Proverbs 20

1Tlen quii huino huan tlaili tlen cococ mochihua se tlen tlahuihuiita huan tlatehu'ia. Tlen moihuint'ia ica tlaili nel'ia huihuitic. 2Se tlanahuatijquetl tlen tlahuel cualani hasta mosisin'ia eli queja nanalca se le'on tecuani. Huan tlen quicualancamaca, quipolohua iyolis. 3Tlacame quitlepanitaj se tlen moiyocacahua tlen tlanajnanquilistli, pero se tlen huihuitic ajachica quinequi quipehualtis cualantli. 4Se tlacatl tlen tlatzihui ax momilt'ia quema ipohual, huan ax tleno quipiya quema ajsi tonali para pixquistli. 5Huejcatla ipan iyolo sesen tlacatl eltoc nopa tlamantli tlen yajaya achi m'as quiita para ipati huan tlen yajaya quinequi quichihuas, huan tlen tlalnamiqui quimati quejatza quipalehuis para tematiltis. 6Miyac tlacame mitzilhuise para huelis timotemachis ipan yajuanti para elise monelhuampoyohua ipan tlen hueli tlalochtli, pero nel'ia ohui para tijpantis se tlen hueli ipan timotemachis. 7Tlacame tlen cuajcualme monejnemilt'iaj xitlahuac, huan TOTECO quintiochihuas ininconehua tlen mochihuase queja inintatahua. 8Quema se tlanahuatijquetl mosehu'ia ipan caltlanahuatili para tetlajtolsencahuas, quitlachil'ia ica miyac cuidado sesen tlamantli tlen tlacame quiilhu'iaj para huelis quitlamiltis tlen ax cuali. 9Axaca ica iselti huelis quiijtos: "Nimoyolpajpactoc huan ama ax nijpiya niyon se notlajtlacol." 10TOTECO ax quinequi quiitas niyon se tlayejyecoli tlen ax ajsitoc. Quicualancaita tlen quitequihu'ia ome hilos para quiyejyecos tlali o ome tlamantli tetini para ax temacas se kilo ajsitoc. 11Intla cuali quichijtinemi se tlacatl, yonque yajaya se conetl, nochi quiixmatij para itztoc xitlahuac. Nochi quiitaj intla monejnemilt'ia queja monequi huan intla tlapajpactic iyolo iixpa TOTECO. 12TOTECO techmacatoc tonacas para hueli titlacaquise huan toixtiyol para huelis titlachiyase. Nochi ome quisencajtoc TOTECO. 13Amo xijnequi san tisencochtos para ax timochihuas se titeicneltzi. M'as cuali xiisa cualca huan xitequiti chicahuac para tijpiyas nochi tlen tijnequi para tijcuas. 14Se tlacojquetl quema tlacohua quiijtohua: "Ya ni ax cuali", para ma quitemohuilise ipati, pero quema ya quicojtoc se tlamantli, camati cuali pampa quipantijtoc tlen nelcuali. 15Onca oro huan piltetzitzi tlen yejyectzitzi tlen nel'ia patiyo ipan ni tlaltepactli, pero achi m'as ipati se tlacatl tlen tlalnamiqui huan tlen camati ica tlajtoli tlen senquistoc cuali. 16Intla se tlacatl mocuilt'ia para tlaxtlahuas ipampa seyoc yonque ax quiixmati o yajaya se huejca ejquetl, xijpiya miyac cuidado ica ya. Achi cuali xijcuilica itlaque o tlen ipati tlen iaxca hasta mitztlamitlaxtlahuis. 17Tlen istlacati para mocuilis se pantzi o quiichtequi nel'ia quiajhuiyacmati, pero teipa ipan icamac mocuepa queja cuanextli. 18Amo xijtlamisencahua tlen tijchihuas hasta timotlajtlanijtoc ica sequinoc intla cuali tlen timoilhu'ia. Amo xicalaqui ipan se tlatehuijcayotl hasta tiquintlajtlanijtoc sequinoc para ma mitzconsejomacaca. 19Se tlen quipact'ia tetlaijilhu'ia ax hueli quiajcocui se tlajtoli tlen tijpohuilis ixtacatzi, huajca m'as cuali amo ximohuampochihuas ihuaya. 20Se tlacatl tlen quitelchihua itata o inana miquis ipan tzintlayohuilotl campa m'as temajmati. 21Se tlen quitlani miyac tlamantli ipan se tlalochtli quema san se telpoca tlacatl, ax neli se tlatiochihualistli pampa aya quimati quejatza quimocuitlahuis. 22Amo ximoilhui para timomacuepas ica tlen mitzchihuil'iaj tlen fiero. M'as cuali xijcahuili imaco TOTECO huan yajaya quisencahuas cuali huan mitzmanahuis. 23TOTECO ax quinequi quiitas tlayejyecoli tlen ax ajsi. Ax cuali tlen quiyejyecohua se tlamantli huan tlacajcayahua. 24San TOTECO quiijtohua tlachque tijpantise ipan toojhui, huajca ┬┐quejatza hueli titlacame tijmachil'iaj tlen techpanotihuala ipan toyolis? 25Mahuilili para se acajya quitencahua iixpa TOTECO para quimacas se tlamantli, huan teipa motlajtlan'ia intla nel'ia quinequi quichihuas quema ya moijilpitoc para quichihuas. 26Se tlanahuatijquetl tlen tlalnamiqui quinitzquis ax cuajcualme huan quintlatzacuiltis chicahuac. 27TOTECO techmacatoc totonal tlen quiixmati nochi tlen timoilhu'iaj ipan toyolo. Eltoc queja se tlahuili tlen quitemojtinemi nochi tlen eltoc topani. 28Se tlanahuatijquetl tlen quinicnel'ia itlacajhua huan quinchihuil'ia tlen xitlahuac, quipiya tequihuejcayotl ipan se itlanahuatilis tlen nel'ia temachtli. 29Telpocame mohueyimatij pampa quipiyaj fuerza, huan tlen huehuentzitzi paquij pampa ya quiaxitijque miyac xihuitl huan cuaichyoltoque. 30Se tlatzacuiltili tlen nel'ia chicahuac ipan itlacayo se tlen ax cuali eltoc queja se pajtli huan quichihua para ma moyolpatlas. Eltoc queja nopa tlatzacuiltili quipajpaca hasta ipan iyolo.

will be added

X\