Proverbs 6

1Ta tinotelpoca, intla tijtlalijtoc mofirma para tijpalehuis mohuampo para quitlanejtise se tlenijqui, o intla titemacatoc motlajtol para tijtlaxtlahuis tlen quitlanejt'ia intla ax hueli ya tlacuepas, ya timocalaquijtoc ipan se hueyi cuesoli. 2Ica moselti timoilpitoc ica motlajtol. Quena, ica tlen tiquijto timomasiltijtoc ipan se tlatzactli. 3Huajca notelpoca, nimantzi xijchihua tlen nimitzilhu'ia para timomanahuis. Ya tiitztoc imaco mohuampo. Huajca xiquitati huan ximoechcapantlali iixpa huan xijtlajtlani mohuampo chicahuac para ma quiixpolo motoca campa nesi titlatzquitoc ihuaya. 4Amo xicochi, niyon amo ximosiyajcahua. Amo xijcahua para seyoc tonali. Xijsencahuas ni tlamantli nimantzi. 5Xijchihua nochi tlen tihueli para timomanahuis queja quichihua se masatl tlen motlalohua para mochololtis quema quiitas se tlapejquetl, o se tototl tlen quimasiltijtoya ipan tlaquetztli huan teipa momanahu'ia. 6Ta tlen titlatzihui, xiquintlachili nopa tzicame queja tequitij. Ximomachti tlen quichihuaj para timotlalnamictis. 7Yonque yajuanti ax quipiyaj se tlanahuatijquetl, niyon se tlayacanquetl tlen quinnahuat'ia tlachque monequi quichihuase, 8yajuanti tequitij chicahuac quema tlatotoniya, huan quisentil'iaj inintlacualis para quipiyase tlen quicuase quema tlaseseyas. 9Pero ta tlen titlatzihui, san tijnequi ticochis. ¿Hasta quema timehuas? Xijmachilis ya ni. 10Intla tiquijtos: "Noja se quentzi m'as niixcochhuetzis, huan san se tlalochtli m'as nimomanajnahuas para nimosiyajcahuas", 11ica se tlalochtli ajsis mopani se hueyi mayantli queja nimantzi huala se tlaxtejquetl quema ax tijchiya. Huan nimantzi timochihuas se tlen teicneltzi pampa ax titequitqui. 12Ax cuajcualme huan tlen ax quitlepanitaj TOTECO istlacatitinemij. 13Quinijcopil'iaj ininhuampoyohua para mocamahuise. Monextil'iaj ica iniicxihua campa yohuij. Momanextil'iaj se ica seyoc tlen quinequij quichihuase. 14Temitoc ininyolo ax cuajcualme ica tlajtlacoli huan mojmostla moilhuijtinemij tlen fiero hueli quichihuase. Quinxejxelohuaj tlacame huan quinchihuaj para ma mocualanica. 15Yeca ipan se tlalochtli quema nopa ax cuajcualme ax quichiyaj, quipantise tlen fiero. Quinomiyopojpostequis hasta ayoc oncas pajtli. Quena, quintzontlamiltis. 16Onca chicuase tlamantli huan hasta chicome tlen TOTECO ax quinequi quiitas. Tlen m'as quicualancamaca eltoc ya ni: 17se tlen mohueyimati; se tlen teistlacahu'ia; se tlen quimict'ia seyoc tlen ax tleno quichihuilijtoc; 18se tlen moilhuijtinemi tlen fiero hueli quichihuas; se tlen nimantzi yohui para quichihuas tlen ax cuali pampa tlahuel quipact'ia; 19se tlen moquetza queja se testigo huan quiistlacahu'ia tlen ax tleno quichijtoc; se tlen quipehualt'ia cualantli ica icnime. Nochi ya ni TOTECO ax quinequi quiitas. 20Notelpoca, xijtlepanita tlen motata huan monana mitzilhuijtoque. Amo xijcahua tlen mitzmachtijtoque. 21Ipan moyolo nochipa xijpixto inintlajtol. Ximoilhuijtinemi tlen quiijtojtoque queja timoilpilisqu'ia inintlamachtil ipan moquechtla. 22Pampa inintlamachtil mitzyacanas campa hueli tiyas huan intla tijtoquilis tlen mitzilhuijtoque, ticochis cuali huan ica temachili. Ica ijnaloc quema tiisas tijcaquis inintlajtol tlen mitzconsejomacas. 23Pampa inintlajtol motatahua eltos queja se tlahuili tlen quitlahuilis moojhui. Quema se acajya mitztlacahualt'ia o mitztlalnamict'ia, yajaya mitznextil'ia se ojtli campa onca se cuali yolistli. 24Quena, intla tijneltoquil'ia inintlamachtil motatahua, mitzmanahuis tlen ahuilnenca sihuame. Tlen mitzilhuijtoque mitzpalehuis para ax tiquinchihuilis cuenta fiero sihuame tlen tlahuel quimatij camatise yejyectzi. 25Amo xiquixtoca iyejyejca se sihuatl queja nopa, niyon amo xijcahuili ma mitztlani quema mitzijcopil'ia ica iixtiyol tlen yejyectzitzi. 26Pampa se ahuilnenca sihuatl quichihuas para se tlacatl ma quinenpolo itomi hasta ayoc quipiyas niyon para se pantzi. Quena, se momecatijca sihuatl huelis quicuilis iyolis se tlacatl. 27¿Huelis se tlacatl moquechilis se tlicuahuitl iyolixpa huan ax motlatis? ¡Axtle! Temachtli motlatis. 28Intla se tlacatl nejnemis ipan tlicoli, temachtli icxi tlatlas. 29Queja nopa ipantis se tlacatl tlen momecat'ia ihuaya se sihuatl tlen quipiya ihuehue. Quiselise san se tlatzacuiltilistli queja nochi tlacame tlen quiitzqu'iaj isihua seyoc tlacatl. 30Axaca quicualancaita se tlaxtejquetl tlen tlaxtejqui para ax miquisqu'ia ica mayantli, 31pero quema tequitini quiitzquise, monequi tlaxtlahuas chicome huelta imiyaca tlen quiichtectoc, yonque monequisqu'ia quinamacas nochi tlen eltoc ipan icalijtic para tlaxtlahuas. 32Pero onpano huihuitic se tlacatl tlen momecat'ia. Ax quipiya tlalnamiquilistli, pampa ica iselti quinenpolos iyolis. 33Nopa tlacatl tlahuel tlaijiyohuis huan tlacame ayoc quitlepanitase. Huan ax quema huelis quiixpolos nopa pinahualistli. 34Pampa temachtli ihuehue quitlasomatis nopa sihuatl huan tlahuel cualanis. Ax quitlapojpolhuis nopa tlacatl quema ajsis tonali para quicuepilis tlen yajaya quichihuilijtoc. 35Ihuehue ax quiselis se tlaxtlahuili para moseseltis. Ax quitlapojpolhuisqu'ia yonque quimacasqu'ia miyac tlamantli tlen ipati.

will be added

X\