Proverbs 9

1Yajaya tlen nel'ia quipiya tlalnamiquilistli quichijqui se yejyectzi cali ica chicome tlaquetzali iixpa. 2Quicualtlalijtoc se hueyi tlacualistli, huan quichijchijtoc se tlaili tlen m'as cuali. Ya quisencajtoc nopa cuamesa ica miyac tlamantli tlacuali. 3Quintitlanqui itlatequipanojcahua para ma yaca huan ma quinnotzaca nochi tlacame para ma hualaca huan ma mochihuase tlalnamiquini. Eltoc queja yajaya tlen quipiya tlalnamiquilistli moquetza campa m'as tlahuejcapanco nechca nopa altepetl pampa tlahuel quinequi tetlalnamictis. Huan tlen quipiya tlalnamiquilistli quiijtohua: 4"Xihualaca nochaj imojuanti tlen inhuihuitique huan tlen ax inquimachil'iaj tlen cuali para inquichihuase. 5Xihualaca, xijcuaqui notlacualis huan xiquica tlaili tlen cuali tlen nijsencajtoc. 6Xijcajtehuaca nochi huihuiyotl, huan nimechnextilis quejatza huelis inquipiyase se yolistli tlen yejyectzi. Xinejnemi ipan nopa ojtli tlen nimechnextilis huan ximotlalnamictica." 7Intla tijchihua campeca para tijtlalnamictis se tlacatl tlen quinhuihuiita sequinoc o se tlen fiero iyolis, yajaya san mitzpinahualtis huan chicahuac mitznajnanquilis. 8Huajca amo xijtlacahualti se tlen tehuihuiita pampa san mitzcualancaitas. Pero intla tijxitlahuas se tlacatl tlen tlalnamiqui, yajaya m'as mitzicnelis. 9Xijmachti se tlacatl tlen tlalnamiqui, huan achi m'as mochihuas tlalnamiqui. Huan intla tijmachtis se tlen xitlahuac monejnemilt'ia, achi m'as quimatis tlen cuali para quichihuas. 10Pampa tlalnamiquilistli pehua quema se acajya quiimacasi huan quitlepanita TOTECO. Huan intla se acajya quiixmatis TOTECO tlen tlatzejtzeloltic, quichihuas para quimachilis miyac tlamantli. 11Huan tlalnamiquilistli mitzchihuilis para tiitztos miyac tonali. Quena, mitzmiyaquilis nopa xihuitl ipan moyolis. 12Intla timochihuas titlalnamiqui, tipanos nelcuali. Pero intla tijhuihuiitas tlalnamiquilistli, huajca ica moselti timochihuilis tlen fiero. 13Se sihuatl tlen huihuitic teyolpasolohua pampa ax tleno tlen cuali quimati. Chicahuac camati huan seseme huihuitzi. 14Yajaya mosehu'ia ipan cuasiya ipuertajteno campa achi m'as tlahuejcapanco ipan nopa altepetl. 15Huan quinnotza tlacame tlen panoj, yonque ax quitemohuaj. Yajuanti san quitoquilijtiyohuij se ojtli tlen xitlahuac. 16Pero nopa sihuatl ax quincahua ma panoca, quinnotza huan quinilhu'ia: "Xihualaca nochaj." Huan nopa telpocame tlen ax tleno quimachil'iaj quitlacaquil'iaj itlajtol quema quinilhu'ia: 17"Xihuala nohuaya huan nimitzmacas tlen nel'ia cuali." Quena, tlen itztoc ihuaya se sihuatl queja nopa quipiya paquilistli se tlalochtli queja se atl tlen tlaichtectli eltoc tlen m'as tzopelic, o se tlacualistli tlen se quiichtequis huan quicuas ixtacatzi ihuaya seyoc eltoc tlen m'as ajhuiyac, 18pero tlen yohuij campa ichaj nopa sihuatl ax quimatij intla nopa tlacame tlen achtohuiya quipaxalojque, ama itztoque mictla.

will be added

X\