Proverbs 5

1Notelpoca, xijchihuili cuenta nopa tlalnamiquilistli tlen nijpiya. Quena, ximonacasquetza para tijmachilis notlajtol pampa nijmati tlen niquijtohua. 2Huan queja nopa timochihuas titlalnamiqui. Huan ticajcoctiyas m'as tlamantli tlen tijmatis. 3Itlajtol se ahuilnenca sihuatl eltoc tzopelic queja nectli. Huan tlen quiijtohua nel'ia yejyectzi, pampa tlahuel quimati quejatza tlacajcayahuas. 4Pero teipa aqui yohui ihuaya quipantis tlen chichic queja se tlamantli pajyo tlen temict'ia. Quimachilis tlacuajcualocayotl queja quiajsisqu'ia ipan iyolo se machete tlen oncac tlatequi. 5Nopa ahuilnenca sihuatl quihuicas se tlacatl campa onca miquistli. Quena, quiyacanas hasta quiaxititi mictla. 6Huijcoltic iojhui nopa sihuatl, pero niyon ax quimati intla fiero campa yohui. Yajaya ax quichihuil'ia cuenta nopa ojtli xitlahuac tlen yohui campa onca se cuali yolistli. 7Huajca imojuanti intelpocame, xinechtlacaquilica tlen nimechilhu'ia, huan ax quema xiquilcahuaca notlajtol. 8Xijtlalcahuica se ahuilnenca sihuatl, niyon amo ximonechcahuica campa ichaj. 9Pampa notelpoca, intla tijpaxalos, ayoc aca mitztlepanitas. Huan tlen tijtlantoc ica miyac xihuitl tequitl, tiquinmacas ininmaco tlacame tlen ax quitlepanitaj TOTECO huan tlen ax tiquinixmati. 10Amo xiquincahuili seyoc altepetl ehuani ma moricojchihuaca ica tlen timotlanilijtoc. Ma ax moaxcatise tlen tijpanti ica miyac tlaijiyohuili huan tlaohuijcayotl. 11Teipa san timochoquilis ipampa nochi tlen fiero tijchijtoc ihuaya nopa sihuatl. Huan titlaijiyohuis quema nopa cocolistli tlen tijpanti ihuaya ica yolic mitztzontlamiltijtiyas. 12Huan huajca tiquijtos: "M'as cuali nijchihuilijtosqu'ia cuenta nopa consejo tlen nijcajqui. ¿Para tlen ax nijtlacaquili quema nechtlacahualtiyaya? ¿Para tlen nijchijqui san tlen nechpacti? 13¡Ay! ¿Para tlen ax nijnejqui niquintlacaquilis tlen nechconsejomacayayaj? ¿Para tlen ax niquinchihuili cuenta quema nechmachtiyayaj tlen cuali? 14Ama ipampa notlajtlacol niitztoc nechca se tlaixtemolis tlen nechtzontlamiltis. Nihuetztoc ipan se hueyi pinahualistli iniixpa nochi tlacame." 15Huajca notelpoca, quema tiamiqui, ximoaixhuiti ica atl tlen meya ipan tlen ta moamel. Amo xijnechcahui se sihuatl tlen ax mosihua, pampa ica mosihua tijpantis paquilistli queja se atl tlen m'as ajhuiyac. 16¿Para tlen tiquinconemacas sihuame tlen san nentinemij ipan calles? ¿Para tlen tlen eltoc moxinach mopantis ipan tianquis? 17Tlen eli mocone ma elica san para ta. Amo xiquinmaca tlen tijpiya sihuame tlen ax tiquinixmati. 18Ma TOTECO quitiochihua nopa chicahualistli tlen mitzmacatoc pampa titlacatl. Huan ximopaquilismaca miyac ica nopa sihuatl tlen timocuili quema tieliyaya titelpocatl. 19Ximoilhui tlen mosihua queja se sihuatzi masatl tlen nel'ia yejyectzi nejnemi. San xiyolpaqui ica ya tlen mitzicnel'ia miyac. Tlahuel xipaqui quema yajaya mitznajnahua ipan tlen hueli tlalochtli. Nochipa ximoixhuiti ica ya itlaicnelilis. 20Huajca notelpoca, ¿para tlen tinejnemisqu'ia queja se popoyotzi ica se ahuilnenca sihuatl? Ax quinamiqui tijnajnahuas o tiquitzquis ichichihual se sihuatl tlen ax monamic. 21Pampa TOTECO mitztlachil'ia huan quiita sesen tlamantli tlen tijchihua. Quitlachil'ia campa tiya huan sesen pilojtzitzi tlen ipan tinemi. 22Tlacame tlen ax quitlepanitaj TOTECO momasiltise ipan inintlajtlacolhua. Quena, inintlaixpanolhua quinitzquis huan quinilpis queja elisqu'ia se mecatl. 23Nopa tlacame miquise pampa ax quinejque quiselise itlajtol tlen quintlacahualtiyaya. Pampa tlahuel quinequij tlajtlacolchihuase, ininhuihuiyo quichihuas para ma mocuapoloca para nochipa.

will be added

X\