Nehemiah 10

1Huan nica eltoc totoca tojuanti tlen timotocajtlalijque ipan amatl: Na niNehem'ias, niicone Hacal'ias, tlen nigobernador. Huan totajtzitzi tlen motocajtlalijque elque Sedequ'ias, 2Sera'ias, Azar'ias, Jerem'ias, 3Pasur, Amar'ias, Malqu'ias. 4Hat'us, Seban'ias, Maluc, 5Harim, Meremot, Obad'ias, 6Daniel, Ginet'on, Baruc, 7Mesulam, Ab'ias, Mijam'in, 8Maaz'ias, Bilgai huan Sema'ias. 9Huan levitame tlen motocajtlalijque elque: Jes'ua, icone Azan'ias, Bin'ui tlen se iixhui Henadad, huan Cadmiel, 10ihuaya ininlevita icnihua: Seban'ias, Hod'ias, Kelita, Pela'ias, Han'an, 11Mica'ia, Rehob, Hasab'ias, 12Zacur, Sereb'ias, Seban'ias, 13Hod'ias, Bani, huan Beninu. 14Huan motocajtlalijque tlayacanani ipan nopa tlacame: Paros, Pahat Moab, Elam, Zatu, Bani, 15Buni, Azgad, Bebai, 16Adon'ias, Bigvai, Ad'in, 17Ater, Ezequ'ias, Azur, 18Hod'ias, Hasum, Bezai, 19Harif, Anatot, Nebai, 20Magp'ias, Mesulam, Hezir, 21Mesezabeel, Sadoc, Jad'ua, 22Pelat'ias, Han'an, Ana'ias, 23Oseas, Hanan'ias, Hasub, 24Halohes, Pilha, Sobec, 25Rehum, Hasabna, Maas'ias, 26Ah'ias, Han'an, An'an, 27Maluc, Harim huan Baana. 28Huan nochi sequinoc tlacame, nopa sequinoc totajtzitzi, levitame, puerta tlamocuitlahuiani, huicani, tiopa tequipanohuani, huan nochi sequinoc tlen moiyocatlalijque tlen tlacame tlen ax quiixmatij Toteco Dios tlen nopano itztoyaj, nochi motemacaque para quitequipanose Toteco Dios ininhuaya ininsihuajhua huan ininconehua tlen ya hueliyayaj tlamachil'iaj, 29nochi mosejcotilijque huan sentic ininhuaya iniicnihua huan inintlayacancahua tlatestigojquetzque para quitlamichihuase nochi itlanahuatilhua Toteco Dios tlen quinmacatoya ica itlatequipanojca Mois'es. Nojquiya tlatestigojquetzque para quichihuase nochi tlajtoli, tlamachtilme huan leyes tlen TOTECO quinilhuijtoc. Huan intla axtle, huajca yajuanti quiselisqu'iaj nochi nopa tlatelchihualistli tlen quinamiqui quinajsis. 30Huan nochi nopa tlacame quiijtojque: "Tijcahuaj totlajtol para ax tiquincahuilise toichpocahua ma monamictica ininhuaya tlacame tlen ax israelitame, huan niyon totelpocahua ininhuaya ichpocame tlen ax israelitame. 31"Intla tlacame tlen ax israelitame quihualicase tlamantli para quinamacase ipan s'abado quema timosiyajcahuaj o ipan tlen hueli tonali tlen tlatzejtzeloltic para TOTECO, huajca ax tiquintlacohuilise. Nojquiya quema ajsi nopa chicome xihuitl tijcahuilise ma mosiyajcahuas nopa tlali huan ax tleno tijtocase huan tiquintlapojpolhuise nochi israelitame tlen techtlahuiquil'iaj. 32"Nojquiya tiquijtohuaj para sesen xihuitl titemacase nahui gramos tlen plata tomi para itiopa Toteco Dios huan nochi itequi. 33Elis para nopa pantzi tlen quinext'iaj iixtla, huan para nopa tlacajcahualistli tlen harina, huan nopa tlacajcahualistli tlatlatili tlen ajachica monequi, huan nopa tlacajcahualistli ipan tonali para ma timosiyajcahuaca, huan quema yancuic metztli, huan nochi nopa ilhuime tlen yaja quitlalijtoc. Nojquiya elis para gastos ica tlamantli tlatzejtzeloltique, huan nopa tlacajcahualistli para tlajtlacoli para quiixtzacuas totlajtlacolhua tiisraelitame iixtla, huan nochi sequinoc tlamantzitzi tlen monequi motequihuis ipan itiopa Toteco Dios. 34"Nojquiya timahuiltijtoque ica nopa piltetzitzi para tijmatise catl'ia familia tlen totajtzitzi, tolevita icnihua o sequinoc tiisraelitame totequi para ma tijhuicaca cuahuitl huan ipan catl'ia tonal ipan sesen xihuitl monequi tijhuicase nopa cuahuitl para quitlatise ipan itlaixpa Toteco Dios queja yaja tlanahuati ma tijchihuaca ipan itlanahuatilhua. 35"Nojquiya sesen xihuitl titlatestigojquetzaj para tijhuicase ipan itiopa TOTECO itlajca tlen achtohui quisa tlen totlatochua huan inintlajca tlen achtohui temaca nochi cuatini tlen tijpiyaj. 36"Nojquiya tiquijtohuaj para tijhuicase ipan itiopa Toteco Dios toachtohui cone, huan iniachtohui conehua tohuacaxhua huan toborregojhua. Huan tiquinmacase nopa totajtzitzi tlen quitequipanohuaj Toteco Dios queja quiijtohua nopa tlanahuatili. 37"Nojquiya tijhualicase para nopa totajtzitzi nopa achtohui harina, nopa achtohui cuatlactli tlen sesen cuahuitl, nopa achtohui xocomeca atl huan nopa achtohui aceite hasta campa quiajocuise ipan tiopamitl. Huan para nopa levitame, tijhuicase se chiquihuitl ipan sesen majtlactli chiquihuitl tlen nochi tlen temaca totlal huan ya nopa elis todiezmo. Huan nopa levitame quiselise huan quisentilise ipan nochi topilaltepetzitzi pampa queja nopa inintequi. 38"Huan nopano ininhuaya nopa levitame tlen quisel'iaj diezmos itztos se totajtzi tlen se iixhui Aar'on. Huan se chiquihuitl tlen sesen majtlactli chiquihuitl tlen quiselise para diezmos tlen tlacualistli, nopa levitame quiajcocuise ipan nopa cuarto ipan itiopa Toteco Dios campa tlaajcocuij. 39Pampa israelitame ininhuaya nopa levitame quintequimacatoc Toteco Dios para quiajocuise nopa tlacajcahualistli tlen trigo, xocomeca atl, huan aceite ipan nopa cali campa quinajocuij nopa tlamantli tlatzejtzeloltic para quitequihuise totajtzitzi, huan puerta tlamocuitlahuiani huan huicani. "Huajca nica tijcahuaj totlajtol para ax tijcahuase tijmacase itiopa Toteco Dios tlen monequi nopano."

will be added

X\