Psalms 17

1Xinechtlacaquili, TOTECO, pampa nimitznojnotza. Nijchijtoc tlen xitlahuac, huan ax niistlacati. Xinechtlacaquili tlen nimitztlajtlan'ia huan xinechpalehui. 2Xinechtlajtolsencahua iniixtla nochi tlacame. Xiquinnextili para ax tleno nijchijtoc, pampa nochipa tijmati tlen xitlahuac. 3Yonque tijhualtlachil'ia noyolo ica yohuali huan tinechyejyecojtoc, ax tleno ax cuali tijpantijtoc. Ax niquijtojtoc tlen ax monequi, 4queja quichihuaj ne sequinoc. Na nimoiyocatlalijtoc tlen nopa iniojhui tlen ax cuajcualme. Nijchijtoc senquistoc queja quiijtohua motlanahuatil. 5Nijtoquilijtoc moojhui huan ax nihuetztoc ipan tlajtlacoli. 6Nimitznojnotza, noTeco Dios, pampa nijmati tinechnanquilis. Xinechtlacaquili huan xinechchihuili cuenta. 7Xinechnextili moteicnelijcayo tlen yejyectzi. Taja tiquinmaquixt'ia ica mochicahualis tlen motemachiyaj ipan ta. 8Xinechmocuitlahui queja se quimocuitlahu'ia iixsitlal. Queja se piyo quintlat'ia ipilconehua ieltlapaltzala, nojquiya queja nopa xinechmocuitlahui. 9Xinechtlati tlen nopa ax cuajcualme tlen nechyahualojtoque para nechmictise. 10Nel'ia mocualnequij huan quema camatij, san mohueyimatij. 11Nechtoquilijtinemij campa ninentinemi huan san quichiyaj nopa tlalochtli quema huelise nechmajcahuase tlalchi. 12Inijuanti itztoque queja tecuanime tlen tlahuel mayanaj huan quinequij tecuase, huan motlatijtoque tlacoyoijtic para quema se tlacatl panos. 13Ximotlalana, TOTECO, xiquinnamiquiti. Xiquinchihuili ma motlancuaquetzaca moixtla. Ica momachete, xinechmanahui tlen nopa ax cuajcualme. 14Ica mochicahualis, TOTECO, xinechmaquixti ininmaco inijuanti tlen san quipiyaj tlen eltoc ipan ni tlaltepactli. Tijmiyaquilijtoc tlen iniaxca nica. Nojquiya xiquinmaca miyac tlatzacuiltili hasta mocahuas para ininconehua. 15Pero na niitztoc xitlahuac moixpa, huan se tonal nimitzitas, TOTECO, huan yeca nipaqui. Se tonal quema niisas, nijpiyas nochi tlen nijtemojtinentoc, pampa niitztos monechca huan ica paquilistli timoixtlachilise.

will be added

X\