Proverbs 19

1M'as cuali se tlacatl teicneltzi tlen monejnemilt'ia xitlahuac huan ax se huihui tlacatl tlen ax quitlepanita TOTECO. 2Mahuilili intla se acajya nimantzi quinequi quichihuas se tlamantli tlen ax quimati. Huelis nima huetzis ipan tlajtlacoli. 3Se tlacatl ica ihuihuiyo quicuapolohua iojhui tlen cuali, huan teipa quitlajtlacolt'ia TOTECO ica tlen quipanotoc. 4Se tlacatl tlen tominpiya quinpiya miyac ihuampoyohua, pero se tlen teicneltzi hasta ihuampoyohua quitlahuelcahuaj. 5Se testigo tlen san tlacajcayahua quiselis itlatzacuiltilis, huan tlen istlacatij iixpa se juez ax huelise momanahuise. 6Miyac tlacame quitemohuaj se tlen hueyi iyolo ica tlen teicneltzitzi para ma quinchihuili se favor. Nochi quinequij mohuampochihuase ihuaya. 7Intla hasta iicnihua se teicneltzi quitlahuelcahuaj, huajca achi m'as ihuampoyohua ax quinequise quiitase. Tlen teicneltzi quintemohua huan quinnojnotza ihuampoyohua, pero yajuanti ax quichihuil'iaj cuenta. 8Se tlen mochijtoc tlalnamiqui moicnel'ia. Huan se tlacatl tlen quichihua campeca para mojmostla quimachilis m'as quisas cuali ipan nochi tlen quichihua. 9Se testigo tlen quiijtohua tlen ax melahuac iixpa se juez quiselis se tlatzacuiltili. Huan aqui istlacati mocuapolos para nochipa. 10Ax cuali nesi para se tlen huihuitic mohueyichihuas huan quipiyas miyac ricojyotl. Niyon ax nesi cuali para se tequihuejquetl quinnahuatis tlanahuatiani tlachque ma quichihuaca. 11Se tlacatl tlen tlamachil'ia ax yolquentzi. Tlacame quitlepanitaj pampa ax quichihuil'ia cuenta quema sequinoc quiixpanoj. 12Icualancayo se tlanahuatijquetl nelmahuilili queja tijcaqui nanalca se le'on tecuani monechca. Pero quema se tlanahuatijquetl quipiya hueyi iyolo huan quinequi tepalehuis, temaca paquilistli queja ajhuechtli tlen huetzi ipan sacapetlatl. 13Se telpocatl tlen huihuitic quimaca itata miyac tlacuajcualocayotl. Huan se sihuatl tlen mojmostla monajnanquil'ia ica ihuehue itztoc queja se tlacuajcualocayotl tlen ax caxanis. 14Se tetat hueli quiaxcatis icone se cali huan nochi tlamantli tlen ica moricojchihuas, pero san TOTECO hueli quimaca se tlacatl isihua tlen cuali itlalnamiquilis. 15Nopa tlacatl tlen tlatzihui tlahuel cochi, pero teipa tlahuel mayana pampa ax tequitqui. 16Aqui quintlepanita itlanahuatilhua TOTECO quimocuitlahu'ia iyolis, pero aqui quintlahuelcahua itlanahuatilhua miquis. 17Quema se quipalehu'ia tlen teicneltzi eltoc queja quitlanejtisqu'ia TOTECO. Huan yajaya mitztlaxtlahuis para nochi tlen cuali tijchijtoc. 18Xiquinxitlahua moconehua quema noja onca pajtli quema aya quipiyaj miyac xihuitl. Intla ax tiquintlalnamictis eltoc queja tijnequi ma miquica. 19Se tlacatl tlen nochipa cualantoc quiselis nopa tlatzacuiltili tlen quinamiqui, huan intla tijmanahuis para ax quipantis, noja m'as fiero elis tlen quichihuas. 20Xijtlacaquili nochi consejos huan xijseli inintlajtol tlen mitztlacahualt'iaj, huan tijpiyas miyac tlalnamiquilistli tlen huejcahuas nochi moyolis. 21Se tlacatl hueli moyolilhu'ia tlen miyac tlamantli para quichihuas, pero tlen TOTECO quiijtojtoc para oncas, ya nopa tlen panos. 22Tlacame tlen tetlasojtlaj quipiyaj yolpaquilistli. M'as cuali tielis se teicneltzi huan ax se istlacatiquetl. 23Tlen quiimacasi huan quitlepanita TOTECO quipantis yolistli. Nojquiya quipiyas temachili huan momanahuis ica tlen ax cuali. 24Itztoque sequin tlen tlahuel tlatzihuij hasta ax quinequij momatlalanase para motlamacase. 25Quema se juez quihuitequi tlen quinhuihuiita nochi tlacame, sequinoc huihuime quichihuilise cuenta huan moxitlahuase. Huan intla quitlacahualtis se tlen tlamachil'ia, yajaya noja m'as tlalnamiqui mochihuas. 26Telpocame tlen quinmaquil'iaj inintatahua o quintojtocaj ininnanahua, nel'ia mopinahualtijtoque iniixpa nochi sequinoc huan quinpinahualtijtoque inintatahua. 27Notelpoca, intla ayoc tijtlacaquil'ia quema seyoc mitztlalnamict'ia, timohuejcatlal'ia tlen tlalnamiquilistli. 28Nopa testigo tlen istlacati iixpa se juez quinhuetzquil'ia tlen quinequij tlajtolsencahuase xitlahuac. Nochi tlen quiijtohuaj ax cuajcualme eltoc fiero. 29Tlatzacuiltilistli quinchiya tlen quinhuihuiitaj sequinoc. Huan quinhuitequise tlen huihuime ipan inincuitlapa miyac hueltas.

will be added

X\