1 Ica nochi noyolo nimitztlascamatis, TOTECO, huan nihuicas para ta iniixtla nopa moelhuicac ejcahua. 2 Nimotlancuaquetza iixmelac motiopa tlen tlatzejtzeloltic, huan nimitztlascamatis pampa nel'ia titetlasojtla huan titemachtli. Nochi tlen tinechtlajtolcahuilijtoc para tijchihuas, tijtlamichihuas pampa motlajtol nel'ia temachtli queja ta titemachtli. 3 Quema nimitztzajtzil'ia, ta tinechnanquil'ia huan tinechfuerzajmaca. 4 TOTECO, nochi tlanahuatiani tlen itztoque ipan ni tlaltepactli mitztlascamatise, pampa nochi inijuanti quicaquise tlen tijtlajtolcajtoc. 5 Quena, huicase ipampa nochi nopa huejhueyi tlamantli tlen quichijtoc TOTECO, pampa ihueyitilis nelhueyi. 6 Yonque TOTECO tlahuel hueyi, yajaya quintlacaquil'ia tlen moicnonequij. Pero tlen mohueyimatij, monequi moquetzase huejca tlen Toteco, pampa yajaya ax quinequi quinitas. 7 Intla niitztoc ipan tlaijiyohuilistli, ta TOTECO, tinechmanahu'ia huan tinechmaquixt'ia. Huan quema nechtehu'iaj nocualancaitacahua, ta tijxitlahua moma huan tinechmaquixt'ia ica mohueyi chicahualis. 8 TOTECO, ta tijchihuas nochi tlen timoilhuijtoc para tijchihuas ipan na noyolis. Pampa nopa teicnelijcayotl tlen tijpiya ica na, TOTECO, ax quema tlami. Amo xinechtlahuelcahua pampa ta tinechchijchijqui.
