Proverbs 14

1Se sihuatl tlen tlalnamiqui mojmostla quisencahua ichaj para ma eli m'as cuali, pero se tlen huihuitic quixolehua ichaj ica tlen quichihua. 2Tlen monejnemilt'ia ipan nopa ojtli tlen xitlahuac quiimacasi huan quitlepanita TOTECO. Pero se tlen necuiltic nemi ax quinequi quiitas. 3Itlajtol se huihui tlacatl quihualiquil'ia tlatzacuiltili. Pero inintlajtol tlalnamiquini quinmocuitlahu'ia tlen ax cuali. 4Quema ax onca torojme para tlaxahuase, ax oncas trigo ipan cuacali para pantzi. Pero quema onca torojme tlen tequitij ica nochi ininchicahualis, momiyaquilis pixquistli. 5Se testigo tlen temachtli ax quema istlacatis, pero se testigo tlen quipact'ia tlacajcayahua, mojmostla istlacati. 6Se tlen tlahuihuiita ax quema quipantis tlalnamiquilistli yonque quiijtohua quitemohua. Pero se tlen quimachil'ia miyac tlamantli, yajaya ax ohui quipant'ia tlalnamiquilistli. 7Ximohuejcatlali ica tlen quichihua se tlacatl tlen huihuitic, pampa yajaya ax mitznextilis niyon se tlamantli tlen cuali. 8Se tlen tlalnamiqui yajaya moilhu'ia tlen imelac huala ipan iojhui. Pero se tlen huihuitic mocajcayahua ica iselti ica ihuihuiyo. 9Tlen huihuitique san huetzcaj quema tlajtlacolchihuaj. Pero tlacame tlen xitlahuac nemij quipiyaj ipan ininyolo para monejnemiltise noja m'as xitlahuac. 10Sesen tlacatl quimati nopa cuesoli o nopa paquilistli tlen quipiya ipan iyolo. Huan axaca huelis quimachilis senquistoc tlen seyoc quimati. 11Nopa yejyectzi cali tlen ax cuajcualme quipiyaj xolehuis. Pero yonque tlacame tlen xitlahuaque san quipiya ininchaj tlen teicneltzi nochi elis cuali para tlen nopano itztoque. 12Onca ojtli tlen tlacame moilhu'iaj para xitlahuac, pero tlen yohuij ipan nopa ojtli quipantise miquistli. 13Huan yonque huetzca se acajya, hueli onca tlen quiyolcocohua miyac. Huan quema tlami huetzca, noja quimachil'ia nopa cuesoli. 14Ax cuajcualme mocahuaj cuesijtoque ica nochi tlen fiero quichihuaj. Pero nochi tlen quichihua se cuali tlacatl quitemit'ia iyolo ica paquilistli. 15Se tlen huihuitic nimantzi quineltoca nochi tlen ihuampoyohua quiilhu'iaj ma quichihua, pero se tlacatl tlen tlalnamiqui moilhu'ia intla cuali para quichihuas se tlamantli o axtle. 16Se tlen tlalnamiqui quiimacasi tlen ax cuali huan mohuejcatlal'ia. Pero se tlen huihuitic mochihua queja ax tleno quiimacasi huan momajcahua san quej hueli campa tlamantli mahuilili. 17Se tlacatl tlen yolquentzi nimantzi cualani huan quichihua tlamantli tlen ax quinamiqui. Huan nochi tlacame quicualancaitaj se tlen moyolilhu'ia quejatza huelis tecocos o tecajcayahuas. 18Tlen huihuitique san quipiyaj huihuiyotl ipan inintzonteco, pero tlen tlalnamiquij yajuanti quipiyaj tlalnamiquilistli queja se corona yejyectzi tlen quihuicaj ipan inintzonteco. 19Fiero tlacame moixhuijtzomase iniixpa cuajcualme. Quena, motlancuaquetzase iniixpa tlen quichihuaj tlen xitlahuac huan quintlajtlanise tlapalehuili. 20Ica tlacame tlen teicneltzitzi hasta ininteixmatcahua ax quinequij quinitase. Pero tlapijpiyani quipiyaj miyac ininhuampoyohua. 21Tlajtlacolchihua tlen ax quinequi quiitas se tlen icalnechca. Pero hueyi ipaquilis se tlacatl tlen quintlasojtla tlen teicneltzitzi huan quinpalehu'ia. 22Tlen moyolilhu'iaj san tlen ax cuali huelise quinchihuase mocuapolose, pero tlen moyolilhu'iaj tlen cuali huelise quichihuase quipantise tlaicnelili huan tlen temachtli. 23Tlen tequitij cuali quiselise inintlaxtlahuil. Pero tlen san camatij huan ax quichihuaj inintequi mocahuase teicneltzitzi. 24Nopa ricojyotl tlen tlacame tlen tlalnamiquij quitlanij quinhualiquil'ia miyac tlatlepanitacayotl. Pero tlen huihuitique san quitlanij m'as huihuiyotl. 25Se testigo tlen quiijtohua tlen melahuac quinmanahu'ia ininyolis tlacame tlen ax tleno quichijtoque. Pero se testigo tlen tlacajcayahua san istlacati. 26Tlacame tlen quiimacasij huan quitlepanitaj TOTECO itztoque ica temachili, huan ipan TOTECO nojquiya ininconehua momanahuise. 27Quema se tlacatl quiimacasi huan quitlepanita TOTECO eltoc queja se ameli tlen temaca se cuali yolistli, huan quimanahuis tlen eltoc nechca miquistli. 28Quema nel'ia momiyaquil'iaj tlacame ipan se tlali, inintlanahuatijca mohueyichihuas. Pero quema mocahuaj san se quesqui tlacame ipan itlanahuatilis se tlayacanquetl, tlantiyas itequihuejcayo. 29Se tlacatl tlen ohui para cualanis quimachilis miyac tlamantli. Pero se tlen nimantzi cualani quinext'ia ihuihuiyo. 30Quema se tlacatl quipiya tlasejseltili ipan iyolo, quimacas se yolistli tlen huejcahuas ipan ni tlaltepactli. Pero intla tiquixtocas tlen sequinoc quipiyaj, quicuas moomiyo queja se cocolistli huan ax tihuejcahuas. 31Aqui quitlaijiyohuilt'ia se tlen teicneltzi quiixpano TOTECO tlen quichijchijqui. Pero aqui quintlasojtla tlen teicneltzitzi quinextil'ia TOTECO tlatlepanitacayotl. 32Tlacame tlen ax quitlepanitaj TOTECO motzontlamiltise ica inintlajtlacolhua. Pero tlen itztoque xitlahuaque iixpa TOTECO motemach'iaj ipan ya tlen hueli quinmanahuis ipan miquistli. 33Tlalnamiquistli mopant'ia ipan ininyolo tlacame tlen tlalnamiquij. Pero ax mopant'ia tlalnamiquilistli campa tlen huihuitique. 34Quema nochi tlacame ipan se tlali monejnemilt'iaj xitlahuac, sequinoc quihueyitlal'iaj inintlal. Pero quema tlacame tlajtlacolchijtinemij, quihualiquil'iaj pinahualistli. 35Se tlanahuatijquetl yolpaqui ica itlatequipanojcahua tlen tlalnamiquij huan quimatij tlachque quichihuase. Pero intla se itlatequipanojca quihualica pinahualistli, quiajsis icualancayo nopa tlayacanquetl.

will be added

X\