1 TOTECO, ta tinechyoltlachilijtoc huan tijmati nochi tlen na. 2 Ta cuali tijmati intla nimosehu'ia o nimoquetza. Huan quema niitztoc huejca, ta tijmati tlachque nijpixtoc ipan notlalnamiquilis. 3 Ta tinechnextil'ia nopa ojtli tlen monequi nijtoquilis, huan tinechilhu'ia canque nicalaquis huan canque nimosiyajcahuas. Sesen tlalochtli ta tijmati canque niitztoc. 4 Ta TOTECO, tijmati tlachque niquijtos hasta quema aya nicamati. 5 Ta tinechyahualojtoc pampa tiya ica noixtla huan ica noica, huan nopani tijtlal'ia moma para tinechtiochihuas. 6 Nochi ni tlamantli tlen ta tijmati nel'ia yejyectzi, huan ohui para nijneltocas. 7 Ax cana hueli nimotlatis tlen moTonaltzi. Ax cana huelis nimotlatis huan ax tiitztos nopano. 8 Intla nitlejcos hasta elhuicac para nimotlatis, ta nopano tiitztoc. Huan intla niyasqu'ia ipan nopa hueyi tlacoyoctli campa itztoque mijcatzitzi, ta nepa tiitztoc. 9 Intla nijpiyasqu'ia noeltlapal huan nipatlanisqu'ia, huan niquixcotonasqu'ia nopa hueyi atl, 10 hasta nepa tinechyacanasqu'ia ica mohueyi chicahualis. 11 Intla nijchihuasqu'ia campeca para nimotlatis ipan tzintlayohuilotl, nopa tzintlayohuilotl mocuepasqu'ia tlahuili yahualtic tlen na, pampa ta tiitztos nopano. 12 Pampa niyon nopa tzintlayohuilotl ax hueli nechtlatis moixtla, Toteco. Pampa para ta nopa yohuali tlahu'ia queja elisqu'ia tonaya. Nopa tzintlayohuilotl huan tlahuili ta tiquita san se. 13 Ta tijsencajqui sesen tlamantli tlen onca iijtic notlacayo. Huan tijmotzquilti sesen tlamantli tlen nijpiya, quema niitztoya iijtico nonana. 14 Nimitztlascamati pampa nochi tinechsencajqui ma nieli se tlamantli tlen nel'ia cuajcualtzi. Quena, nopa tequitl tlen tijchijqui quema tinechsencajqui onpano yejyectzi. San nijsentlachil'ia para nimoilhuis nochi tlen tijchijtoc ipan notlacayo. 15 Ta tijtlachiliyaya quema na nipejqui nimoscalt'ia nopano ipan iijtico nonana, nel nimotlatijtoya tlen nochi sequinoc. Quema axaca m'as quitlachiliyaya, ta tinechchijchijqui ica mohueyi yajatil, queja se tlen cuali quimati tlaxinepalohua. 16 Ta tinechitac quema aya nitlacatiyaya. Huan quema aya nitlaijiyotilanayaya, tiquixtlali quesqui tonali niitztosqu'ia. Huan sesen tonal tlen niitztosqu'ia huan tlachque nopantis, ta tiquijcuilo ipan molibro. 17 Toteco Dios, nel'ia yejyectzi quema nimomaca cuenta para ta tijsenhuiquil'ia timoyolilhu'ia tlen na. 18 Hasta ax hueli nijpohua quesqui huelta timoyolilhu'ia tlen na ipan se tonali. Huan ica ijnaloc quema niisa, ta noja timoyolilhuijtoc tlen na. 19 Toteco Dios, nel'ia elisqu'ia cuali intla tiquintzontlamiltisqu'ia nochi tlacame tlen ax mitztlepanitaj. Xijchihua ma nechtlalcahuica nopa temictiani, 20 pampa inijuanti mitztlaijilhu'iaj, huan san quiahuilmatij motoca. 21 TOTECO, ¿ax tiquita para quinamiqui ma niquincocoli inijuanti tlen mitzcocol'iaj? ¿Ax quinamiqui nicualanis ica mocualancaitacahua? 22 Quena, tlahuel niquincocol'ia, pampa niquinita queja nojquiya elisqu'iaj nocualancaitacahua na. 23 NoTeco Dios, xijtlachili noyolo huan xiquita nochi tlen eltoc nopano. Huan xijyejyeco notlalnamiquilis para tiquitas intla xitlahuac tlen nimoilhu'ia. 24 Xinechnextili intla onca ipan notlalnamiquilis se tlalnamiquistli tlen ax mitzpact'ia, huan xinechyacantiya ipan nopa ojtli tlen tehuica campa onca yolistli para nochipa.
