1 Paqui nopa tlacatl tlen ax quitlacaquil'ia inintlajtol ax cuajcualme, niyon ax quintoquil'ia tlajtlacolchihuani. Niyon ax mohuica ininhuaya tlen ica paquij TOTECO. 2 Nopa tlacatl quipant'ia hueyi paquilistli pampa quichijtinemi tlen quiijtohuaj itlanahuatilhua TOTECO, huan ipan nopa tlanahuatili moyolilhuijtinemi tonaya huan tlayohua. 3 Nopa tlacatl itztoc queja se cuahuitl tlen moscalt'ia nechca atemitl, huan temaca itlajca quema ipohual huan ax quema xihuiyo tepehui. Nochi tlen quichihua quisa cuali. 4 Pero ax queja nopa ica tlacame tlen ax cuajcualme, pampa inijuanti itztoque queja tlasoli tlen quihuica ajacatl. 5 Yeca quema TOTECO tetlajtolsencahuas, nopa ax cuajcualme ax huelise quiijiyohuise, pampa yajaya tlahuel chicahuac quintlatzacuiltis. Quena, ipan nopa tonal tlajtlacolchihuani ayoc huelis mocahuase ininhuaya tlacame tlen itztoque xitlahuaque iixpa. 6 Pampa TOTECO quimati nopa ojtli tlen ipan nemij tlacame tlen itztoque xitlahuaque, pero tlacame tlen quichihuaj tlen ax cuali, polihuise.
