1 ¡Xijpaquilismacaca TOTECO! Quena, xijpaquilismacaca nochi imojuanti inintlatequipanojcahua. 2 Xijpaquilismacaca nochi imojuanti tlen initztoque ipan ichaj TOTECO huan tlen innentinemij icalixpa. 3 Xijpaquilismacaca TOTECO pampa yajaya nel'ia cuali. Xijhuicatica ica tiohuicatl pampa yajaya hueyi iyolo. 4 Pampa TOTECO quitlapejpenijtoc Jacob para quiicnelis. Quintlapejpeni nochi iixhuihua ma elica iaxcahua. 5 Na nijmati para TOTECO tlahuel hueyi. Nijmati para yajaya tlahuel m'as hueyi que nochi tlen quintocaxt'iaj "tiotzitzi". 6 TOTECO quichihua nochi tlen quinequi quichihuas ipan elhuicactli, tlaltepactli, huan ipan hueyi atl huan campa m'as huejcatla. 7 Quichihua para ipan nochi tlaltepactli ma motlalana mixtli, huan nojquiya quititlani tlapetlanilotl huan quichihua ma tlaahuetzi. Yajaya quinahuat'ia ma quisa nopa ajacatl tlen campa quiajcojtoc. 8 Quichijqui ma miqui nopa achtohui ejquetl ipan sesen familia tlen tlali Egipto, huan nopa achtohui ejquetl tlen inintlapiyalhua. 9 Quichijqui huejhueyi chicahualnescayotl ipan tlali Egipto iixtla Fara'on huan itlatequipanojcahua. 10 Quintzontlamilti miyac tlacame ipan miyac tlaltini. Quinmicti tlanahuatiani tlen quipiyayayaj miyac chicahualistli. 11 Quimicti Seh'on tlen eliyaya inintlanahuatijca nopa amorreos. Nojquiya quimicti Og tlanahuatijquetl tlen tlali Bas'an huan nochi nopa tlanahuatiani ipan tlali Cana'an. 12 Huan nochi nopa tlali tlen quinahuatiyayaj nopa tlanahuatiani quincuili, huan quinmacac nopa tlaltini nopa israelitame queja elisqu'ia se tlamantli tlen inintata quincahuilijtejqui. 13 TOTECO, tlacame mitzilnamictose para nochipa. Nochi tlacame tlen tlacajtiyase mitzixmajtose para tlahuel tihueyi. 14 Pampa TOTECO quintlajtolsencahuas xitlahuac nochi itlacajhua, huan yajaya quintlasojtlas itlatequipanojcahua. 15 Nopa tlacame tlen itztoque ipan tlaltini tlen ax quiixmatij Toteco, quinhueyichihuaj teteyome tlen oro huan plata tlen quinchijchijtoque ica ininma. 16 Nopa teteyome quipiyaj inincamac, pero ax camatij, quipiyaj iniixtiyol, pero ax tlachiyaj. 17 Quipiyaj ininnacas, pero ax tlacaquij, huan nojquiya ax hueli tlaijiyotilanaj. 18 Nopa tlacame tlen quinchijchihuaj nopa teteyome nel'ia huihuitique, san se queja nopa teteyome, huan san se huihuitique tlen ininpan motemach'iaj. 19 ¡Inisraelitame, xijpaquilismacaca, TOTECO! Imojuanti intotajtzitzi tlen iniixhuihua Aar'on, xijpaquilismacaca TOTECO. 20 Iniixhuihua Lev'i, xijpaquilismacaca TOTECO. Huan nochi imojuanti tlen inquiimacasij huan inquitlepanitaj TOTECO, xijpaquilismacaca. 21 Nochi tlacame ipan altepetl Jerusal'en ma quipaquilismacaca TOTECO pampa yajaya itztoc nica ipan altepetl Jerusal'en. ¡Paquilistli!
