Psalms 28

1TOTECO, tinotlamanahuijca. San ipan ta nimotlat'ia. Ta tlen nimitztzajtzil'ia xinechpalehuiqui. Amo ximotlahuelnequi para tinechnanquilis, pampa intla ax tinechnanquilis, san nimotemacas para ma nechmictica. 2Xijcaqui notlajtol quema nimitztlajtlan'ia tlapalehuili. Xinechchihuili cuenta quema nimomatlalanas huan nijmelactlachilis mocaltiopa tlen tlahuel tlatzejtzeloltic. 3Amo xinechtlatzacuilti ininhuaya tlacame tlen ax cuajcualme tlen san quichihuaj tlen ax monequi. Inijuanti camatij yejyectzi ica sequinoc, pero quipiyaj nochi tlen ax cuali ipan ininyolo. 4Xiquincuepili nochi tlen ax cuali quichijtoque ica tlen ax cuali nojquiya. Xiquintlaxtlahui ica tlen fiero san se queja fiero quinchihuilijtoque sequinoc. 5TOTECO, inijuanti ax quichihuil'iaj cuenta nochi tlen tijchijtoc, huajca tiquintzontlamiltis huan ax quema tiquintlalanas sampa. 6TOTECO, nimitzpaquilismacas pampa tijtlacaquilijtoc tlen nimitztlajtlanijtoc. 7TOTECO, yajaya nochicahualis huan notlamanahuijca ica nochi tlen mahuilili. Ipan ya nimoneltemachijtoc huan nechpalehuijtoc, yeca ipan noyolo nijpiya miyac paquilistli. Nihuicas huan nimitztlascamatis, TOTECO. 8TOTECO, ta tiquinpixtoc momaco nochi motlacajhua. Yeca san ipan ta motemach'ia motlanahuatijca tlen tijtlapejpenijtoc. 9Xijmaquixti moaltepe, TOTECO. Huan xiquintiochihua inijuanti tlen moaxcahua. Xitechmocuitlahui queja se quinmocuitlahu'ia ipilborregojhua. Xitechhuica momaco para nochipa.

will be added

X\