Numbers 11

1Se tonal nopa israelitame pejque camatij tlen ax monequi huan quitlaijilhuiyayaj TOTECO pampa moilhuijque quipanoyayaj tlaohuijcayotl. Huan TOTECO quincajqui huan tlahuel cualanqui. Huan quintitlanili se tlitl tlen pejqui quintlat'ia tlen quiquetztoyaj ininchajchaj itejteno ne sequinoc israelitame. 2Huajca nochi israelitame cuatzajtzique chicahuac huan quitlajtlanijque Mois'es ma quinpalehui. Huan Mois'es quitlajtlani TOTECO tlapalehuili huan nopa tlitl sejqui. 3Huajca quitocajtijque itejteno inialtepe Tabera. (Tabera quinequi quiijtos Campa Tlalemenqui.) Pampa hasta nopona nopa tlitl tlen TOTECO quintlati. 4Nopa tlacame tlen ax israelitame tlen nejnemiyayaj ininhuaya israelitame huan hualajtoyaj ipan tlen hueli xinachtli tlacame, san moilhuiyayaj para quicuase nacatl. Huan nopa israelitame nojquiya quintoquilijque huan pejque mochoquil'iaj huan quiijtohuayayaj: "¡Nel'ia cuali elisqu'ia intla oncasqu'ia nacatl para tijcuase! 5Tiquilnamiquij nopa michime tlen tijcuayayaj san tlapic nepa ipan tlali Egipto. Huan nojquiya tijcuayayaj pepinos, melones, xonacatl, seboyas huan ajos. 6Pero ama nochi tiyaman'iaj huan ayoc timayanaj, pampa san ni man'a onca para tijcuase." 7Huan nopa man'a tlen huetziyaya eliyaya queja iyol nopa colanto huan nesiyaya achi costic queja cuaestli. 8Huan iajhuiyaca eliyaya queja tlaxcali tlen harina tlaxacualoli ica aceite. Huan mojmostla nopa israelitame quisayayaj calteno huan quisentiliyayaj. Teipa quitisiyayaj ipan ininmetl, o quitepachoyayaj, o quimanayayaj huan ica quichihuayayaj se pantzi. 9Ica tlayohua, quema huetziyaya ajhuechtli calteno, huetziyaya nojquiya nopa man'a. 10Huan Mois'es quicajqui para tlacame ipan sese israelita familia mosehuijtoyaj inincalixpa chocayayaj, huan yeca TOTECO tlahuel cualanqui, huan Mois'es ax quicualitac. 11Huajca Mois'es quiilhui TOTECO: --¿Para tlen quej ni tinechchihuilijtoc, na nimotlatequipanojca? ¿Tlaque ax cuali nijchijtoc moixpa para tinechmamaltijtoc nochi ni tlacame? 12Ax na niinintata o niininnana. Inijuanti ax noconehua. ¿Para tlen tinechilhu'ia ma niquinmamajtinemi hasta tiajsise campa nopa tlali tlen tiquinilhuijtoc para tiquinmacas tohuejcapan tatahua? Na niquinhuica san queja se quihuica icone tlen noja chichi. 13¿Canque hueli nijcuis nacatl para ma quicuaca nochi ni miyac israelitame? Nochi san nechchoquil'iaj huan nechilhu'iaj: 'Xinechmaca nacatl para tijcuase.' 14Na ax nihueli niquinhuicas nochi ni miyac tlacame noselti. Niquinita para se tlamamali tlen tlahuel etic para na. 15Intla quej ni tinechchihuilis nochipa, achi m'as cuali tinechmictis ama intla nel'ia tinechicnel'ia. Queja nopa ax monequi niquitas tlen ni tlacame nechchihuilise. 16Pero TOTECO quinanquili: --Xinechsentilhuili 70 huehue tlacame tlen tijmati cuali tlayacanaj huan quihuicaj tequihuejcayotl ica ni miyac israelitame. Huan xiquinhualica campa nopa yoyon tiopamitl campa timopant'iaj huan nopona xinechchiya ininhuaya. 17Huan na nitemos huan nopona nimitzcamahuis. Huan nijcuis Notonaltzi tlen itztoc mohuaya huan nojquiya niquinmacas para inijuanti ma mitzpalehuica para inquinhuicase nochi ni miyac tlacame. Huan queja nopa ax monequi titequitis moselti. 18Huan nojquiya nimantzi xiquinnahuati nochi israelitame ma moyolpajpacaca noixpa, pampa mostla ica ijnaloc quicuase nacatl. Xiquinilhui ya niquincactoc para chocaj huan quiijtohuaj para elisqu'ia cuali intla oncasqu'ia nacatl para quicuase. Moilhu'iaj achi m'as cuali itztoyaj nepa ipan tlali Egipto. Yeca ama na niquinmacas nacatl para quicuase. 