Proverbs 12

1Se tlen quipact'ia quisel'ia tlamachtili tlen quixitlahua quipiya tlalnamiquilistli tlen cuali. Pero se tlen ax quinequi quitlacaquilis tlen quixitlahua nel'ia huihuitic. 2TOTECO quicualita se tlacatl tlen cuali. Pero TOTECO quitlalis tlatzacuiltilistli ipan nopa tlacatl tlen moilhu'ia tlen fiero huelis quichihuas. 3Se tlacatl ax quipantis temachili ipan iyolis ica tlen fiero quichihua. Pero tlacame tlen quichihuaj tlen cuali, quena, quipiyaj ininnelhuayo tlen calaqui huejcatla huan ax tleno quinolinis. 4Se sihuatl tlen nelcuali quihualiquil'ia ihuehue tlatlepanitacayotl pampa tlacame quitlachil'iaj queja se tlanahuatijquetl ica se corona ipan itzonteco. Pero se sihuatl tlen quihualiquil'ia ihuehue pinahualistli quicocohua ihuehue queja se cocolistli tlen quicua iomiyohua. 5Se cuali tlacatl moilhu'ia quichihuas tlen xitlahuac, pero ax cuajcualme moilhu'iaj quejatza hueli tlacajcayahuase. 6Inintlajtol tlacame tlen ax quitlepanitaj TOTECO tecocohuaj hasta hueli temict'ia. Pero inintlajtol tlacame tlen itztoque xitlahuaque temanahu'iaj tlen miquistli. 7Toteco Dios quintzontlamiltis ax cuajcualme, pero ininteipa ixhuihua tlacame tlen quichihuaj tlen cuali itztose ica temachtli para nochipa. 8Tlacame quitlepanitaj se tlacatl tlen quipiya cuali itlalnamiquilis, pero se tlen huihuitic quiitaj para ax tleno ipati. 9M'as cuali se tlen tequiti chicahuac huan mosoquihu'ia ipan itequi para quitlanis tlen yajaya huan itlatequipanojcahua quicuase, huan ax se tlacatl tlen mohueyimati huan ax quinequi motequihuis para quipiyas tlen quicuas. 10Se cuali tlacatl mocuesohua ipampa itlapiyalhua pampa ax quinequi ma tlaijiyohuica. Pero quema se tlacatl tlen ax quitlepanita TOTECO moyolilhu'ia para quitlasojtlas itlapiyal, noja pano fiero quichihuil'ia pampa san ya nopa quimati. 11Se tlacatl tlen tequiti chicahuac ipan imila nochipa quipiyas miyac tlacualistli. Pero se tlen huihuitic quinenpolohua itonal pampa tlatzihui. 12Tlen tlachtequij mocualan'iaj quema quiitaj para itequixpo quiichtectoc se tlamantli tlen achi m'as ipati que ya. Pero cuajcualme quitlanij ica inintequi para huelis quinpalehuise sequinoc. 13Ax cuajcualme istlacatij huan inintlajtol quinmasilt'ia pampa nima nesi para ax melahuac. Pero cuajcualme ax istlacatij huan momanahu'iaj tlen miyac tlamantli tlaohuijcayotl. 14Se tlacatl tlen quiijtohua tlen melahuac quipantis miyac tlamantli tlen cuali huan tlen quitemitis iyolis ica paquilistli. Huan yajaya tlen tequiti cuali ica ima quiselis se tlaxtlahuili tlen cuali. 15Se tlen huihuitic moilhu'ia para nemi ipan se ojtli xitlahuac huan ax quinequi consejos. Pero se tlacatl tlen tlalnamiqui quintlacaquil'ia tlen quiconsejomacaj para ma monejnemiltis m'as cuali. 16Se tlen huihuitic nimantzi cualani quema sequinoc quitlaijilhu'iaj. Pero se tlen tlalnamiqui quipiya iyolo intla quitlaijilhu'iaj, yajaya ax quinext'ia cualantli. 17Se testigo tlen quiijtohua nochi tlen senquistoc melahuac, quichihua tlen xitlahuac. Pero se testigo tlen istlacati quichihua pampa quinequi tlacajcayahuas. 18Itztoque sequin tlacame tlen tecocohuaj ica inintlajtol queja elisqu'ia se machete tlen tlatequi. Pero inintlajtol tlalnamiquini eltoc queja se pajtli tlen teyolchicahua huan teseselt'ia. 19Itlajtol se testigo tlen quiijtohua nochi tlen senquistoc melahuac huejcahuas pampa nochi quiitase para xitlahuac. Pero itlajtol se testigo tlen istlacati ax huejcahuas pampa nima monextis para ax melahuac. 20Nochi tlen moilhu'iaj quichihuase tlen ax cuali, quisencahuaj ipan ininyolo quejatza huelis tlacajcayahuase. Pero tlen itztoque xitlahuaque quipiyaj paquilistli ipan ininyolo pampa moyolilhu'iaj tlen cuali huelis quichihuase. 21Ax quipantise tlatzacuiltili tlen monejnemilt'iaj xitlahuac, pero miyac tlaohuijcayotl quipantise ipan ininyolis ax cuajcualme. 22TOTECO quincualancaita tlacame tlen istlacatij. Pero nochi tlen quiijtohuaj tlen melahuac, TOTECO quincualita. 23Se tlen tlalnamiqui ax mohueyimati, niyon ax quinnextilis sequinoc nochi tlen quimati. Pero tlen huihuitique tlahuel mohueyimatij huan quiijtohuaj miyac tlamantli tlen eli san se huihuiyotl. 24Xitequiti chicahuac huan tielis se tlayacanquetl, pero intla timochihuas titlatzihui tielis itlatequipanojca seyoc tlacatl. 25Se tlacatl tlen moyolcuesohua nel'ia tlaijiyohu'ia, pero se cuali tlajtoli quimacas paquilistli ipan iyolo. 26Se tlacatl tlen monejnemilt'ia xitlahuac quinyacana ihuampoyohua ipan se cuali ojtli, pero ax cuajcualme quinhuicaj sequinoc ipan se ojtli campa mocuapolose. 27Se tlacatl tlen tlatzihui ax quinequi quitemos niyon cuahuitl para quiicxitis tlen quipejtoc, san xoxohuic quicuas, pero se tlen quipact'ia tequitis quitlanis tlen nelcuali. 28Tlacame tlen quichihuaj tlen cuali quitoquil'iaj nopa ojtli tlen tehuica campa onca yolistli. Iniojhui ax yohui campa onca miquistli.

will be added

X\