Psalms 19

1Elhuicactli tepohuil'ia ihueyitilis Toteco Dios. Tlanempa technextil'ia tlen nelpano yejyectzi tlen yajaya hueli quisencahua. 2Quena, tonali huan yohuali elhuicactli quisenhuiquil'ia tepohuil'ia para tlahuel hueyi itlalnamiquilis. 3Yonque ax tleno caquisti huan ax tijcaquij niyon se tlajtoli, nochi tlacame campa hueli quiitaj iyejyejca elhuicactli huan quimachil'iaj tlen techpohuil'ia. 4Eltoc queja elhuicactli quipiya itos tlen ajsi hasta campa ontlantoc tlaltepactli, huan teyolmelahua para itztoc Toteco Dios. Ipan elhuicactli yajaya quiquetzqui ichaj tonati. 5Huan tonati quisa mojmostla huan yohui ipan iojhui ica paquilistli queja se telpocatl quisa ipan ichaj para mosihuajtiti. Quena, nopa tonati mochihua queja se motlalojquetl tlen paqui motlalohua pampa quimati quintlanis ne sequinoc. 6Tonati quisa elhuicactli inacastla huan quimaca huelta hasta ne seyoc inacastla. Axaca huelis motlatis para ax tonalmiquis. 7Ileyes TOTECO eltoc senquistoc cuali, huan temaca yancuic yolistli. Huelis timotemachise ipan itlajtol, pampa ya nopa quichihua ma tlalnamiqui se tlacatl tlen moicnonequi. 8Quena, itlanahuatilhua TOTECO eltoc melahuac huan xitlahuac. Quinmaca paquilistli tlacame ipan ininyolo. Quena, sesen tlamantli tlen TOTECO techilhuijtoc ma tijchihuaca eltoc queja se tlahuili tlen chicahuac. Techtlahuil'ia toojhui para tiquitase. 9Senquistoc cuali para ma tijtlepanitaca TOTECO huan ma tiquimacasica para tiquixpanose. Elis cuali para nochipa. Tlen TOTECO quiijtojtoc para ma tijchihuaca, ya nopa melahuac. Quena, ya nopa temachtli. 10Noja m'as nijpatiita que oro. Quena, noja m'as cuali que miyac oro tlen senquistoc cuali. Quema se tlacatl quisel'ia Itlajtol Toteco ipan iyolo, eltoc m'as tzopelic que se sayolnectli tlen yancuic quipatzcatoque. 11Nopa miyac tlanahuatili nechmacaj tlalnamiquistli, na niitlatequipanojca, para ma ax nitlajtlacolchihua. Tlen quitoquil'ia itlanahuatil TOTECO quitlanis miyac. 12Axaca huelis momacas cuenta tlen itlaixpanolhua sesen huelta quema quichihua tlen ax cuali. TOTECO, xinechtlapojpolhui notlajtlacolhua tlen ax nijmatiyaya intla nijchijtoya. 13Huan xinechpalehui para ax nimohueyimatis, huan ax quema ma nitlajtlacolchihuas ica nopaquilis. ¬°Axtle! Amo xijcahua tlajtlacoli ma nechnahuati. Queja nopa nielis se tlacatl tlen axaca huelis nechteilhuis ica niyon se tlamantli. Huan niitztos nitlatzejtzeloltic. 14Ma mitzpacti tlen niquijtohua huan tlen nimoilhu'ia, TOTECO, ta tinotlamanahuijca huan tinotemaquixtijca.

will be added

X\