Psalms 34

1Nijtlascamatis TOTECO ajachica huan nochipa nijsenpaquilismacatos. 2Nijhueyitlalis huan niquinilhuis nochi tlacame tlen yajaya nechchihuilijtoc. Inijuanti tlen teicneltzitzi quicaquise huan paquise. 3Ma tijhueyichihuaca huan ma tijhueyitlalica TOTECO san sejco. 4Nijtzajtzili TOTECO ma nechpalehuiqui, huan yajaya nechtlacaquili huan nechmanahui tlen nochi tlen nechmajmatiyaya. 5Sequinoc tlen motemach'iaj ipan Toteco ixcahuanij ica paquilistli nojquiya, ipampa tlen yajaya quinchihuilijtoc. Ax quema pinahuase. 6Yonque nipilteicneltzi, nijtzajtzili TOTECO, huan yajaya nechmaquixti ica nochi tlamantli tlen nechcuesohuayaya. 7Ielhuicac ejca TOTECO quinmocuitlahu'ia nochi tlen quiimacasij TOTECO, huan yajaya quinmanahu'ia. 8Xijyejyecoca TOTECO huan inquiitase para melahuac cuali iyolo tohuaya. Hueyi paquilistli quipiyaj nochi tlacame tlen ipan ya motemach'iaj. 9Nochi imojuanti tlen iniaxcahua TOTECO, xiquimacasica, pampa nochi tlen quitlepanitaj ax tleno quinpolohua. 10Nopa tecuanime tlen m'as quipiyaj chicahualistli quemantzi mayantinemij huan ax quipant'iaj tlen quicuase, pero tlacame tlen quitemohuaj TOTECO quipiyase nochi tlen cuali. 11Xihualaca noconehua, huan xinechtlacaquilica, huan nimechmachtis quejatza monequi inquitlepanitase TOTECO, huan inquiimacasise inquiixpanose. 12¿Tijnequi tiitztos ica yejyectzi? ¿Tijnequi tihuejcahuas ipan ni tlaltepactli, huan tiquitas tlen cuali? 13Monequi xijmocuitlahuis monenepil para ax tiquinmahuispolos sequinoc ica istlacatili. 14Ximoiyocatlali ica tlen ax cuali, huan xijchihua san tlen xitlahuac. Xijchihuaca tlen inhuelij para ma oncas tlasejseltili ininhuaya nochi tlacame. Quena, ya nopa xijtemoca ica nochi imoyolo. 15TOTECO quintlachil'ia tlen nemij xitlahuac iixpa, huan san quichiya para quinmacas tlen quitlajtlanise. 16Pero TOTECO sencualantoc ica inijuanti tlen quichihuaj tlen fiero. Quintzontlamiltis para ma axaca quinilnamiquis ipan ni tlaltepactli. 17Quema tlacame tlen itztoque xitlahuaque iixpa TOTECO quitzajtzil'iaj, yajaya quintlacaquil'ia. Huan quinmanahu'ia tlen nochi inincuesolhua. 18TOTECO itztoc ininnechca tlacame tlen mocuesohuaj. Huan quinmaquixt'ia tlen mocuesohuaj ica inintlajtlacolhua. 19Se tlacatl tlen itztoc xitlahuac iixpa TOTECO quipiya miyac cuesoli, pero TOTECO quimanahu'ia ica nochi tlen ipanti. 20Pampa TOTECO quimocuitlahu'ia para ax postequis niyon se iomiyo. 21Se tlacatl tlen fiero iyolis miquis ipampa nopa tlamantli fiero tlen quichihua. Quena, TOTECO quintlalilis tlatzacuiltili tlen quicocol'iaj tlen cuali. 22TOTECO quinmaquixt'ia itlatequipanojcahua. Quena, quintlapojpolhu'ia itlacajhua tlen motemach'iaj ipan ya.

will be added

X\