Psalms 31

1TOTECO, ipan ta nimotemachijtoc. Ax quema xiquincahuili sequinoc ma nechpinahualtica. Xinechmanahui ta tlen nochipa tijchihua tlen xitlahuac. 2TOTECO, ximotzonpilo huan xinechtlacaquili. Xinechmanahuiqui nimantzi. Xinechcahuili ma nimotlati mopan ta. Na niitztos momaco para tinechmanahuis. 3Ipan ta nimotemach'ia para tinechpalehuis. Quena, ipan ta niitztoc ica temachili. Tinechyacantiyas para nochi ma mitzhueyitlalica m'as. 4Ta tinotlamocuitlahuijca, xinechmaquixti tlen ni tlaquetztli tlen nocualancaitacahua quitlatijtoque ipan noojhui para nechmasiltise. 5Nimitzmactil'ia notonal momaco. Xinechmanahui, TOTECO, ta tlen tieli nopa Dios tlen titemachtli. 6Niquincocol'ia nochi tlen quinhueyichihuaj teteyome, pampa teteyome ax tleno hueli quichihuaj. Pero na nimotemachijtoc ipan ta, TOTECO. 7Nijpiya miyac paquilistli pampa tinechicnel'ia. Ta tiquitztoc nochi nocuesol, tiquixmajtoc nochi tlen nopantitoc. 8Amo xinechtemactili ininmaco nocualancaitacahua. ¡Axtle! Campa tinechquetzqui eli tlacualca huan temachtli. 9TOTECO, xinechtlasojtla pampa niitztoc ipan cuesoli. Nisenchocatoc hasta nijmati tlantiyohuij noixtiyolhua. Ipan noyolo huan notlacayo nijmati nitlamitlaijiyohuijtoc ica cuesoli. 10Ni tlacuajcualocayotl nechtzontlamilt'ia pampa san cuesoli nijmati. Sesen xihuitl tlen pano san niayijt'ia. Ya tlantinemi nochicahualis ipampa notlajtlacolhua hasta ya nitlacayohuactinemi. 11Nocualancaitacahua huan hasta nocalnechcahua nechijiyaj. Tlen nechixmatij nechimacasij. Tlen nechitaj ojtipa nechtlalcahu'iaj. 12Nochi tlacame nechilcajtoque queja ya nimictosqu'ia. Nechtlahuelcajtoque queja se chachapal tepalcatl ipan tlasoli. 13Nijcaqui quejatza nocualancaitacahua nechistlacahu'iaj. Yeca nechitzquitoc se hueyi majmajtli huan nechmajmat'ia. Inijuanti san sejco moijilhu'iaj quejatza huelise nechmictise. 14Pero TOTECO, na nimotemach'ia ipan ta huan niquijtohua: "¡Taja tinoDios!" 15Sesen tonali tlen niitztoc momaco eltoc. Xinechmanahui ininmaco nocualancaitacahua tlen nechtlaijiyohuiltijtinemij. 16TOTECO, ma monextis moteicnelijcayo ipan moxayac quema tinechtlachil'ia na, nimotlatequipanojca. Xinechmaquixti pampa ta tinechsenicnelijtoc. 17TOTECO, na nimitztemojtoc. Amo xiquincahuili para ma nechpinahualtica. Xiquinpinahualti tlacame tlen ax cuajcualme. Quena, inijuanti mocamatzacuase quema tiquintzontlamiltis. 18TOTECO, ayoc molinis ininnenepil inijuanti tlen istlacatij quema ya mictose. Ayoc itztose inijuanti tlen mohueyimatij quema camatij para techtlaijilhuise tojuanti tlen tinemij xitlahuac moixpa. Quena, xiquinmicti tlen mohueyitlal'iaj huan techmahuispolohuaj. 19Pero ta, nel'ia hueyi moyolo ica inijuanti tlen mitztlepanitaj huan tiquinmocuitlahu'ia. Nel'ia cuali moteicnelilis tlen ticajcoctoc para tojuanti tlen timotemachijtoque ipan ta, tojuanti tlen tlamiyacapa titematiltijtoque para san ta tihueli titechmanahuis. 20TOTECO, ta techtlat'ia campa ixtacatzi tojuanti tlen timitztlepanitaj, huan nepa ta timocahua tohuaya. Yeca fiero tlacame ax huelij techajsise ica tlen quisencajtoque. Quena, momaco titechtlat'ia huan axaca tlen techmahuispolohua hueli techajsis. 21Nimitztlascamati, TOTECO, pampa tijchijqui huejhueyi tlamantli para tinechnextilis moteicnelijcayo. Ica temachili tinechyahualojtoc para tinechmanahuis tlen nocualancaitacahua. 22TOTECO, nimoilhuijtiquisqui para tinechtlahuelcajtoya. ¡Pero ax neli! Tijcajqui quema nimitztzajtzili xinechpalehuiqui, huan tinechnanquili. 23Nochi imojuanti tlen iniaxcahua TOTECO, xiquicnelica pampa yajaya quinmocuitlahu'ia tlen itztoque temachme. Pero ica tlacame tlen mohueyimatij, TOTECO quintlaxtlahu'ia hasta ica itlapanca nochi tlen ax cuali quichijtoque. 24Nochi imojuanti tlen inmotemach'iaj ipan TOTECO, xipaquica huan ximotemachica.

will be added

X\