Psalms 32

1Nel'ia paqui nopa tlacatl tlen TOTECO quitlapojpolhuijtoc itlajtlacolhua huan quiixpolojtoc nochi itlaixpanolhua. 2Quipiya paquilistli tlen ya quipohuilijtoc TOTECO itlajtlacolhua, huan ayoc quitlajtlacolt'ia ica niyon se tlamantli. Ipan iyolo ayoc mocajcayahua queja ax tleno quichijtoc. 3Quema aya nijpohuilijtoya TOTECO queja nitlajtlacolchijtoya, semilhuitl nitlaijiyohuiyaya hasta nijmatqui para tlantoya nochicahualis. 4Tinechtlatzacuiltiyaya tonaya huan tlayohua. Tinechtlatzacuilti hasta nijmatiyaya nicuahuaquiyaya queja soquiatl huaqui quema chicahuac tlatotoniya. 5Pero teipa nimitzpohuili nochi notlajtlacolhua huan niyon se ax nijtlati. Nimotemacac nimitzpohuilis nochi notlaixpanolhua huan ta, TOTECO, nochi tinechtlapojpolhui, huan tinechquixtili nopa tlaeticayotl. 6Monequi para nochi tlen moaxcahua mitztemose quema itztoque ipan cuesoli. Monequi motemachise ipan ta, huan yonque cuesoli momiyaquilis queja se atlajtli tlen chicahuac mixcuepa, ax quinajsis. 7TOTECO, ipan ta nimotemach'ia quema onca cuesoli, huan ta tinechmocuitlahu'ia. Tijchijtoc para sequinoc ma nechyahualoca, huan inijuanti huicaj chicahuac para mitzhueyichihuase pampa tinechmanahuijtoc. 8TOTECO quiijtohua: "Na nimitztlalnamictis huan nimitznextilis nopa ojtli tlen m'as cuali, tlen monequi ipan timonejnemiltis. Na nimitzconsejomacas huan nimitztlachilijtos. 9Amo ximochihua queja se cahuayo, o se mula tlen ax quipiya tlalnamiquistli, tlen monequi tijtlalilis se tepos camachali ica se mecatl huan tijtilanas para ma mitzneltocas." 10Ax cuajcualme quipantise miyac tlaijiyohuilistli, pero tojuanti tlen timotemach'iaj ipan TOTECO, yajaya techyahualohua ica iteicnelilis. 11Xipaquica ipan TOTECO, imojuanti tlen initztoque xitlahuaque iixpa. Imojuanti tlen inquineltoquil'iaj, xitzajtzica ica paquilistli ipampa tlen TOTECO quichijtoc.

will be added

X\