1 Xinechmocuitlahui, Toteco Dios, pampa ipan ta nimotemachijtoc para tinechmanahuis. 2 TOTECO, na nimitzilhuijtoc: "Ta tinoTeco huan axaca seyoc tlen huelis nechpalehuis." 3 Niquinicnel'ia inijuanti tlen mitzneltoquil'iaj tlen itztoque ipan nopa tlali. Inijuanti tlen nel'ia yejyectzitzi ininyolo. 4 Pero mojmostla m'as mocuesose tlacame tlen quintoquil'iaj sequinoc inintlaixcopincayohua. Na ax quema nijtencahuasqu'ia se tlacajcahualistli iniixtla inintotiotzitzi, niyon ax quema niquintocaxtisqu'ia. 5 San ta, TOTECO, nimitzpixtoc, tiitztoc nochi para na, yeca ayoc tleno nijtemos. Ta tinechmaca nochi tlen notechmonequi para niyoltos. Noyolis huan nochi tlen nijpixtoc eltoc momaco huan nijmati nel'ia temachtli. 6 Nopa mecatl tlen ica tinechyejyecohuili campa nijselijtoc, huetzqui campa nel'ia cuali tlali. Nel'ia tlayejyectzi campa tinechmacatoc. 7 Nimitzhueyichihuas, TOTECO, pampa tinechconsejomaca. Tlajco yohual tinechmaca motlalnamiquilis huan tinechnextil'ia ipan noyolo tlachque monequi nijchihuas. 8 Nochipa nimoilhu'ia tlen ta, TOTECO, huan pampa tiitztoc nonechca, ax tleno nopantis. 9 Yeca ipan noyolo nel'ia nijpiya paquilistli. Nochi notlacayo motemachijtoc ipan ta. 10 Pampa ax tijcahuas notlacayo ipan tlacoyoctli, niyon ax tijcahuas ma palani itlacayo Yajaya Tlen Tlatzejtzeloltic. 11 Xinechnextilis catl'ia ojtli quipiya yolistli. Nijpiyas hueyi paquilistli nepa campa ta tiitztoc. Quena, oncas hueyi paquili para nochipa nepa campa monejmatl.