19Huan ax quicuase se tonal, niyon ome tonali, niyon macuili tonali, niyon majtlactli tonali, niyon 20 tonali. 20Pero quicuase nochi se metztli hasta quisas ipan iniyacatzol huan quiijiyase, pampa inijuanti nechhuejcamajcajtoque na, tlen niimoTECO; na tlen niitztoc tlatlajco inijuanti. Chocatoque noixtla huan quiijtojtoque: '¿Para tlen tiquisque nepa ipan tlali Egipto?' 21Huajca Mois'es quiijto: --San tlacame tlen nejnemij nohuaya itztoque 600 mil huan iyoca sihuame huan coneme. ¿Quejatza tiquijtohua titechmacas nacatl para tijcuase nochi se metztli? 22Yonque tiquinmictisqu'iaj nochi toborregojhua huan tohuacaxhua, ax quinaxilisqu'ia para nochime. Yonque tiquinmacasqu'ia nochi michime tlen itztoque ipan hueyi atl, ax quinaxilisqu'iaj. 23Pero TOTECO quinanquili: --¿Ta timoilhu'ia tlahuel pilquentzi nochicahualis? Ama tiquitas intla mochihuas o ax mochihuas tlen niquijtohua. 24Huajca Mois'es quisqui huan quinpohuili nochi israelitame tlen TOTECO Dios quiilhuijtoya. Huan quinsentili nopa 70 huehue tlacame tlen nopa israelitame huan quintlali yahualtic tlen nopa yoyon tiopamitl. 25Huan TOTECO temoc ipan nopa mixtli huan quicamahui Mois'es. Huan teipa quicuic Itonaltzi tlen itztoya ipan Mois'es para quipalehuis, huan nojquiya quinmacac nopa 70 huehue tlacame. Huan quema Itonaltzi motlali ipan nopa huehue tlacame, pejque camatij queja tiocamanalohuani. Pero san se huelta panoc huan ayoc mochijqui sampa. 26Huan itztoyaj ome tlen nopa 70 huehue tlacame tlen TOTECO quintlapejpenijtoya tlen mocajtoyaj ipan ininchajchaj, se itoca Eldad huan ne se itoca Medad. Pero nojquiya Itonaltzi TOTECO motlali ipan inijuanti huan pejque camatij queja tiocamanalohuani nopona campa itztoyaj ipan ininchajchaj. 27Huajca sequin telpocame motlalojtiyajque huan quiilhuitoj Mois'es para Eldad huan Medad camatitoyaj queja tiocamanalohuani nepa campa ininchajchaj. 28Huajca Josu'e, icone Nun, tlen quipalehuijtoya Mois'es hasta itelpocatiya quiijto: --Noteco Mois'es, xiquintlacahualti. 29Pero Mois'es quinanquili: --¿Ta tinechtlasomati? Nelcuali elisqu'ia intla TOTECO quinmacasqu'ia Itonaltzi nochi israelitame huan nochi elise tiocamanalohuani. 30Huan Mois'es huan nochi nopa huehue tlacame mocuepque campa ininchajchaj. 31Huan TOTECO quichijqui ma huala se ajacatl chicahuac tlen campa hueyi atl huan quinhualicac tlahuel miyac solime. Huan patlantinemiyayaj campa hueli tlatlajco huan yahualtic nopa altepetl tlen ininyoyoncalhua nopa israelitame. Huan nopa solime patlantinemiyayaj tlalchipantzi san queja se metro ihuejcapanca. Huan nojquiya san se eliyaya temitoc ica solime huejca tlen ininchajchaj hasta campa se huelis ajsis intla nejnemis para se tonal ihuejcaca. 32Huajca nochi nopa achtohui tonali huan yohuali huan ipan ne seyoc tonali, nochi israelitame quinitzquitinemiyayaj huan quinmictijtinemiyayaj solime. Huan inijuanti tlen tlahuel pilquentzi quisentilijque, quisentilijque queja 60 hueyi lalax chiquihuitl tlen senquistoc solime. Huan pejque quinhuatzaj campa hueli ipan inialtepe tlen yoyon caltini. 33Pero quema pejque quicuaj nacatl nopa israelitame, TOTECO cualanqui ininhuaya huan quintitlanili se hueyi cocolistli huan quichijqui ma miquica miyac tlacame. 34Huan yeca quitocajtijque nopa lugar Quibrot Hataava pampa nopona quintlaltojque miyac tlen tlahuel quinequiyayaj nacatl. (Quibrot Hataava quiijtosnequi Campa Quintlaltojque Tlen Itzcuime.) 35Huan nopa israelitame motlanantejque tlen Quibrot Hataava huan nejnentiyajque hasta Hazerot huan nopona mocajque se quesqui tonali.

will be added

X\