Numbers 3

1Ya ni techpohuil'ia tlen iteixmatcahua Mois'es huan iicni Aar'on ipan nopa tonali quema TOTECO quicamahui Mois'es ipan nopa tepetl Sina'i. 2Inintoca iconehua Aar'on eliyaya: Nadab tlen achtohui ejquetl, Abi'u, Eleazar, huan Itamar. 3Nochi inijuanti quinajalti ica aceite huan quiniyocacajqui ma elica totajtzitzi para ma tequitica tiopan calijtic. 4Pero Nadab huan Abi'u mijque iixpa TOTECO nepa ipan nopa huactoc tlali Sina'i pampa ax quitoquilijque itlajtol TOTECO huan quitequihuijque se tlitl tlen ax tlatzejtzeloltic. Huan tlen mijque aya quinpiyayaya ininconehua, yeca san mocajqui Eleazar huan Itamar para quipalehuise inintata Aar'on ipan itequi queja totajtzi ipan ininnemilis. 5Huan TOTECO quinojnotzqui Mois'es huan quiilhui: 6"Xiquinnotza ma hualaca nochi iteipa ixhuihua Lev'i huan xijchihua para ma monextica iixtla Aar'on para quitequipanose. 7Huan inijuanti quitequipanose Aar'on huan quintequipanose nochi israelitame pampa quichihuase miyac piltequitzitzi tlen tiquinilhuis ma quichihuaca ipan nopa achtohui cuartos ipan nopa yoyon tiopamitl campa timopant'iaj. 8Quimocuitlahuise nopa cuamesas huan nochi tlamantzitzi tlen eltoc ipan nopa yoyon tiopamitl campa timopant'iaj. Huan quichihuase nochi tlen nimechnahuatijtoc inisraelitame xijchihuaca. 9Huajca xiquinmaca Aar'on huan itelpocahua nochi nopa levitame. Quena, nochi tlacame ipan nopa hueyi familia Lev'i quinpalehuise. Huan levitame mocahuase iyoca tlen nochi ne sequinoc israelitame para melahuac ma elica iaxcahua Aar'on huan iniaxcahua itelpocahua. 10Pero san Aar'on huan itelpocahua xiquintequimaca para ma elica totajtzitzi, huan ne sequinoc levitame, axtle. Intla seyoc tlen ax totajtzi quichihuas itequi se totajtzi huan monechcahuis campa m'as tiopan calijtic, monequi xijmictica." 11Huan sampa TOTECO quinojnotzqui Mois'es huan quiilhui: 12"Ya nimechilhuijtoc para monequi xinechmacaca nochi imoachtohui ejcahua, pampa ya nopa noaxcahua. Pero para ax monequi innechmacatiyase imoachtohui ejcahua, ininpatlaca niquinselis nochi levitame para ma elica noaxcahua ininpatlaca nochi sequinoc israelitame, 13pampa na noaxcahua nochi tlen achtohui tlacatij. Quema nijchijqui para ma miquica nochi tlen achtohui ehuani tlen nochi tlali Egipto, nimocuili nochi coneme tlen achtohui ehuani tlen nochi inisraelitame, huan nojquiya nochi tlapiyalime tlen achtohui tlacatise, huan yeca nochi noaxcahua. Na niimoTECO." 14Huan TOTECO quinojnotzqui Mois'es sampa ipan huactoc tlali Sina'i huan quiilhui: 15"Xiquinpohua nochi levitame ipan sesen cali, huan iyoca xiquinpohua ajqueya inijuanti hualajque ipan sese itelpoca nopa huejcapan tata Lev'i. Xiquinpohua nochi oquichpilme tlen ya quiaxitijque se metztli para huejcapa." 16Huan Mois'es quinpojqui senquistoc queja quinahuatijtoya TOTECO. 17Huan nopa huejcapan tata Lev'i quinpixqui eyi itelpocahua: Gers'on, Coat huan Merari. 