1 Amo ximohueyimati ica tlen timoilhu'ia para tijchihuas mostla, pampa ax tijmati tlachque panos ipan seyoc tonali. 2 Amo xicamati para timohueyimatis ica moselti, achi cuali xiquincahuili para sequinoc ma mitzhueyichihuaca. 3 Se tetl nel'ia etic huan nojquiya etic xali, pero achi m'as etic quema se tlen huihuitic tlahuel mitzcualancaita. 4 Achi m'as mahuilili se tlen quiixtoca tlen sequinoc quipiyaj huan ax tlen mosisin'ia huan tecualancaita. 5 M'as cuali se tlen mitztlacahualtis chicahuac quema monequi, huan ax se tlen mitzilhuis ixtacatzi para mitzicnelis pero ax quema mitznextil'ia. 6 Achi m'as temachtli tohuampo tlen techcocohua quema monequi techajhuas, huan ax se tocualancaitaca tlen techtzopon'ia san para techcajcayahuas. 7 Se tlen ixhuitoc hasta sayolnectli ax quinequi quiitas, pero se tlen mayancamictinemi quicua nochi tlen quiajsi yonque chichic. 8 Se tototl tlen patlantehua huejca tlen itepasol, eltoc queja se tlacatl tlen quicajtehua campa tlacatqui para huejca nemis. 9 Se aceite o se tlaajhuiyacayotl tlen ticajhuiyacmatij techyolpact'ia. Huan se cuali consejo tlen se tohuampo techilhu'ia techmaca paquilistli hasta campa hueli topani. 10 Ax quema xiquintlahuelcahua mohuampoyohua, niyon motata ihuampoyohua, huan quema tijpiyas se cuesoli ax monequis tijtemoti moicni tlen itztoc huejca. Pampa m'as cuali se mohuampo tlen itztoc nechca huan ax se moicni tlen itztoc huejca. 11 Xieli titlalnamiqui, tinotelpoca, huan techmacas miyac paquilistli. Intla tielis se tlalnamijquetl, huelis niquinnanquilis tlen nechtlaijilhu'iaj. 12 Se tlen tlalnamiqui nimantzi momaca cuenta intla imelac huala tlen mahuilili huan momanahu'ia. Pero tlen huihuitique ax momacaj cuenta huan quinajsi tlen quincocohua. 13 Xijcuili se tlamantli tlen iaxca nopa tlacatl tlen mocuilt'ia para mitztlaxtlahuis tlen seyoc mitztlahuiquil'ia tlen yajaya ax cuali quiixmati. Huan nojquiya xicajcocuili miyac tlamantli tlen iaxca tlen mocuilt'ia para mitztlaxtlahuis tlen mitztlahuiquil'ia se momecatijca sihuatl. 14 Intla nelijnaloc tijcuatzajtzilis mohuampo para tijtlajpalos, yajaya quiitas para tijtelchihua. 15 Se sihuatl tlen ajachica mosisin'ia huan cuajcualantoc, eli san se ica nopa atl tlen ajachica chichipica huan mitzcuatoton'ia miyac quema tlami tlaahuetzi. 16 Aqui mochihua queja quiquetza icualancayo, eltoc queja quichihuasqu'ia campeca para quitzacuilisqu'ia nopa ajacatl o quicuis aceite ipan ima para quihuicas. 17 Monequi se tlamantli tepostli para quitentis seyoc tepostli. Huan se tlacatl tlalnamiqui quipalehu'ia ihuampo m'as motlalnamictis. 18 Aqui quimocuitlahu'ia itlatochua, quicuas itlajca. Nojquiya se tequihuejquetl tlen quimocuitlahu'ia tlen iaxca iteco quiselis tlatlepanitacayotl. 19 Se tlacatl hueli moita ipan atl huan quiita queja nesi ixayac. Nojquiya tlen se tlacatl quichihua ica nochi iyolo quinnextil'ia sequinoc intla yajaya itztoc cuali o ax cuali. 20 Nochipa miquistli quinequi quinpantis m'as tlacame para quincuilis ininyolis, huan mictla ax quema temi ica mijcatzitzi. Huan se tlacatl tlen quiita tlamantli tlen yancuic ax quema yolpaqui ica tlen ya quipixtoc, noja quinequi m'as. 21 Monequi tlitl para quiyejyecose oro huan plata para quiitase intla nel'ia cuali. Pero se tlacatl quiyejyecohuaj quema quihueyimatij sequinoc. Queja yajaya quisel'ia inintlajtol tlen quiijtojtoque quinext'ia intla cuali iyolo o axtle. 22 Se tlen huihuitic ax quicahuas ihuihuiyo, yonque tijtlalisqu'ia ipan se hueyi chilcaxitl ica sintli huan tlahuel tijtetzonas para tiquiniyocacahuas. 23 Mojmostla cuali xijmati quejatza itztoque sesen moborregojhua huan mohuacaxhua tlen ica timoaxilijtoc. 24 Pampa yonque tiitztoc se tlapijpixquetl, tlen tijpiya ax huejcahuas para nochipa intla ax tijmocuitlahuis. Yonque se itztoc tlanahuatijquetl ax mocahuas nopa tequihuejcayotl para iconehua huan iixhuihua intla ax quimocuitlahu'ia tlen pano ipan nopa caltlanahuatili ica miyac cuidado. 25 Quema tijtzontequis nopa sacatl tlen chicajtoc, chamanis nopa xihuitl tlen xoxohuic. Huan teipa huelis tijpixcas sequinoc xihuitl tlen cuatitla. 26 Huelis tijtequihuis iniijhuiyo moborregojhua para timochijchihuilis moyoyo para quema tlaseseya. Huelis tiquinnamacas mochivojhua huan ica timocohuis se mili. 27 Ica ininlechi mosihua chivojhua huelis timopanoltis ininhuaya moteixmatcahua huan motlatequipanojcahua.
