Proverbs 15

1Quema se acajya quinanquil'ia ica yejyectzi seyoc tlen cualantoc, nimantzi quiseselt'ia. Pero intla quinanquilis chicahuac, achi m'as quicualancamacas. 2Se tlen tlalnamiqui quicualtlal'ia tlen tlamacht'ia para ma quiyoliti paquilistli. Pero se tlen huihuitic san camati huihuiyotl tlen ax tleno ipati. 3TOTECO itztoc campa hueli huan quitlachil'ia tlachque quichihuaj nochi tlacame. Quintlachil'ia tlen quichihuaj tlacame tlen ax quitlepanitaj TOTECO huan tlen quichihuaj cuajcualme. 4Se tlacatl tlen camati ica tlajtoli tlen yamanic temaca se yolistli tlen cuali. Pero tlen quiijtohua tlajtoli tlen tecajcayahua nel'ia teyolcocohua. 5Se telpocatl tlen huihuitic ax quinequi quitlacaquilis itata quema quitlacahualt'ia. Pero se tlen tlalnamiqui, yajaya quena. Quicaqui huan quichihua tlen itata quiilhu'ia. 6Ipan ichaj se tlacatl tlen itztoc xitlahuac onca miyac tlen ica panos. Pero se tlacatl tlen ax quitlepanita TOTECO san quitlani tlaohuijcayotl. 7Tlen quiijtohuaj tlalnamiquini temaca tlalnamiquilistli. Pero tlacame tlen ax quitlepanitaj TOTECO ax quipiyaj tlalnamiquilistli para temaca. 8TOTECO ax quinequi quiitas nopa tlacajcahualistli tlen fiero tlacame quimacaj. Pero quimaca miyac paquilistli quema momaijtohuaj tlacame tlen itztoque xitlahuaque iixpa. 9TOTECO ax quinequi quiitas nopa ojtli tlen ipan nemij ax cuajcualme. Pero yajaya quinicnel'ia tlen quinequij quitoquilise tlen nelxitlahuac ipan nochi tlen quichihuase. 10Intla se quicajtehuas iojhui TOTECO para quichihuas tlen fiero, TOTECO quitlalnamictis. Pero intla se ax quinequis quicualtlalis iyolis quema TOTECO quixitlahua, TOTECO quitzontlamiltis. 11TOTECO quiita nochi tlen pano ica tlen mopant'iaj campa teostotl huan campa mictla, pero noja m'as quimati sesen piltlamantzitzi tlen eltoc ipan ininyolo tlacame. 12Se tlen tlahuihuiita ax quiicnel'ia tlen quitlacahualt'ia huan quinequi quixitlahuas. Ax quinequi quinnechcahuis tlen tlalnamiquij pampa ax quinequi ma quiixcoilhuica para ax cuali tlen quichihua. 13Se tlen yolpactoc, tenextil'ia ipaquilis pampa huetzca, huan se tlen moyolcuesojtoc, nimantzi quinext'ia ipan ixayac. 14Iyolo se tlacatl tlen tlalnamiqui tlahuel quinequi quimachilis m'as tlamantli. Pero se tlen huihuitic san moixhuit'ia ica m'as huihuiyotl. 15Se tlacatl tlen yolcuesihui quiita nochi tonali para nelfiero, pero se tlen yolpactoc, mojmostla quiita queja elisqu'ia ilhuitl. 16M'as cuali para se tlacatl elis teicneltzi huan quiimacasi huan quitlepanita TOTECO, huan ax para quipiyasqu'ia miyac tomi ica yolcuesoli. 17Achi m'as cuali se quicuas san quilitl ipan se cali campa onca tlaicnelijcayotl, huan ax quicuas toro nacatl campa onca cualantli. 18Se tlacatl tlen nimantzi cualani quintehu'ia sequinoc, pero se tlen quipiya iyolo, yajaya quinseselt'ia. 19Se tlen tlatzihui quiohuijmati nochi tlamantli ipan ni yolistli huan quinita nochi tlamantli queja huitztli tlen ohui para quinpanos, pero tlacame tlen quichihuaj tlen xitlahuac quiitaj para ax ohui nopa tlamantli tlen quinixnamictihuala. Ininyolis eltoc queja se ojtli tlen patlahuac. 20Se telpocatl tlen tlalnamiqui quinmaca miyac paquilistli itatahua, pero se tlen huihuitic quincualancaita. 21Se tlen ax tlalnamiqui mopaquilismaca ica nochi huihuiyotl tlen quichihua, pero se tlen quimachil'ia miyac tlamantli quichihua campeca para moxitlahuas huan quitoquilis nopa ojtli tlen cuali. 22Quema se acajya quinequi quichihuas se tlamantli pero ax motlajtlan'ia quejatza quichihuas o intla cuali para quichihuas, ax quisa cuali itequi. Pero quema se motlajtlan'ia miyac consejos tlen tlalnamiquini, nochi tlen quichihua quisa cuali. 23Nochi tlacame quinpact'ia quema se tlananquil'ia cuali huan tepalehu'ia tlamachilise m'as. Nel'ia yejyectzi quema se acajya quimati quejatza quicamahuis se tlen quipiya cuesoli huan quiilhuis tlen quinamiqui ipan nopa tlalochtli quema monequi. 24Tlacame tlen tlalnamiquij quitoquil'iaj nopa ojtli ica huejcapa tlen tehuica elhuicac campa onca yolistli. Yajuanti quihuejcacajtoque nopa ojtli tlen tehuica mictla. 25TOTECO quixolehuas ininchaj tlacame tlen mohueyimatij huan nochi tlamantli tlen quipiyaj, pero yajaya quimocuitlahu'ia nochi tlen iniaxca cahual toahuihua. 26TOTECO ax quinequi quiitas tlen fiero moyolilhu'iaj ax cuajcualme, pero quipiya paquilistli ica tlen quiijtohuaj tlacame tlen yoltlapajpactique pampa cuali inintlajtol. 27Se tlacatl tlen quinequi tlacajcayahuas huan moaxcatis tlen seyoc iaxca quihualicas tlen fiero ipan ichampoyohua, pero aqui ax quiselis tomi tlen ax quitlantoc itztos ica cuali. 28Se tlacatl tlen itztoc xitlahuac iixpa TOTECO moyolilhu'ia quejatza tlananquilis queja quinamiqui, pero se tlacatl tlen ax quitlepanita TOTECO ontlananquilijtiquisa nimantzi ica tlajtoli tlen ax cuali. 29TOTECO mohuejcatlalijtoc tlen tlacame tlen fiero ininyolis, pero quintlacaquil'ia quema momaijtohuaj tlacame tlen itztoque xitlahuaque iixpa. 30Quema se acajya ixpaqui, quinchihua sequinoc ma quipiyase paquilistli ipan ininyolo, huan quema se quihualica se tlajtoli tlen cuali, quinmaca tlacame chicahualistli hasta ipan iniomiyo. 31Nopa tlacatl tlen quichihuil'ia cuenta quema seyoc quimacas consejo para quimanahuis iyolis, teipa mopantis ininhuaya tlen nel'ia tlalnamiquij. 32Tlen ax quichihuil'ia cuenta tlen quinequi quitlalnamictis, ica iselti mochihuil'ia tlen fiero. Pero se tlen quitlacaquil'ia quema seyoc quixitlahuasnequi, quimachilis miyac tlamantli. 33Intla tiquimacasi huan tijtlepanita TOTECO, yajaya mitzchihuas tielis titlalnamiqui. Huan tlen moechcapantlal'ia iixpa ya, teipa quipantis tlatlepanitacayotl.

will be added

X\