Psalms 36

1Nijpixtoc ipan noyolo tlen nijnequi niteyolmelahuas tlen inintlajtlacol ax cuajcualme. Ax cuajcualme quiilcahuaj Toteco Dios huan ax quiimacasij. 2Mohueyimatij ica ininselti hasta moilhu'iaj yajaya ax hueli quichihuas cuenta nochi tlen fiero quichijtinemij, huan yeca ax quintlatzacuiltis. 3Quisa inincamaco senquistoc tlen fiero huan tlen ax melahuac. Quipolojtoque inintlalnamiquilis, huan ayoc quichihuaj tlen cuali. 4Quema motecaj ipan inintlapech para cochise, san quisencahuaj tlachque tlajtlacoli quichihuase. Moneltlatzquilijtoque ipan iniojhui tlen fiero huan san tlen ax cuali quinequij. 5TOTECO, motlasojtlacayo quinajsi nochi tlacame huan onajsi hasta elhuicac huan hasta campa mixtli. Nel'ia titemachtli. 6Tiitztoc tlahuel tixitlahuac huan ax quema timopatla. Tiitztoc temachtli queja nopa huejhueyi tepetini campa tlahuel tlahuejcapa. Nelxitlahuac titetlajtolsencahua, huan ax hueli tijmachil'iaj motlanejnehuilis, pampa eltoc queja nopa hueyi atl tlen onpano huejcatla. ¡TOTECO! Ta san se tiquinmocuitlahu'ia queja tlacame huan tecuanime. 7Toteco Dios, nel'ia yejyectzi moteicnelilis tlen ax quema techcahua. Yeca tlacame tlen quipiyaj tlanahuatili huan tlen teicneltzitzi monechcahu'iaj campa ta para xiquinmanahui. Quena, mochihuaj queja pilpiyotzitzi tlen calaquij ieltlapaltzala ininnana. 8Tlacame tlen mitztemohuaj ixhuij cuali ica nopa tlatiochihualistli tlen tiquinmaca nepa mochaj. Eltoc queja se hueyi tlacualistli tlen titechtencahuil'ia toixtla. Titechcahuil'ia ma tiatlica ipan nopa atlajtli tlen temaca ajhuiyac atl. Quena, nochi tlen tijtlajtlan'iaj titechmaca. 9Pampa ta titechmaca yolistli nochi tlen tiitztoque, huan pampa titechmaca tlahuili, tojuanti tihuelij titlachiyaj. 10Nimitztlajtlan'ia para mojmostla xitechicneli tojuanti tlen timitzixmatij. Nochipa titechchihuil'ia tlen xitlahuac nochi tojuanti tlen ipan toyolo tijnequij tijchihuase tlen cuali. 11Amo xijcahua para ma nopan moquejquetzaca inijuanti tlen mohueyimatij. Niyon amo xiquincahuili ma nechtojtocaca ax cuajcualme. 12Se tonal niquijtos: ¡Xiquitaca quejatza ama huetztoque nochi tlajtlacolchijca tlacame tlen mosisin'iaj! Toteco Dios quinhuetziltijtoc para ayoc huelise motlalanase.

will be added

X\