Proverbs 3

1Notelpoca, amo xiquilcahua tlen nimitzmacht'ia nica. Xicajcocui notlanahuatil ipan moyolo. 2Pampa intla tijchihuas tlen nimitzilhu'ia, tiitztos para miyac xihuitl huan tijpiyas tlasehuilistli huan paquilistli ipan moyolo. 3Ax quema xijcahua xitetlasojtla huan xiquijto tlen melahuac. Ma quiitaca nochi tlacame ni cuali tlamantli tlen tijchihua queja quiitasqu'iaj se costli ipan moquechtla. Ma nesi tlanemijya para ipan moyolo tijtoquil'ia tlanahuatili tlen xitlahuac. 4Huan TOTECO huan tlacame quicualitase tlen tijchihua. Quena, mitztlepanitase huan camatise cuali tlen ta. 5Ximotemachi ipan TOTECO ica nochi moyolo. Amo xijtoquili san tlen motlalnamiquilis mitzilhu'ia. 6Ximoilhui tlachque ipaquilis TOTECO ipan nochi tlamantli tlen tijchihuasqu'ia, huan yajaya mitzyacanas ipan se ojtli tlen xitlahuac. 7Amo ximohueyimati pampa timoilhu'ia nel'ia titlalnamiqui. M'as cuali xiquimacasi huan xijtlepanita TOTECO huan ximoiyocatlali ica nochi tlen ax cuali. 8Quena, ni tlamantli elis queja cuali pajtli tlen quichicahuas campa timococohua, huan quimacas chicahualistli motlacayo huan moomiyohua. 9Xijnexti para tijtlepanita TOTECO pampa tijmaca TOTECO tlen iaxca tlen nochi tlamantli tlen tijpiya. Xijmaca TOTECO nopa achtohui pixquistli tlen tijcuis ipan momila. 10Huan TOTECO mitztiochihuas huan quitemitis mocuacalhua ica tlacualistli hasta tzontis huan ayoc huelis quicuise m'as. Yajaya inmechmacas xocomeca atl tlen yancuic hasta mocahuas para tiquis. 11Notelpoca, amo xicholo tlen TOTECO quema mitztlalnamict'ia, niyon amo xicualani quema yajaya mitztlacahualt'ia. 12Pampa aqui TOTECO quiicnel'ia, quitlalnamict'ia queja se tetat quixitlahua icone tlen tlahuel quiicnel'ia. 13Hueyi paquilistli quipiya se tlacatl tlen quipant'ia tlalnamiquilistli huan mochihua tlalnamiqui. 14Pampa tlalnamiquilistli tepalehu'ia miyac. M'as ipati que plata huan oro tlen nel'ia cuali. 15Tlalnamiquistli m'as ipati que nopa piltetzitzi tlen tlahuel pajpatiyo. Niyon se tlamantli tlen tijnequisqu'ia ax hueli quiaxilis para queja ipati tlalnamiquilistli. 16Tlacame tlen quipiyaj tlalnamiquilistli huejcahuase para itztose. Nojquiya quipantise tlatiochihualistli huan tlatlepanitacayotl. 17Tlacame tlen tlalnamiquij quitoquil'iaj se ojtli tlen quipiya paquilistli. Quena, nopa ojtli mitzmacas tlasehuilistli ipan moyolo. 18Tlalnamiquistli eltoc queja se cuali cuahuitl tlen temaca se yolistli tlen nel'ia yejyectzi. Intla timochihuas titlalnamiqui huan ax tiquiyocacahuas motlalnamiquilis, tijpiyas miyac paquilistli ipan moyolis. 19Ica tlalnamiquilistli huan tlamachilistli, TOTECO quichijchijqui elhuicactli huan tlaltepactli. 20Pampa yajaya nochi quimati, quichijqui para ma moxejxelo nopa hueyi atl, huan quichijqui para tlen elhuicac hualtemosqu'ia atl para tlaahuetzis ipan tlaltepactli. 21Huajca notelpoca, xijpiya cuali tlalnamiquilistli huan xijtlacaquili ni tlalnamijca tlajtoli, ax quema xiquinilcahua, 22pampa nochi ni tlalnamiquilistli huan tlamachiltili mitzmacas se cuali yolistli. Quena, quiyejyecchihuas moyolis queja se costli quiyejyecchihuas se tlacatl ipan iquechcuayo. 23Intla tijpiyas tlalnamiquilistli huan ya nopa tijtoquilis, mitzpalehuis para tinejnemis ica temachili, huan ax timotepotlamis ipan moojhui. 24Quema timotecas para ticochis, ax timajmahuis. Timotecas huan ticochis nel'ia cuali. Quena, ticochis ica temachili. 25Ax monequi tiquimacasis para ipan tlen hueli tlalochtli hualas tlen fiero mopani queja quinajsi ax cuajcualme, 26pampa TOTECO mitzmacas temachili. Yajaya axaca quicahuilis para mitzmasiltis ipan se tlajtlacoli. 27Quema quinamiqui tijpalehuis se tlacatl huan tihueli tijchihuas, amo xiquilhui para axtle. 28Amo xiquilhui seyoc: "Xihuala mostla huan nimitzmacas", intla tijpixtoc momaco para tijmacasqu'ia ama. 29Amo ximoyolilhui tlen ax cuali tlen huelis tijchihuilis seyoc tlen motemach'ia ipan ta. 30Amo xijteilhui seyoc intla yajaya ax tleno mitzchihuilijtoc. 31Amo xiquixtoca iyolis se tlacatl tlen ax quitlepanita TOTECO. Amo xijtoquilis niyon se iojhui. 32Pampa TOTECO quicualancaita nopa tlacatl tlen huijcoltic iojhui, pero quinicnel'ia tlen itztoque xitlahuaque iixpa. 33Quena, TOTECO quintelchihua tlen itztoque ipan ininchaj tlacame tlen ax quitlepanitaj, pero tlen itztoque ipan ininchaj tlacame tlen itztoque xitlahuaque iixpa quintiochihua. 34TOTECO quinpinahualt'ia tlen tehuihuiitaj, pero hueyi iyolo TOTECO ica tlacame tlen moicnonequij. 35Tlen tlalnamiquij quiselise miyac tlatlepanitacayotl, pero tlen huihuitique TOTECO quinpinahualtis.

will be added

X\