Psalms 124

1Nochi israelitame ma quiijtoca tlachque tijchijtosqu'iaj intla TOTECO ax itztosqu'ia tohuaya huan ax techpalehuijtosqu'ia. 2Intla TOTECO ax itztosqu'ia tohuaya quema nopa tlacame motlalanque para techtehuise, 3techtolojtosqu'iaj tiyoltoque huan techtzontlamiltijtosqu'iaj ica ininhueyi cualancayo. 4Inijuanti techhuahuatatztosqu'iaj queja atl tlatilana, huan huajca eltosqu'ia queja atemitl panotosqu'ia topani. 5Quena, eltosqu'ia queja topani panotosqu'ia se tlahuelatl tlen tetetztic, tlen tehuahuatatza huan titzonpolijtosqu'iaj. 6Ma tijtlascamatica TOTECO pampa ax quincahuili ma techcoco. 7Queja se tototl cholohua tlen se tlaquetztli, queja nopa nojquiya Toteco techchololti ininmaco tocualancaitacahua, tlen quinequiyayaj techmasiltise. Nopa laso cotonqui huan tojuanti timocajque timalacantoque. 8Tojuanti totlapalehuil huala tlen TOTECO, tlen quichijchijqui elhuicactli huan tlaltepactli.

will be added

X\