Numbers 20

1Huan nopa israelitame sampa ajsitoj ipan nopa huactoc tlali tlen itoca Zin ipan abril, nopa achtohui metztli ipan iniyancuic xihui, huan mocajque campa itoca Cades. Huan nopona mijqui Mar'ia, huan quitlaltojque. 2Huan ax oncayaya atl nopona para quiise nopa israelitame. Huan sampa mosentilijque huan mosisinijque ica Mois'es huan Aar'on, 3huan quiixcoilhuijque Mois'es: --Achi m'as cuali timictosqu'iaj ininhuaya nopa sequinoc israelitame tlen TOTECO quinmicti iixpa. 4¿Para tlen titechhualicac, tiitlacajhua TOTECO, ipan ni huactoc tlali para tojuanti huan totlapiyalhua ma timiquica nica? 5¿Para tlen titechquixti nepa ipan tlali Egipto huan titechhualicac nica campa nel'ia tlahuel fiero? Ax quipiya tlatoctli, niyon higos, niyon xocomeca mili, niyon granada. ¡Niyon ax onca atl para tiquise! 6Huan Mois'es ihuaya Aar'on quincajtejque nopa miyac israelitame puertajteno huan calajque ipan nopa yoyon tiopamitl campa mopant'iaj ihuaya TOTECO, huan nopona motlancuaquetzque huan mohuijtzonque tlalchi, huan itlatlanex TOTECO monexti iniixtla. 7Huan TOTECO quiilhui Mois'es: 8--Xijcuitehua icuatopil Aar'on, huan xiya ihuaya ya huan xiquinsentiliti nochi israelitame. Teipa iniixtla nochi israelitame xijnojnotza nopa hueyi tetl, huan xiquilhui ma inmechmaca atl. Huan queja nopa inquiquixtise atl ipan nopa tepexitl para nochi ma atlica ininhuaya inintlapiyalhua. 9Huajca Mois'es quicuic nopa cuatopili tlen eltoya iixtla TOTECO, senquistoc queja quinahuatijtoya. 10Huan Mois'es ihuaya Aar'on quinsentilijque nochi nopa israelitame iixpa nopa tepexitl, huan Mois'es quinilhui: --¡Xitlacaquica inmosisinijca tlacame! ¿Huelis monequi tojuanti ma timechquixtilica atl ipan ni hueyi tepexitl para timechamacase? 11Huan quema Mois'es quiijto ya ni, quitlalanqui ima huan ome huelta quitzohuitejqui nopa hueyi tepexitl ica nopa cuatopili. Huan tlahuel miyac atl quisqui, huan nochi nopa israelitame ininhuaya inintlapiyalhua pejque atlij. 12Pero TOTECO quiilhui Mois'es ihuaya Aar'on: --Pampa ax inmotemachijque ipan na, huan ax inquinnextilijque nopa israelitame para na nitlatzejtzeloltic huan niiyoca tlen nochi sequinoc, ax inquinyacanase ipan nopa tlali tlen nimechmacatoc. 13Huan quitocajtijque campa itztoyaj Ameli Tlen Meriba, (Meriba quiijtosnequi Campa Monajnanquilijque) pampa nopona nopa israelitame monajnanquilijque ica TOTECO huan yajaya quinnextili para yajaya tlatzejtzeloltic huan nel'ia iyoca tlen nochi sequinoc. 14Quema nopa israelitame itztoyaj ipan Cades, Mois'es quintitlanqui sequin itlayolmelajcahua ma quiitatij nopa tlanahuatijquetl tlen tlali Edom para ma quiilhuica ni tlajtoli: "Tojuanti tiiteipa ixhuihua Israel tlen huejcajquiya eliyaya iicni mohuejcapan tata. Ta cuali tijmati nopa tlaohuijcayotl tlen topantitoc. 15Tohuejcapan tatahua yajque ipan tlali Egipto huan nopona huejcajque para itztose, pero nopa Egipto ehuani tlahuel techtlaijiyohuiltiyayaj. 16Pero quema tijtzajtzilijque TOTECO ma techpalehui, techtlacaquili huan techtitlanili se elhuicac ejquetl, huan techquixti ipan nopa tlali Egipto. "Huan ama nica tiitztoque ipan Cades, se altepetl campa monepant'ia ica motlal. 17Yeca timitztlajtlan'iaj xitechcahuili tipanose ipan motlal. Ax ticalaquise campa onca toctli o campa se xocomeca mili, niyon ax tiquise atl tlen niyon se moamelhua. San tiyase ipan nopa hueyi ojtli huan ax tijcahuase nopa ojtli hasta quema tiquistose ipan motlal." 18Pero nopa hueyi tlanahuatijquetl tlen tlali Edom quinnanquili: "Ax timechcahuilise inpanose ipan totlal. Huan intla inhualase, na ihuaya nosoldados timechtzacuilise." 19Pero nopa israelitame sampa quiijtojque: "San tiyase ipan nopa ojtli tlen nochi quitequihu'iaj, huan intla tojuanti o totlapiyalhua quiise imoa, timechtlaxtlahuise. San xitechchihuilica se favor huan xitechcahuilica tiicxinejnemise ipan imotlal." 20Pero nopa hueyi tlanahuatijquetl tlen tlali Edom quinnanquili: "¡Ax inpanose!" Huan quisqui ica miyac isoldados tlen quihuicayayaj inintepos para quinnamiquitij nopa israelitame. 21Huajca pampa nopa tlanahuatijquetl tlen tlali Edom ax quinejqui ma panoca nopa israelitame ipan itlal, moicancuepque tlen itlal huan quitemojque seyoc ojtli. 22Teipa nochi nopa israelitame quisque ipan altepetl Cades, huan nejnentiyajque hasta itzintla nopa tepetl Hor. 23Huan nopona itzintla tepetl Hor nechca campa monepant'ia ihuaya tlali Edom, TOTECO quinilhui Mois'es ihuaya Aar'on: 24"Ya ajsic hora para miquis Aar'on. Ax calaquis ipan nopa cuali tlali tlen na niquinmacatoc israelitame, pampa nepa campa Ameli Meriba ax inquineltocaque tlen na nimechnahuati. 25Huajca ta, Mois'es, xijhuica Aar'on ihuaya icone Eleazar tepeixco ipan tepetl Hor. 26Huan nopona xijquixtilis Aar'on iyoyo tlen totajtzi huan xijtlalili Eleazar, pampa nopona miquis Aar'on." 27Huajca Mois'es quichijqui senquistoc queja TOTECO quinahuati. Huan nochi inijuanti tlejcoque ipan tepetl Hor iniixtla nochi israelitame. 28Huan nopona Mois'es quiquixtili Aar'on iyoyo tlen totajtzi huan quitlalili Eleazar, itelpoca. Huan nopona tepeixco mijqui Aar'on, huan Eleazar ihuaya Mois'es temoque ipan nopa tepetl. 29Huan quema momacaque cuenta nopa israelitame para mictoya Aar'on, quichoquilijque para 30 tonali.

will be added

X\