Proverbs 17

1M'as cuali para quipiyase san tochoj para quicuase ipan se cali campa onca tlasehuilistli, huan ax para quipiyase miyac tlacualistli ipan se cali campa nochi mocualan'iaj. 2Se tequihuejquetl tlen tlalnamiqui quipiyas tequihuejcayotl para quinahuatis itelpoca iteco tlen ax tlatlepanita. Nopa cuali tequihuejquetl quixejxelos ininhuaya nopa icnime tlen iteco quicajtehuas. 3Ica tlitl quipajpacaj plata huan oro para ma mocahua senquistoc cuali, pero yajaya TOTECO quiyejyecohua huan quipajpaca toyolo. 4Ax cuajcualme huan istlacatini quitlacaquil'iaj tlajtoli tlen fiero. Quichihuil'iaj cuenta inintlajtol tlacame tlen quinequij quintzontlamiltise sequinoc. 5Aqui quipinajt'ia tlen teicneltzi quiixpano TOTECO. Huan nochi tlen quihuetzquil'iaj se tlen tlaijiyohu'ia, TOTECO temachtli quintlatzacuiltis. 6Se huehue tlacatl yolpaqui ipampa iixhuihua. Coneme yolpaquij ipampa inintatahua. 7Ax quinamiqui para se huihui tlacatl camatis ica miyac tlalnamiquilistli. Huan niyon quentzi quinamiqui para se tlanahuatijquetl para istlacatis. 8Se tlen quitlaxtlahuis se tequihuejquetl ixtacatzi para quipalehuis moilhu'ia para quipiya suerte. Moilhu'ia para nochi quisa cuali para ya campa hueli yohui. 9Aqui ax tenextil'ia itlajtlacol ihuampo tlen quiixpano quipiya teicnelijcayotl, pero aqui ajachica tematilt'ia quihuejcatlal'ia ihuampo. 10Se tlen tlalnamiqui m'as nimantzi moxitlahua quema seyoc san se quentzi quitlacahualt'ia, huan ax queja moxitlahua se tlen huihuitic yonque quimaquilise cien hueltas ipan icuitlapa. 11Tlacame tlen ax tlatlepanitaj quitemohuaj tlen ax cuali para quichihuase, pero TOTECO quintitlanilis itlayolmelajca tlen temajmati para quintlatzacuiltis chicahuac. 12M'as cuali elisqu'ia intla timonamiquisqu'ia ica se tenan osa tlen quiichtequilijtoque ipilconehua, huan ax ica se tlen huihuitic tlen quinextijtoc ihuihuiyo iniixpa miyac tlacame. 13Tlen quicuepilis ica tlen ax cuali se tlen quichihuilijtoc tlen cuali, nochipa quipiyas tlatelchihualistli ipan ichaj. 14Se tlen quipehualtis se cualantli eltoc queja se tlen quitzintlapos se atemitl para ma pano ipan ichaj, elis ohui teipa para quiquetzas. Huajca achi cuali xijcahua se tlamantli huan amo xijpehualti para ximonajnanquili ica seyoc. 15TOTECO quincualancaita tlen quitlapojpolhu'iaj se tlen melahuac quihuica tlajtlacoli, huan nojquiya quincualancaita tlen quitlatzacuilt'iaj se tlen ax tleno quichijtoc. 16San tlapic para titlaxtlahuas para ma momachtis m'as se tlen huihuitic, tlen ipan iyolo niyon se quentzi tlalnamiquilistli ax quipiya o quinequi. 17Se tlen tocualhuampo temachtli techicnel'ia nochipa. Quema onca tlaohuijcayotl techpalehu'ia queja elisqu'ia se toicni. 18Ax quipiya tlalnamiquilistli tlen quiijtos quiixtlahuas tlen ihuampo tlahuica. Huihuitic tlen mocuilt'ia quiixtlahuas tlen seyoc tlahuica, o temacas ifirma para seyoc. 19Aqui quipact'ia tlanajnanquilis quipact'ia tlajtlacolchihua. Aqui mohueyimati ica iselti motemol'ia tlaohuijcayotl. 20Se tlen fiero iyolo ax quema quipantis tlen cuali, huan se tlen tlacajcayajtinemi ica tlen quiijtohua quipantis tlen ax cuali. 21Nel'ia se hueyi cuesoli quipantis itata se telpocatl tlen tlahuel huihuitic. Ax quema yolpaquis itata se tlen ax tlatlepanita. 22Yolpaquilistli tepalehu'ia queja elisqu'ia se cuali pajtli. Pero quema se tlacatl moyolcuesohua quitlamilt'ia ichicahualis queja se cocolistli tlen quihuatza iomiyo. 23Tequitini tlen ax cuajcualme quisel'iaj tlaxtlahuili ixtacatzi, huan yeca ax xitlahuac quema tetlajtolsencahuaj. 24Tlacame tlen tlalnamiquij quimelac itaj tlalnamiquilistli pampa quinequij quipiyase m'as, pero tlen huihuitique campa hueli tlachixtiyohuij pampa ax quimatij tlen quinequij. 25Se telpocatl tlen ax quitlepanita TOTECO quincuesolmaca itatahua. Quichihua ininyolis ma eli ohui. 26Ax quinamiqui para se quitlalilis tlatzacuiltili se tlen ax tlaixpanotoc. Niyon ax quinamiqui quihuijhuitequise se tlen nemi xitlahuac. 27Se tlen quimocuitlahu'ia icamac para ax camatis tlahuel, yajaya quipiya tlalnamiquilistli. Se tlacatl tlen quimachil'ia miyac tlamantli ax nimantzi cualani. 28Yonque huihuitic, se tlacatl nesi para tlalnamiqui intla ax molin'ia. Quema se quitzacua icamac nesi queja tlamachil'ia.

will be added

X\