18Huan Gers'on quinpixqui ome itelpocahua: Libni huan Simei. 19Huan Coat quinpixqui nahui itelpocahua: Amram, Izhar, Hebr'on huan Uziel. 20Huan Merari quinpixqui ome itelpocahua: Mahli huan Musi. Huajca nica nimitzilhuijtoc ajqueya itztoyaj nopa tlayacanani ipan nopa familias tlen iteipa ixhuihua nopa huejcapan tata Lev'i huan ama tiquintocajt'ia nochi levitame. 21Huajca iixhuihua Gers'on mochijque ome huejhueyi familias tlen quisqui tlen itelpocahua, Libni huan Simei. 22Huan ama nochi inintlaca ixhuihua tlen quipiyayayaj se metztli para huejcapa mochijque 7 mil 500. 23Huan TOTECO quinnahuati iixhuihua Gers'on ma quiquetzaca ininyoyoncalhua nechca nopa yoyon tiopamitl ica campa huetzi tonati. 24Huan Eliasaf, icone Lael, elqui nopa tlayacanquetl tlen iixhuihua Gers'on. 25Huan inijuanti quipixque inintequi para quimocuitlahuise nopa tiopamitl huan nochi yoyomitl tlen quipixqui. Quimocuitlahuijque itzajca, icortinas, 26huan nopa icortinas tlen mochihua nopa tlatzactli tlen quiyahualohua nopa tlaixpamitl huan tiopamitl, huan nopa cortinas tlen quicuapilohuaj campa calaquise, huan nochi mecatl tlen quitequihu'ia tiopamitl. Ya nopa eliyaya inintequi iixhuihua Gers'on. 27Huan iixhuihua Coat mochijque nopa nahui huejhueyi familias tlen quisque tlen itelpocahua, Amram, Izhar, Hebr'on huan Uziel. 28Huan ama nochi inintlaca ixhuihua tlen quipiyaj se metztli para huejcapa mochijque 8 mil 600. Huan iixhuihua Coat tequitiyayaj tiopan calijtic. 29Huan TOTECO quinnahuati iixhuihua Coat ma quiquetzase ininyoyoncalhua nechca tiopamitl ica sur. 30Huan Elizaf'an, icone Uziel, elqui nopa tlayacanquetl tlen iixhuihua Coat. 31Huan inijuanti quipixque tlanahuatili para quimocuitlahuise nopa caxa, nopa cuamesa para pantzi, nopa tlahuil quetzali, nopa tlaixpamitl para copali, nopa tlaixpamitl para tlacajcahualistli tlatlatili, huan nochi tepostli tlen quitequihuijque tiopan calijtic. Nojquiya inintequi para quimocuitlahuise nopa cortina yejyectzi tlen quitzajqui campa Tlahuel Tlatzejtzeloltic. Nojquiya inintequi para quicualtlalise nochi ni tlamantli intla monequiyaya se quentzi tequitl. Ya nopa eliyaya inintequi iixhuihua Coat. 32Huan Eleazar, icone nopa totajtzi Aar'on, eliyaya nopa tlayacanquetl tlen m'as hueyi ipan nochi levitame. Yajaya tlen quintequimacayaya nopa tlacame tlen tlapalehuiyayaj tiopan calijtic. 33Huan iixhuihua Merari mochijque nopa ome huejhueyi familias tlen quisque tlen itelpocahua Mahli huan Musi. 34Huan ama nochi inintlaca ixhuihua tlen quipiyaj, se metztli para huejcapa mochijque 6 mil 200. 35Huan TOTECO quinnahuati quiquetzase ininyoyoncalhua nechca tiopamitl ica norte. Huan Zuriel, icone Abihail, elqui nopa tlayacanquetl tlen iixhuihua Merari. 