Proverbs 24

1Amo xiquixtoca tlen quichihuaj ax cuajcualme, niyon amo xijnequi tiitztos ininhuaya. 2Pampa yajuanti mojmostla san moilhu'iaj tlachque hueli quiichtequise. Quema camatij, san tlen fiero quiijtohuaj. 3Pero tlalnamiquini ica inintlalnamiquilis quichijchihuaj se cali, huan ica iniixtlamatil quimatij quitlalilise icaltzinpepechcayo para elis nel'ia cuali. 4Pampa yajuanti quimatij quichihuaj miyac tlamantli, quicualchijchihuaj sesen cuarto ipan ininchajchaj, huan quintemit'ia ica miyac tlamantli yejyectzitzi huan tlen patiyo. 5Se tlacatl tlen tlalnamiqui quitlanis se tlen quipiya fuerza. Achi m'as ipati tlalnamiquilistli huan ax tetili. 6Se tlen tlalnamiqui huelis tlatlanis ipan tlatehuijcayotl pampa quintlajtlan'ia tlalnamiquini miyac consejo. 7Pero se tlacatl tlen huihuitic ax hueli quiaxilis tlalnamiquilistli, niyon ax quimatis tlachque quiijtos quema quihuicase ipan tequicali para quitlajtolsencahuase. 8Se tlen san moyolilhu'ia quejatza quichihuas tlen ax cuali, sequinoc quiixmatij para se tlacatl tlen fiero itlalnamiquilis. 9Nochi tlen moilhu'iaj para quichihuase tlen huihuitique eltoc se tlajtlacoli. Huan sequinoc tlacame ax quinequij quiitase tlen tlahuihuiitaj pampa mohueyimatij. 10Intla timotlatzcanequis tonaya ipan motequi, noja m'as caxantiyas mofuerza para tijtlamiltis. 11Xiquinmanahui nopa tlacame tlen quinhuicaj para quinmictise yonque ax tleno quichijtoque. Xiquinmaquixti tlen quinhuahuatatztiyohuij para quinmictise. 12Ax huelis timotechtis huan tiquijtos para ax tijmatiyaya tleno. ¿Ax tijmati para TOTECO tlen quiixmati ininyolo nochi tlacame quiixmati moyolo ta, huan yajaya quimati para tijmatiyaya? Huan yajaya techtlaxtlahuis sesen tojuanti queja quinamiqui ica tlen tijchijtoque. 13Notelpoca, xijcua sayolnectli pampa nel'ia cuali huan tijmatis para tzopelic. 14Queja nopa nojquiya moalma quimatis tlalnamiquilistli para nelcuali. Intla tijpantis tlalnamiquilistli, nochi quisas cuali para ta. Huan nochi tlen cuali timochiyayaya para panos, tijpantis. 15¡Intlacame tlen ax inquitlepanitaj TOTECO! Ayoc ximochiyaca icalteno se tlacatl tlen xitlahuac para inquichihuilise tlen fiero. Amo xijtlachtequilica tlen quipiya ipan ichaj. 16¿Ax inquimatij para se cuali tlacatl yonque inquitlaijiyohuiltise chicome hueltas, nochipa sampa motlalanas? Pero quema san setzi tlaijiyohuilistli inmechajsis inax cuajcualme, elis cuali para inmechtzontlamiltis. 17Amo xiyolpaqui quema mocualancaitaca huetzi ipan tlaohuijcayotl. Amo xijhuetzquili quema yajaya quipiya cuesoli, 18pampa TOTECO ax quipactis tlen tijchihua. Huelis cualanis ica ta huan ayoc quitlatzacuiltis ya. 19Amo ximocueso pampa ax tiitztoc queja ax cuajcualme, niyon amo xiquixtoca inintomi. 20Pampa ax tleno tlen cuali quipantise teipa. Ininyolis ax cuajcualme sehuis san queja se tlahuili. 21Notelpoca, xiquimacasi huan xijtlepanita TOTECO huan nopa tlanahuatijquetl. Amo ximomanelo ininhuaya tlacame tlen ax tlatlepanitaj. 22Intla tiquintoquil'ia, timopantis para timotzontlamiltijtoc ininhuaya, pampa ¿ajqueya quimati hasta canque TOTECO huan nopa tlanahuatijquetl quintlaijiyohuiltis? 23Nica eltoc tlalnamijca tlajtoli tlen quiijtojque tlacame tlen tlalnamiquij. Ax cuali para se tetlajtolsencajquetl tlachicoicnelis quema tetlajtolsencahuas. 24Intla quiilhuis tlen tlaixpanotoc: "Ax tijpiya tlajtlacoli", nochi tlacame quicualancaitase huan quitelchihuase. 25Pero se juez tlen tetlajtolsencahuas xitlahuac huan quintlatzacuiltis tlen nel'ia tlaixpanotoque, quiselis tlatiochihualistli. 26Se tlanahuatijquetl quinextil'ia miyac tlatlepanitacayotl se acajya tlen quinanquilis xitlahuac quema quitlajtlan'ia tlachque pano. 27Achtohui xijtlani nopa tomi tlen monequi para ica timopanoltis, teipa ximocualtlalili momil huan hasta teipa xijpehualti xijchijchihua mochaj. 28Amo ximochihua se testigo tlen quiijtos tlen ax neli tlen mocalnechca tlen xitlahuac nemi. Amo xitlacajcayahua huan xiistlacati tlen seyoc. 29Ax quema xiquijto: "Queja yajaya nechchijqui, na nojquiya nijchihuilis. Nijcuepilis ica nochi tlen fiero nechchihuilijtoc." 30Na nipanoc imila se tlacatl tlen tlatzihui. Quena, nipanoc ipan ixocomecamil se tlen huihuitic. 31Huan niquitac para tlahuel cuatitla eltoya ica huitztli huan xihuitl. Huan ya huetztoya nopa tepamitl tlen ica quitzactoya yahualtic. 32Huajca quema niquitac nochi ya nopa, nijtzontecontlali huan nimoyolilhui quej ni. 33Intla se moilhu'ia: "Noja se quentzi m'as nicochis huan nimosiyajcahuas. San se tlalochtli m'as nimomanajnahuas huan ax nitequitis." 34Tlen ya nopa quiijtohua ica se tlalochtli mochihuas se teicneltzi. Nimantzi itlaijiyohuilis huetzis ipani queja se tlaxtejquetl huala ipan se tlalochtli quema ax quichiya.

will be added

X\