1 TOTECO, na nimitznotza. Ximoisihuilti xinechpalehuiqui. Xinechtlacaquili quema nimomaijtohua ica ta. 2 Xijseli notlamaijtolis queja elisqu'ia copali tlen quitlat'iaj moixtla, huan quema nimomatlalana para nimitzhueyimati, xiquita queja se tlacajcahualistli tlen nimitzmactil'ia ica tiotlac. 3 TOTECO, xinechmocuitlahui para ma ax nicamati quej hueli. Xinechpalehui para nimocamatzacuas. 4 Amo xinechcahuili nijnequis tlamantli tlen ax cuali. Amo xinechcahuili ma niquinpalehuis tlaixpanoca tlacame ica tlen quichihuaj. Ma ax niquixtoca nijcuas nopa cuali tlamantli tlen quipiyaj. 5 Quema monequi se nechtlalnamictis, xijchihua para tlen monejnemilt'iaj xitlahuac moixtla ma nechtlatzacuiltica. Ya nopa niquitasqu'ia queja se tlamantli cuali tlen nechchihuil'iaj. Intla tlacame tlen cuajcualme nechtlacahualtise, elis queja se pajtli para na. Amo xinechcahuili para nijhuejcamajcahuas inon. Pero na ajachica nimomaijtohua para ma quiselica tlatzacuiltili tlaixpanoca tlacame. 6 Quema nijchihuas para mocuamimilose inintlayacanca ipan tepexico, quicaquise notlajtol huan quipantise para nelcuali. 7 Nopa fiero tlacame quiselise tlatzacuiltili huan iniomiyohua quitepehuase ipan campa hueli tlali. 8 TOTECO, ta tlen titoTeco, na san nimitzchiya para tinechpalehuis. Ipan ta nimotemach'ia para tinechmocuitlahuis. Amo xiquincahuili ma nechmictica. 9 Xinechpalehui para ax nimasis ipan nopa tlaquetztli tlen quitlalijtoque nopa fiero tlacame. 10 Xijchihua para nopa ax cuajcualme ininseltitzi ma momasiltica ica nopa tlaquetztli tlen quisencajtoque para sequinoc. Pero na ma nipano nimalacantoc huan ax tleno ma nopanti.
