1 Itztoya se hueyi tlanahuatijquetl cananeo tlen tlanahuatiyaya ipan altepetl Arad ipan tlali Neguev, huan ya quicajqui para nopa israelitame hualayayaj ipan ojtli tlen Atarim. Huajca motlalanqui para quintehuiti huan quinitzquijque sequin israelita tlacame huan quinhuicaque ilpitoque. 2 Huajca nopa israelitame quichijque se tlajtoli ica TOTECO. Quiilhuijque intla quinpalehuisqu'ia para quintlanise nopa cananeos, quintzontlamiltisqu'iaj nochi tlen itztoyaj nopona ica inialtepehua. 3 Huan TOTECO quintlacaquili nopa israelitame huan quinpalehui ma quintlanica nopa cananeos. Huan nopa israelitame quintlamimictijque huan quinxolejque nochi nopa altepetini. Huajca nopona pejqui motocajt'ia Horma. (Horma quiijtosnequi Tlaxolehuali.) 4 Teipa nopa israelitame quisque campa tepetl Hor huan yajque ipan ojtli tlen yohui para Chichiltic Hueyi Atl para quiyahualose tlali Edom para ax calaquise. Pero ipan ojtli ayoc quipixque ininyolo, 5 huan pejque tlen hueli camatij ica Toteco Dios huan ica Mois'es. Quiijtohuayayaj: --¿Para tlen techquixtijque ipan tlali Egipto para ma timiquica ipan ni huactoc tlali? ¡Ax tleno onca tlen huelis tijcuase, niyon atl para tiquise! ¡Huan techyolajsic ni man'a tlen techmaca para tlacualistli pampa nel'ia fiero! 6 Huajca TOTECO quintitlanili cohuame tlen quipixque inintencococa huan quema quintzacaniyayaj, elqui queja quintlatiyayaj huan nimantzi miquiyayaj. Huan ica ya nopa mijque miyac israelitame. 7 Huajca yajque nopa israelitame campa itztoya Mois'es huan quiilhuijque: --Titlajtlacolchijtoque pampa ticamatitoque tlen ax cuali ica TOTECO, huan ica ta. ¡Xijtlajtlani TOTECO ma quinijcueni nopa cohuame! Huan Mois'es quitlajtlani TOTECO ipampa nopa israelitame. 8 Huajca TOTECO quiilhui Mois'es: --Xijchihua se cohuatl tlen bronce tlen nesis queja se tlen nopa cohuame. Huan xijtlali huejcapa ipan se asta, huan quema se acajya quitzacanis se cohuatl, ma quitlachili nopa cohuatl tlen eltos huejcapa ipan se asta, huan tlen quitlachilis, momaquixtis. 9 Huan Mois'es quichijqui se cohuatl ica bronce huan quitlali huejcapa ipan se asta huan quema se acajya quitzacaniyaya se cohuatl, san quitlachiliyaya nopa cohuatl tlen bronce huan ax miquiyaya. 10 Huan nopa israelitame quitoquilijque iniojhui huan teipa quiquetzque ininyoyoncalhua hasta Obot. 11 Huan quistejque tlen Obot huan quitoquilijque iniojhui huan mochihuatoj ipan Ijeabarim ipan nopa huactoc tlali ica campa quisa tonati tlen tlali Moab. 12 Huan teipa sampa quitoquilijque iniojhui huan quiquetzque ininyoyoncalhua ipan nopa Zered tlamayamitl. 13 Huan teipa quitoquilijque iniojhui huan mochihuatoj ipan neca nali tlen nopa atemitl Arn'on. Nopa atemitl Arn'on mopant'ia ipan nopa huactoc tlali huan onquisa ipan inintlal nopa amorreos, huan eltoc campa monepant'ia tlali Moab ihuaya inintlal nopa amorreos. 14 Ya ni nojquiya mopant'ia ijcuilijtoc ipan nopa amatl tlen quipiya itlatehuijcayo TOTECO, quiijtohua: "Ximoilhui tlen Toteco quichijqui ipan nopa Hueyi Atl Chichiltic, huan ipan nopa pilatentzitzi tlen nopa atemitl Arn'on. 15 Camati tlen nopa miyac atentli tlen yohuij hasta tlali Ar, huan tlami campa monepant'ia ica tlali Moab." 16 Huan nopa israelitame quistejque nopa atemitl Arn'on huan quitoquilijque iniojhui hasta Beer. (Beer quinequi quiijtos Ameli.) Nopona TOTECO quiilhui Mois'es: "Xiquinsentili nochi nopa israelitame huan niquinmacas atl." 17 Huajca elqui ipan nopa tonal quema nopa israelitame huicaque ica paquilistli, quiijtojque: "¡Ma tihuicaca tlen ni ameli: Ma meya atl nica! 18 Huan quisqui atl ipan nopa ameli, tlen totlayacancahua quixajque. Quixajque ica ininma huan ica inintepospala. Quena, ica inincuatopil tlen ica tlanahuat'iaj, techtlaxahuilijque ni ameli." Huan nopa israelitame quistejque campa nopa huactoc tlali huan quitoquilijque iniojhui huan panoque Matana, 19 Nahaliel huan Bamot. 