Psalms 111

1¡Paquilistli! Ica nochi noyolo nijnequi nijtlascamatis TOTECO, campa mosentil'iaj tlacame tlen itztoque xitlahuaque. 2Huejhueyi tlamantli quichijtoc TOTECO. Nochi tlen quiicnel'iaj ma moyolilhuica tlen nochi ni tlamantli tlen quichijtoc. 3Pampa tlahuel yejyectzi nochi nopa huejhueyi chicahualnescayotl tlen quichihua. Huan technextil'ia ihueyitilis huan para yajaya nochipa quichihua tlen xitlahuac. 4TOTECO quichijtoc huejhueyi tlamantli tlen axaca huelis quiilcahuas. Quichijtoc tlamantli tlen technextil'ia para techicnel'ia huan para yajaya quipiya hueyi iyolo ica tojuanti. 5Yajaya quinmaca tlacualistli nochi tlen motemach'iaj ipan ya. Huan ax quema quiilcahuas tlen techtlajtolcahuilijtoc techchihuilis. 6Toteco quinextijtoc ihueyi chicahualis ica itlacajhua pampa yajaya quinmacac nopa tlali Israel, yonque achtohuiya eliyaya iniaxca sequinoc tlamantli tlacame. 7Nochi tlen Toteco quichihua eltoc senquistoc xitlahuac huan cuali. Huan nochi itlanahuatilhua nel'ia temachtli. 8Para nochipa technextil'ia tlen melahuac huan tlen xitlahuac, huan monequi tijchihuase tlen melahuac huan tiquinneltocase. 9TOTECO ya tlaxtlajtoc nochi para quinmanahuis itlacajhua. Huan quinilhuijtoc itlacajhua para quichihuas nochi tlen quintencajqui ipan nopa tlajtol sencahuali. ¡Toteco nel'ia tlatzejtzeloltic huan temajmati! 10Para tipehuase tijpiyase tlalnamiquistli, achtohui monequi tiquimacasise huan tijtlepanitase Toteco Dios. Mochihuaj nel'ia tlalnamiquini nopa tlacame tlen quintlepanitaj itlanahuatilhua. Ma tijpaquilismacaca para nochipa.

will be added

X\