Psalms 33

1Xihuicaca ica paquilistli para TOTECO imojuanti tlen initztoque xitlahuac iixpa. Nel'ia yejyectzi para nochi tojuanti tlen tijchijtinemij tlen cuali ma tijhueyichihuaca. 2Xitlatzotzonaca ica arpa para xijhueyichihuaca, TOTECO. Xihuicaca iixpa huan xijpaquilismacaca ica tlatzotzonali tlen nesi queja guitarra. 3Xijsencahuaca se huicatl tlen yancuic, huan xijhuicatica TOTECO. Xitlatzotzonaca cuali, huan xitzajtzica ica paquilistli. 4Pampa nel'ia xitlahuac nochi tlen quiijtohua TOTECO. Nochi tlen quichihua tenextil'ia para temachtli. 5TOTECO quipact'ia nochi tlen xitlahuac huan tlen melahuac. Nochi tlen itztoque ipan tlaltepactli quisel'iaj iteicnelilis TOTECO. 6TOTECO tlanahuati ma onca elhuicactli huan mochijqui. San camatqui huan mochijqui metztli, tonati huan nochi sitlalime. 7Yajaya quisejcotili nochi atl tlen eltoc ipan hueyi atl. Quiajcojqui nopa atl campa m'as tlahuejcatla. 8Nochi intlaltepac ehuani xijhueyitlepanitaca TOTECO. Quena, nochi tlen initztoque ipan ni tlaltepactli xiquimacasica. 9Pampa nochi tlen yajaya quiijto, ya nopa mochijqui. Huan tlen yajaya tlanahuati ma eli, ya nopa elqui. 10TOTECO quinxolehuil'ia inintlalnamiquilis tlacame ipan campa hueli tlaltini para ma ax quichihuaca tlen fiero moilhuijtoque. San tlailpitzas huan quincuapolos tlaltini para ax huelise quichihuase tlen fiero quisencajtoque quichihuase. 11Pero tlen TOTECO moilhuijtoc quichihuas ax quema mopatlas. Tlen ya quinequi, ya nopa elis para nochipa. 12Paquij tlacame ipan nopa tlali tlen motemach'iaj ipan TOTECO. Quena, nel'ia paquij nopa tlacame tlen TOTECO quintlapejpenijtoc para iaxcahua. 13TOTECO tlen itztoc nepa elhuicac techhualtlachilijtoc nochi titlacame. 14Hasta nepa ipan elhuicac TOTECO techtlachilijtoc tlen tiitztoque ipan ni tlaltepactli. 15Yajaya TOTECO tlen techyolchijchijqui nochi titlaltepac ehuani huan techtlachil'ia nochi tlen tijchijtinemij. 16Se hueyi tlanahuatijquetl ax tlatlani pampa quinpiya miyac isoldados. Niyon se soldado tlen motemaca ax tlatlani pampa quipiya miyac fuerza. 17Amo ximotemachi ipan se cahuayo para mitzmanahuis yonque nel'ia tetic. San ica ifuerza ax hueli temanahu'ia. 18Pero TOTECO, quena, yajaya nochipa techtlachilijtoc tojuanti tlen tiquimacasij tiquixpanose. Techmocuitlahu'ia tlen timochiyaj ipan iteicnelilis. 19Techmanahu'ia quema tiitztoque nechca miquistli. Huan techtlamacas quema oncas mayantli para noja ma tiitztoca. 20Tojuanti ipan toyoltzi timotemach'iaj ipan TOTECO. Yajaya techpalehu'ia huan techmanahu'ia ica tlen ax cuali. 21Yeca ma tiyolpaquica ipan TOTECO, pampa timoneltemachijtoque ipan yajaya tlen nel'ia tlatzejtzeloltic. 22TOTECO, xijpiya moyolo tohuaya, pampa san ipan ta timochiyaj.

will be added

X\