Proverbs 21

1Queja se milchijquetl tlen quiatequ'ia imil quihuica nopa pilaojtzi campa quinequi ma yohui, queja nopa TOTECO quiyolpatla se tlanahuatijquetl para quiyacana campa ipaquilis. 2Nochi tlacame quiitaj para xitlahuac tlen quichihuaj, pero TOTECO quitlachil'ia sesen toyolo para quiitas para tlen tijchihuaj sesen tlamantli. 3M'as quipact'ia TOTECO quema tijchihuaj tlen xitlahuac huan tlen cuali, huan ax nopa tlacajcahualistli tlen tijmacaj. 4Aqui mohueyimati huan motlepanita, huan nopa ax cuajcualme tlen san moilhu'iaj tlen fiero hueli quichihuase, nochi tlajtlacolchihuaj. 5Aqui achtohui moilhu'ia ica miyac cuidado quejatza quichihuas se tlamantli quipantis para quisas cuali itequi huan yajaya moricojchihuas. Pero nopa tlacatl tlen momajcahua nimantzi huan quej hueli quichihuas se tequitl ax quicualtilis huan yajaya mochihuas se teicneltzi. 6Nopa tomi tlen se istlacatiquetl quitlani ica iistlacaticayo ax huejcahuas. Nochi tlen queja nopa quitlanij inintomi quitemohuaj miquistli. 7Nopa fiero tlamantli tlen quichihuaj ax cuajcualme quintzontlamiltis, pampa yajuanti ax quinequij quichihuase tlen xitlahuac. 8Tlacame tlen ax quitlepanitaj TOTECO nemij ipan se ojtli tlen huijcoltic, pero tlacame tlen cuajcualme mojmostla quichijtinemij tlen xitlahuac. 9M'as cuali para timocahuas moselti huejcapa ipan se tepanco o tlapamitl, huan ax ipan se cali yejyectzi ica se sihuatl tlen sencualantoc. 10Ipan iyolo se tlacatl tlen ax quitlepanita TOTECO quinequi quichihuilis icalnechca tlen fiero. Ax quema moilhu'ia para quitlasojtlas. 11Se tlen huihuitzi san motlalnamict'ia quema quinita quintlatzacuilt'iaj tlen tlahuihuiitaj. Pero quema se quitlacahualt'ia se tlen tlalnamiqui, nimantzi achi m'as mochihuas tlalnamiqui. 12TOTECO tlen itztoc xitlahuac quimati tlen fiero quichihuaj ax cuajcualme ipan ininchajchaj huan quichihuas para nenpolihuise. 13Se tlen ax quichihuil'ia cuenta se tlen teicneltzi quema quitlajtlan'ia se tlapalehuili, ax quipantis tlapalehuili quema yajaya iselti tlahuel quitemos. 14Se tlacatl huelis quiyoltlalis tlen tlahuel cualantoc ica se regalo ixtacatzi. Huan yonque se quinextijtoc miyac icualancayo, se tlaxtlahuili ixtacatzi quitlamiltis. 15Quinpact'ia cuajcuali tlacame quema tequitini tetlajtolsencahuaj xitlahuac. Pero quinchihuil'ia ma momajmatica miyac tlacame tlen ax quitlepanitaj TOTECO. 16Se tlen quitlahuelcahua itlalnamiquilis huan yohui ipan se ojtli tlen ax cuali, quipantis miquistli. 17Aqui san quinenpolohua itomi ica tlen hueli tlamantli tlen quipact'ia teipa mochihuas se teicneltzi. Huan aqui san mocohu'ia huino huan tlaajhuiyacayotl para ica quiajhuiyaltis itlacayo ax quema elis se tominpixquetl. 18Se tlacatl tlen ax cuali o tlen ax quitlepanita TOTECO, tlaijiyohuis ipatlaca se tlen cuali o tlen itztoc xitlahuac. 19M'as cuali para tiitztos moselti ipan se huactoc tlali, huan ax ihuaya se sihuatl tlen sencualantoc huan tlatelchihua. 20Se tlacatl tlen tlalnamiqui quiajcocui itomi huan tlen patiyo quipiya, pero se tlen huihuitic nimantzi quinenpolohua nochi tlen quipiya. 21Aqui quichihua campeca para quichihuas tlen nelxitlahuac huan para tetlasojtlas, quipiyas yolistli, ricojyotl huan tlatlepanitacayotl. 22Soldados tlen tlalnamiquini hueli quitlanise se altepetl yonque quipiya itlacajhua tlen tlahuel tejtetique. Quena, yonque yajuanti motemach'iaj ipan itepa nopa altepetl para quinmanahuis, tlalnamiquini hueli quitlamixolehuase. 23Se tlen quipiya miyac cuidado ica tlen quiijtohua, momanahuis para ax mocalaquis ipan cuesoli. 24Tlacame tlen onpano motlepanitaj, nojquiya tepinajt'iaj huan tehuihuiitaj pampa mohueyimatij. Nochi quinixmatij para tlen quintlal'iaj sequinoc para tlatzintla. 25Se tlacatl tlen tlatzihui tlahuel quiixtoca miyac tlamantli huan yeca tlatzintlanhuetzi. Pero ax quinequi tequitis ica ima huan quipiyas se yolistli tlen cuali. 26Tlen tlatzihui nochipa itztoc itzcuinti huan quinequi sequinoc ma quimacaca tlamantli. Pero tlacame tlen itztoque xitlahuaque quipiyaj hueyi ininyolo huan temajmacaj miyac tlamantli. 27TOTECO ax quinequi quiitas nopa tlacajcahualistli tlen ax cuajcualme quihualicaj. Huan achi m'as quincualancaita quema mochihuaj queja cuali ininyolo pero san quipiya ome ininxayac. 28Se testigo tlen istlacati iixpa se juez quinamiqui miquis. Pero se testigo tlen quitlacaquil'ia cuali tlen quitlajtlan'iaj huejcahuas para itztos pampa quiijtohua tlen xitlahuac. 29Se tlacatl tlen ax quitlepanita TOTECO san quiijtohua para nochi eltoc temachtli yonque ax neli, pero se tlacatl tlen itztoc xitlahuac quichihua se tlamantli ma eli temachtli pampa monejnemilt'ia cuali. 30Niyon se tlacatl hueli motlalis ihuaya TOTECO. Ax ipati intla tlahuel tlalnamiqui, o quimachil'ia miyac tlamantli o tlahuel quicaqui consejos. 31Ica miyac cuidado se tlacatl hueli quicualtlalis nochi tlen monequi para quihuicas ipan se tlatehuijcayotl, pero yajaya TOTECO tlen quichihuas para tlatlanis.

will be added

X\