36Huan inijuanti quipixque inintequi para quimocuitlahuise nopa huapali ica tlen quichijque caltechtli, nopa cuaixtlapali, nopa tlaquetzali, huan inintepos cuatetoyo, huan nochi tlamantzitzi tlen quitequihu'ia. 37Nojquiya quimocuitlahuijque nopa tlaquetzali para nopa calixpamitl tlen quiyahualohuayaya nopa tiopamitl ihuaya nopa tepos cuatetomitl para tlaquetzali, ihuaya iniestacas huan ininmecayohua. Ya nopa elqui inintequi iixhuihua Merari. 38Huan TOTECO quinnahuati Mois'es, Aar'on huan ininconehua ma quiquetzaca ininyoyoncalhua nechca tiopamitl ica campa quisa tonati. Huan quipixque inintequi para quinmocuitlahuilise nochi nopa yoyon tiopamitl campa TOTECO mopantiyaya ica nopa israelitame. Huan intla tlen hueli tlacatl quinechcahuisqu'ia nopa yoyon tiopamitl, monequi quimictise. 39Huan nochi nopa levita tlacame tlen Mois'es huan Aar'on quinpojque tlen quipiyayayaj se metztli para huejcapa ajsique 22 mil oquichpilme huan tlacame. 40Teipa TOTECO quiilhui Mois'es: "Xiquinpohua nochi achtohui ehuani oquichpilme huan tlacame ipan israelitame tlen quipiyaj se metztli para huejcapa, huan xiquinijcuilo ica inintoca. 41Nochi levitame elise noaxcahua para nechtequipanose na, niimoTECO. Huan yeca ayoc nimoaxcatis iniachtohui conehua nochi israelitame. Huan inintlapiyalhua levitame nimoaxcatis, huan yeca ayoc elis noaxca iniachtohui cone sesen sihua tlapiyali tlen iniaxca sequinoc israelitame tlen ax levitame." 42Huajca Mois'es quinpojqui nochi israelitame tlen achtohui ehuani tlen oquichpilme o tlacame senquistoc queja TOTECO quinahuatijtoya. 43Huan nochi oquich israelitame tlen quiaxitijtoyaj se metztli quinijcuilojque huan mochijque 22 mil 273 ica nochi. 44Huan TOTECO quicamahui Mois'es huan quiilhui: 45"Xinechmaca nochi levitame para nechtequipanose ininpatlaca imooquichpilhua tlen achtohui ehuani, huan xinechmaca inintlapiyalhua nopa levitame queja ininpatlaca inioquich tlapiyalhua tlen achtohui ehuaj tlen nochi israelitame. Quena, nochi levitame elise noaxcahua para ma nechtequipanoca na, niimoTECO. 46Pero nopa achtohui ehuani oquichpilme huan tlacame tlen nochi israelitame quionpano ica 273 imiyaca nopa oquichpilme huan tlacame tlen itztoyaj levitame. Huajca axaca se oquichpil o tlaca levita para ica nijpatlas nopa 273 achtohui ehuani tlen inisraelitame tlen mocajque huan monequi xinechcohuilise. 47Huajca para sesen nopa 273, monequi xinechmacaca 5 plata tomi tlen quipiya 11 gramos ietica queja nopa tlayejyecoli tlen quitequihu'iaj ipan tiopamitl. 48Huan xiquinmactili nopa tomi Aar'on huan iconehua para innechcohuilise nopa 273 achtohui ehuani ipan israelitame tlen mocajque." 49Huajca Mois'es quiseli nopa tomi tlen nopa tlacame quitlaxtlahuiyayaj ipampa nopa achtohui ehuani israelitame tlen mocajque. 50Huan para nochi quiseli 1 mil 365 plata tomi ica ietica queja nopa tlayejyecoli tlen quitequihuijque ipan tiopamitl. 51Huan teipa Mois'es quinmactili Aar'on huan itelpocahua nopa tomi senquistoc queja TOTECO quinahuatijtoya.

will be added

X\