Psalms 104

1¡Na nimitzpaquilismacas, TOTECO! ¡TOTECO Dios, nel'ia tihueyi! Campa ta timocahua nochi tlayejyectzi huan cuajcualtzi. 2Mitzyahualohua tlahuili tlen onpano yejyectzi. Ta tijpatlajqui nopa elhuicactli queja se tlacatl quipatlajtosqu'ia se yoyomitl. 3Eltoc queja quema timochanti, tijtlali nopa cuatetomitl ipan atl tlen huejcapa, huan tijsencajqui nopa mixtli para elisqu'ia mocarros. Ta tihueli tinejnemi san ajacatipa. 4Tiquintequihu'ia moelhuicac ejcahua queja motlatitlanilhua huan tiquinchihua ma elica queja tlilelemectli. 5Ta cuali tijtlatzquilti ni tlaltepactli para ma ax moijcuenis tlen campa eltoc. 6Tijchijqui ma onca tlahuelatl tlen quiixtzajqui nochi tlaltepactli queja elisqu'ia iyoyo. Quena, tijchijqui atl ma tlejco hasta quiixtzajqui nochi tepetini. 7Pero quema ta ticamatqui huan ticajhuac nopa atl, nopa atl motlalojtejqui huan mosejcotilito ipan nopa hueyi atl pampa ta titlahuejchijqui. 8Tlejcoque tepetini huan nopa tlamayantini temoque ipan ininlugar campa ta titlanahuati ma mosehuica. 9Teipa tiquintlalili ininnepa nopa huejhueyi atl para ayoc quema ma quiixtzacuaca tlali. 10Ta tijchijqui atl ma motlalo ipan atlajtli campa tepetini, huan ma temotihuala hasta quitemit'ia campa m'as tlatzintla nopa tlamayantini campa hueli. 11Ica nopa atl tiquinamaca nochi tlapiyalime para ma atlica. Ipan nopa atlajtli aixhuij nopa burrojme tlen nemij cuatitla. 12Nopa totome quichihuaj inintepasol iteno nopa atlajtli, huan huicaj quema itztoque ipan ininmacuayo nopa cuatini. 13Ta tijchihua ma huetzi atl ipan tepetini, huan tijchihua ma tlaelilti nopa tlali. 14Quena, ta Toteco tijchihua ma moscalti sacatl para ma tlacuaca tlapiyalime. Huan tijchihua ma onca quilitl, cuatlajcayotl huan trigo tlen tlacame quitocaj para ma ica mopanoltica. 15Nojquiya tiquinmaca xocomecatl iayo para ma ica yolpactoca, huan aceite para ma mopoloca ipan ininxayac, huan nojquiya tiquinmaca tlacualistli para ma quipiyaca fuerza. 16Ica nopa atl moscalt'iaj nopa tiocuatini tlen ta, TOTECO, tijtojqui ipan tlali L'ibano. Nopa cuatini tlahuel huejcapantique huan quipiyaj miyac ininxochiyo. 17Ipan nopa cuatini motepasolt'iaj nochi tlamantli totome. Huan ipan nopa cipr'es cuahuitl motepasolt'ia nopa tototl tlen itoca cig"ue~na. 18Inintzontipac nopa huejhueyi tepetini onca sacatl para nopa chivojme tlen nemij cuatitla. Huan imatitla nopa tetini, mochantijtoque nopa pesojme. 19Toteco, ta tijchijqui metztli para quinextis ipan tlachque metztli itztoque tlacame. Huan nopa tonati tijchijqui para tenextilis sesen tonal. 20Ta tijtitlani nopa tzintlayohuilotl huan mochihua yohuali, huan quema tlayohua, quisaj nochi tecuanime tlen itztoque ipan cuatitlamitl. 21Nopa leones tlen noja conetzitzi nanalcaj pampa mayanaj. Huan quitemohuaj nopa tlacualistli tlen ta, Toteco Dios, tiquinmacas. 22Quema quisas tonati sampa motlat'iaj ipan iniosto. 23Huan tlacame quisaj para tlatequipanotij, huan tequitij chicahuac hasta tiotlac. 24¡TOTECO, nel'ia tijchijtoc miyac tlamantli! Huan nochi tlamantli tijsencajtoc ica miyac tlalnamiquistli. Nejmajtic tlaltepactli temitoc ica miyac tlamantli yejyectzitzi tlen ta tijchijtoc. 25Xiquitaca nopa hueyi atl tlen tlahuel patlahuac huan hueyi. Nopano itztoque miyac tlamantli tlapiyalime pilsiltzitzi huan huejhueyi. 26Nopano nejnemij nopa huejhueyi barcos, huan nopano itztoc nopa hueyi tlapiyali itoca leviat'an tlen temajmati tlen ta tijchijqui para ma mahuilti ipan hueyi atl. 27Nochi ni tlapiyalime mochiyaj ipan ta para xiquintlamaca quema monequi. 28Huan quema tiquinmaca inintlacualis, inijuanti quisel'iaj. Ta timomatlapohua ica moteicnelilis huan tiquintlamaca hasta ixhuij ica tlen m'as cuali. 29Pero intla tiquintlahuelcahua, inijuanti mocuesohuaj. Huan intla tiquinquixtil'ia ininyolis, miquij huan mocuepaj tlaltejpoctli. 30Huan quema ta tijtitlani moTonaltzi tlen temaca yolistli, tlacatij sampayano para sampa ma momiyaquilica huan tlacualnesis ipan ni tlaltepactli. 31¡Ma tijhueyitlalica TOTECO pampa ihueyitilis ax quema tlamis! ¡Ma quipanti paquilistli TOTECO ipan nochi tlen quichijtoc! 32Quema Toteco quitlachil'ia tlaltepactli, ni tlaltepactli huihuipica. Huan quema quinpanajsi tepetini, inijuanti lemenij. 33Nijhuicatis TOTECO nochi tonali tlen niitztos ipan ni tlali. Quena, nijpaquilismacas Toteco Dios ica tiohuicatl hasta tlamis niyoltos. 34Ma quipacti TOTECO nochi tlen nimoyolilhu'ia tlen ya, huan na nimopaquilismaca ipan ya. 35Ma miquica nochi tlen quinpact'ia tlajtlacolchihuaj ipan ni tlaltepactli. Quena, ma ayoc itztoca tlen ax quinequij quitlepanitase TOTECO. Pero na nijpaquilismacas ica nochi noyolo. ¡Paquilistli!

will be added

X\