20 Huan quisque Bamot huan quitoquilijque iniojhui hasta nopa tlamayamitl tlen eltoya ipan nopa tlali Moab tlen eltoya itzintla nopa huejcapantic tepetl Pisga. Itzonpac nopa tepetl hueliyaya moquetzase huan tlachiyase hasta nopa huactoc tlali campa hualajtoyaj. 21 Nopa israelitame quintitlanque inintlayolmelajcahua ma quiitatij nopa hueyi Tlanahuatijquetl Seh'on tlen quinnahuatiyaya amorreos, huan ma quiilhuica: 22 "Tojuanti tijnequij tipanose ipan motlal. Ax ticalaquise campa intlatojtoctoque, o campa se xocomeca mili. Ax tiquise atl ipan niyon se imoamel. San tipanose ipan nopa hueyi ojtli hasta tiquisase ipan motlal." 23 Pero Tlanahuatijquetl Seh'on ax quincahuili ma panoca. San quinsentili nochi isoldados huan quisque quintzacuilitij nopa israelitame ipan huactoc tlali, huan ajsitoj campa Jahaza huan motehuijque ininhuaya. 24 Huajca nopa israelitame quintehuijque ica ininmachete huan tlatlanque. Huan inijuanti moaxcatijque itlal Seh'on tlen pejqui ica nopa atemitl Arn'on hasta nopa atemitl Jaboc. Quinequi quiijtos moaxcatijque itlal Seh'on hasta campa monepant'ia ica inintlal nopa amonitame. Nopa amonitame quipixque inintlal achi m'as cuali moyahualojtoyaj que amorreos. 25 Huajca nopa israelitame moaxcatijque nochi nopa altepetini tlen nopa amorreos huan pejque quitequihu'iaj nopa hueyi altepetl Hesb'on huan nochi iranchos. 26 Hesb'on eliyaya ialtepe Tlanahuatijquetl Seh'on huan nopona mosehuiyaya para quinnahuatis nopa amorreos. Seh'on quiichtequilijtoya nopa altepetl nopa tlanahuatijquetl tlen moabitame. Nojquiya Seh'on quincuilijtoya nochi inintlal nopa moabitame hasta nopa atemitl Arn'on. 27 Huan yajaya quiijcuilojtoya se tlajcuilojquetl queja Tlanahuatijquetl Seh'on tlatlantoya. Quej ni quiijto: "Xihualaca ipan altepetl Hesb'on. Ma tijcualtlalica para elis nopa altepetl campa tlanahuatis nopa hueyi Tlanahuatijquetl Seh'on. 28 Seh'on nochi quixolejqui ica nopa tlitl tlen pejqui ipan altepetl Hesb'on. Quitlamilti nochi hasta altepetl Ar ipan tlali Moab. Quinmicti nochi huejhueyi tlacame tlen tlanahuatiyayaj campa itoca Arn'on. 29 ¡Titeicnelti, ta titlali Moab! ¡Tipolijtoc! ¡Nojquiya nochi inQuemos ehuani! Motelpocahua nochi cholojque, huan moichpocahua huetzque imaco nopa hueyi Tlanahuatijquetl Seh'on. 30 Yajaya quitzontlamiltijtoc nochi ipan altepetl Hesb'on huan hasta Dib'on huan Nofa. Huan nopa tlitl tlen quipehualti yajqui hasta Medeba." Queja nopa quiijcuilo nopa tlajcuilojquetl. 31 Huajca nopa israelitame quitequihuijque tlen eliyaya inintlal nopa amorreos. 32 Huan tlen nopona Mois'es quintitlanqui tlacame ma quitlachilitij ixtacatzi nopa altepetl Jazer. Teipa nopa israelitame yajque huan moaxcatijque Jazer ihuaya nochi altepetini inechca, huan quinpanquixtijque nochi amorreos tlen nopona itztoyaj. 33 Teipa sampa yajque para yase altepetl Bas'an, pero nopa hueyi Tlanahuatijquetl Og ipan Bas'an, motlalanqui ica nochi isoldados huan hualajqui quintehuiqui nopa israelitame campa altepetl Edrei. 34 Huan TOTECO quiilhui Mois'es: "¡Amo xiquimacasica Og! Na ya nijtlalijtoc imomaco ica nochi isoldados huan nochi itlal. Huan ta tijchihuilis san se queja tijchihuili Seh'on, inintlanahuatijca nopa amorreos tlen itztoya ipan altepetl Hesb'on." 35 Huajca quej ni nopa israelitame quimictijque Tlanahuatijquetl Og ihuaya itelpocahua huan nochi isoldados. Niyon se ax quicajque itztoc huan moaxcatijque nochi inintlal.
