Psalms 21

1¡TOTECO! Na nitlanahuatijquetl, nipaqui pampa tinechfuerzajmacatoc. Nel'ia nipaqui pampa tijchijtoc ma nitlatlani. 2Tinechmacatoc tlen noyolo quinequiyaya. Quena, tinechmactili tlen nimitztlajtlaniyaya. 3Tinechsehui nitlanahuatijquetl ica miyac tlatiochihualistli, huan tinechicpahuiltijtoc se tepos cuayohuali tlen senquistoc oro. 4Nimitztlajtlani xinechcahuili ma huejcahuas niitztos, huan nel'ia tinechmacatoc se yolistli tlen huejcahuas para nochipa. 5Tinechpalehuijtoc ma nitlatlani miyac ica mohueyi chicahualis. Huan yeca mopampa ta, nochi nechhueyitlepanitaj, na nitlanahuatijquetl, huan nechhueyitlal'iaj. 6Tinechtiochijtoc ica tlen huejcahuas para nochipa, huan nelhueyi nopa paquilistli tlen nijpiya pampa timocahua nohuaya. 7Na nitlanahuatijquetl nimotemach'ia ipan ta, TOTECO. Quena, nimotemach'ia ipan mohueyi teicnelilis ta Tlen M'as tiHueyi, yeca axaca huelis nechtlanis. 8TOTECO, ica mochicahualis tiquinajsiti nochi mocualancaitacahua. Ica monejmatl tiquinitzquis nochi tlen mitzcocol'iaj. 9Quema timonextis, inijuanti tlatlase moixtla queja itztosqu'iaj ipan se horno tlen xahuantoc. TOTECO, quema tiquintlajtolsencahuas, mocualancayo quintlamitlatis. 10Tiquintzontlamiltis hasta ininconehua huan iniixhuihua. 11Yonque tlacame tlen ax cuajcualme mitzcocol'iaj huan quisencahuaj tlen ax cuali mitzchihuilise, ax quisas cuali tlen moilhuijtoque. 12Inijuanti moicancuepase para cholojtehuase quema quiitase para tiquinmelactlachilis ica mocuahuitol tlasencahuali para tiquintehuis. 13Timitzhueyimatij, TOTECO, pampa hueyi mochicahualis. Huan timitzhueyichihuase ica huicatl pampa nel'ia tijpiya nochi chicahualistli.

will be added

X\