia tlen ax cuali. Niquijtojtoya para nijmocuitlahuisqu'ia nonenepil huan notlajtol para ax nitlajtlacolchihuas ica tlen niquijtohua. Quena, ax tleno niquijtos quema niitztos iniixpa ax cuajcualme. 2Huajca nimochijqui queja se ninono. Ax tleno niquijtohuayaya, niyon tlen cuali, niyon tlen ax cuali. Huan pampa nicajcoctoya nochi tlen nijmatiyaya ipan noyolo, noja m'as nitlaijiyohuiyaya. 3Hasta nijmatiyaya queja noyolo tlatlayaya. Huan quema san ya nopa nimosenilhuijtoya, nijmatiyaya queja se tlitl lemeniyaya ipan noyolo. Huajca ayoc niquijiyohui huan nicamatqui chicahuac, huan niquilhui TOTECO: 4"TOTECO, xinechnextili quesqui tonali niitztos huan quema nimiquis. Nijmati nelquentzi tonali niyoltos nica. 5Tinechmacatoc se yolistli tlen ax miyac xihuitl. Huan nochi xihuitl tlen niyoltos elis san se tlalochtli moixpa, pampa ta nochipa tiitztoc. Nochi tlacame polijtehuaj nimantzi san queja ixpolihui iniijiyo quema tlaijiyotilanaj. 6Nochi tlacame panotehuaj queja se ecahuilotl. San tlapic nochi inintequi. Yonque quimiyaquil'iaj tlamantli tlen ipati, ax quimatij ajqueya iaxca elis teipa. 7Huajca, noTeco, ax tleno onca tlen ipan huelis nimotemachis. Nimochiyas san ipan ta. 8Xinechmaquixti tlen notlajtlacolhua. Amo xiquincahuili tlacame tlen huihuitique ma noca paquica ica tlen nijchijtoc. 9Nimocamatzacuas moixpa huan ayoc nimolinis ica tlen nopanti, pampa ta tinechtlatzacuilt'ia. 10Pero noTeco, ayoc xinechtlatzacuilti. Nijmati nimiquis pampa tinechpanajsitoc. 11Quema se tlacatl tlajtlacolchihua, ta tijtlatzacuilt'ia. Nopa tlamantli tlen m'as quiicnel'ia, tiquixpolihuilt'ia queja mejtolime quitlamicualolt'iaj toyoyo. Niyon se tlacatl ax quipiya chicahualistli. Nochi itztoque san queja se ajacatl tlen ica se tlalochtli panotehuaj. 12NoTeco, xinechtlacaquili quema nimomaijtos. Xinechtlacaquili quema nimitztzajtzil'ia. Amo san xitlachixto quema nimochoquil'ia, xinechpalehuiqui. Queja nochi nohuejcapan tatahua, san niitztos nica se tlalochtli. Queja niehuasqu'ia seyoc altepetl huan san nipanosqu'ia, ax nihuejcahuas nica. 13Ayoc xinechtlatzacuilti. Xinechcahuili sampa ma nijpiyas fuerza huan se quentzi paquilistli pampa se tonal nimiquis huan ayoc niitztos nica."

will be added

X\