1 Tojuanti hueli tijcualtlalise ipan toyolo tlachque tijchihuase, pero TOTECO quiijtos intla cuali o axtle para tijchihuase tlen timoilhuijtoque. 2 Se tlacatl quiita nochi tlamantli tlen quichihua para cuali, pero TOTECO quitlachil'ia iyolo huan quiita para tlen quichijtoc sesen tlamantli. 3 Nochi tlen ta timoilhu'ia para tijchihuas xijcahuili imaco TOTECO para mitzyacanas, huan yajaya mitzpalehuis para quisas cuali tlen timoilhuijtoc. 4 TOTECO quichijchijqui nochi tlamantli para ma quitlamilti ipaquilis. Quinchijchijtoc fiero tlacame para ma quiselica inintlaijiyohuilis ipan nopa tonal tlen ax cuali. 5 TOTECO quincualancaita nochi tlacame tlen mohueyimatij, huan temachtli quiselise inintlatzacuiltilis. 6 Para se quixitlahuas tlen tlajtlacolchihua monequi miyac teicnelijcayotl huan tlajtoli tlen melahuac. Huan quema yajaya pehuas quiimacasis huan quitlepanitas TOTECO, moiyocatlalis ica tlamantli tlen ax cuali. 7 Quema iojhui se tlacatl quipact'ia TOTECO, hasta icualancaitacahua nojquiya moyoltlalise ica nopa tlacatl. 8 M'as paqui se tlacatl tlen quipiya pilquentzi tomi, pero monejnemilt'ia xitlahuac, que se tlen quitlantoc miyac tomi pampa tlacajcayahua. 9 Tojuanti hueli timoyolilhu'iaj canque cuali tiyase, pero yajaya TOTECO tlen quiijtohua intla nopano tiyase o axtle. 10 TOTECO quipalehu'ia se tlanahuatijquetl para quiijtos tlen xitlahuac quema tetlajtolsencahua, huajca ax quinamiqui para istlacatis huan mocuapolos. 11 TOTECO quinequi para nochi tlayejyecoli huan tlatamachihuali tlen motequihuijtoc ma eli xitlahuac. Yajaya TOTECO tlen quichihua nochi tlanahuatili huan nochi tlacame monequi quichihuase tlen yajaya quiijtojtoc. 12 TOTECO ax quinequi quiitas se tlanahuatijquetl tlen quichihuas tlen ax cuali, pampa se tlen quipiya tequiticayotl monequi itztos xitlahuac para itlanahuatilhua ma quipiya chicahualistli. 13 Tlanahuatiani yolpaquij quema inintlacajhua quiijtohuaj tlen xitlahuac. Quinicnel'iaj tlen quinyolmelahuaj senquistoc tlen panoc. 14 Icualancayo se tlanahuatijquetl huelis quichihuas para ma miqui se tlacatl, pero se tlen tlalnamiqui quiyoltlalis. 15 Tlacame tlen quichihuaj tlen quipact'ia se tlanahuatijquetl quisel'iaj miyac tlamantli tlen cuali. Yajuanti paquij queja quema se quiita para huala mixtli quema ax tlaahuetztoc para miyac tonali. 16 Nel'ia m'as cuali intla tijtemos tlalnamiquilistli huan para tijmachilis miyac tlamantli, huan ax oro niyon plata. 17 Iniojhui tlen itztoque xitlahuaque quitlahuelcahua campa onca tlen ax cuali. Aqui momocuitlahu'ia para ax quichihuas tlen ax cuali quimocuitlahu'ia iyolis. 18 Aqui achtohui mohueyimati, teipa motepotlamis, huan aqui achtohui motlepanita teipa huetzis huan tlahuel mococos. 19 M'as cuali timoechcapantlalis huan tiitztos ininhuaya teicneltzitzi, huan ax para timochihuas tlen titlapijpiya ica tlamantli tlachtectli ininhuaya tlen mohueyimatij. 20 Se tlacatl tlen quitlacaquil'ia tlamachtili quipantis tlen cuali. Huan TOTECO quintiochihuas tlen ipan ya motemach'iaj. 21 Tlalnamiquini moixmajtoque pampa quimachil'iaj miyac tlamantli. Huan tlen quitequihu'iaj cuajcuali tlajtoli quema camatij achi m'as mochihuaj tlalnamiquini. 22 Intla tijpiya tlamachilistli para timonejnemiltis nel'ia cuali, eltoc queja se ameli moyoltipa tlen temaca se yolistli tlen yejyectzi. Pero nojquiya huihuitique tlen quichihuaj campeca quinxitlahuase tlen huihuitique. 23 Pampa cuali itzonteco se tlacatl tlen tlalnamiqui, momocuitlahu'ia ica tlen quiijtohua. Cuali quimati para teseseltis huan teyolpitzahua ica itlajtol queja quinamiqui. 24 Tlajtoli tlen yamanic eltoc queja nectli. Quichihuas m'as tzopelic moyolis huan eltoc queja se pajtli tlen temaca chicahualistli. 25 Onca se ojtli tlen tlacame quiitaj para cuali huan xitlahuac, pero nopa ojtli quinhuicas xitlahuac campa mictla. 26 Quema mayana se tequitiquetl, quipalehu'ia. Quichihua nopa tequitiquetl ma tequiti cuali para quipiyas itlacualis. 27 Se tlacatl tlen ax quitlepanita TOTECO quitemohua tlen ax cuali tlen sequinoc quichijtoque para quiixnextis. Icamac eltoc queja se tlilelemectli tlen quitlat'ia nochi. 28 Se tlacatl tlen ax quitlepanita TOTECO quiyolit'ia cualantli. Huan se tlen tetlaijilhu'ia quinxelohua tlen monelhuampochijtoque. 29 Se tlacatl tlen fiero iyolis quicajcayahua hasta inelhuampo. Quihuica ipan ojtli tlen ax cuali. 30 Ijcopi iixtiyol quema moyolilhu'ia para quichihuas tlen ax cuali. Motennatzcua para quinequisqu'ia ma mochihua tlen fiero moilhu'ia. 31 Nopa cuaichtli eli queja se xochi corona para se tlacatl tlen ya huehuejtixtoc, huan mopant'ia campa tlacame tlen monejnemilt'iaj xitlahuac. 32 M'as cuali tlen quipiyas iyolo huan ax cualani que tlen itztoc tetic. M'as cuali tlen monahuatis ica iselti para ax quichihuas tlen fiero, que se tlen quitlanis se altepetl. 33 Se tlacatl huelis quimajcahuas nopa piltetzitzi para quitemos isuerte, pero eltoc TOTECO tlen quiijtohua tlen panos ipan iyolis.
